രുചികരമായ സമൂസ കഴിക്കാൻ ബേക്കറിയിൽ പോകണമെന്നില്ല, അൽപമൊന്നു ശ്രമിച്ചാൽ വീട്ടിലും തയ്യാറാക്കാം. അതിനൊപ്പം വ്യത്യസ്തമായ ചട്നി കൂടിയായാലോ? ബേക്കറി സ്റ്റൈൽ സമൂസയും മാതള നാരങ്ങ ചട്ണിയും തയ്യാറാക്കുന്ന വിധമാണ് താഴെ നൽകിയിരിക്കുന്നത്. 

സമൂസ മസാല ഉണ്ടാക്കാൻ 

1. ഉരുളക്കിഴങ്ങ് വേവിച്ചത് -2 എണ്ണം
2.സവാള -1 എണ്ണം
3.പച്ചമുളക് -2 എണ്ണം
4. ഇഞ്ചി -1 ചെറിയ കഷ്ണം
5.ഗ്രീൻ പീസ് വേവിച്ചത് /ഫ്രഷ് ഗ്രീൻ പീസ് -1 കപ്പ്‌
6. മഞ്ഞൾ പൊടി -1/2 ടേബിൾ സ്പൂൺ
7. ഗരം മസാല -1/4 ടേബിൾ സ്പൂൺ
8. എണ്ണ -1 ടീസ്പൂൺ
9. ഉപ്പ് - ആവശ്യത്തിന്
10. മല്ലിയില

സമൂസ ഷീറ്റ്  ഉണ്ടാക്കാൻ 

1.മൈദ -1 കപ്പ്‌
2. നെയ്യ് -1 ടീസ്പൂൺ
3. ഉപ്പ് - ആവശ്യത്തിന്

സമൂസ തയ്യാറാക്കുന്ന വിധം ‌

മസാല ഉണ്ടാക്കാനായി ഒരു പാനിൽ എണ്ണ ചൂടാക്കി സവാള, ഇഞ്ചി, പച്ചമുളക് എന്നിവ വഴറ്റുക. അതിലേക്ക് ഉപ്പ്, മഞ്ഞൾ പൊടി എന്നിവയിട്ട് വഴറ്റുക. അതിലേക്ക് വേവിച്ച ഗ്രീൻ പീസ് ഇട്ട് ഇളക്കുക. ഗരം മസാല വഴറ്റിയതിനുശേഷം ഉരുളക്കിഴങ്ങ്‌ ഉടച്ചു ചേർക്കുക. നന്നായി ഇളക്കി യോജിപ്പിച്ചു ഒരു 2 മിനിറ്റ് ഇളക്കുക. അതിലേക്കു മല്ലിയില ഇട്ടു തീ അണക്കുക. സമൂസ ഷീറ്റ് ഉണ്ടാക്കാൻ മൈദയും ഉപ്പും നെയ്യും ഒന്നിച്ചിട്ട് ഇളക്കി കുറേശ്ശെയായി വെള്ളം ചേർത്ത് ചപ്പാത്തി മാവിന്റെ പാകത്തിൽ കുഴക്കുക. ഒരു പാത്രത്തിൽ 2 ടേബിൾ സ്പൂൺ മൈദ കുറച്ചു വെള്ളം എന്നിവ ചേർത്ത് പേസ്റ്റ് രൂപത്തിൽ ആക്കുക. കുഴച്ചു വച്ച മാവിൽ നിന്ന് ചെറിയ ഉരുളകൾ എടുത്തു പൂരി യെക്കാളും കുറച്ചു വലിപ്പത്തിൽ കട്ടി കുറഞ്ഞു പരത്തി എടുക്കുക. അതിനു ശേഷം ഒരു ദോശക്കല്ല് ചൂടാക്കി പരത്തി എടുത്ത ഷീറ്റ് ഒരു സെക്കന്റ്‌ രണ്ടു ഭാഗവും ചൂടാക്കി എടുക്കുക. ഇങ്ങനെ ആക്കുന്ന ഷീറ്റ് വേണമെങ്കിൽ ഫ്രിഡ്‌ജിൽ വച്ചു പിന്നീട് സമൂസ ഉണ്ടക്കാനും ഉപയോഗിക്കാം. ചൂടാക്കി എടുത്ത ഷീറ്റ് കോൺ ഷേപ്പിൽ മടക്കി വെച്ച്  മൈദ പേസ്റ്റ് വച്ചു ഒട്ടിക്കുക. അതിലേക്കു മസാല ഫില്ലിംഗ് ആക്കുക. എന്നിട്ട് മുകളിൽ നിന്ന് താഴേക്കു മടക്കി വീണ്ടും മൈദ പേസ്റ്റ് ഒട്ടിക്കുക. എണ്ണ നന്നായി ചൂടായാൽ മീഡിയം തീയിൽ വച്ചു ഗോൾഡൻ കളർ ആകുന്ന വരെ വറുത്തെടുക്കുക.

മാതള നാരങ്ങ ചട്ണി  ഉണ്ടാക്കുന്ന വിധം 

മാതള നാരങ്ങ -1 കപ്പ്‌
വെളുത്തുള്ളി -3 എണ്ണം
ഇഞ്ചി -1 ചെറിയ കഷ്ണം
ജീരകം -1/4 ടീസ്പൂൺ
ചുവന്ന മുളക് -3 എണ്ണം
ഉപ്പ് -ആവശ്യത്തിന്

ഇതെല്ലാം ഒരു പാനിൽ കുറച്ചു വെള്ളം ഒഴിച്ച് ഒരു 7 to 10 മിനിറ്റ് വേവിക്കുക. അതിനു ശേഷം നന്നായി തണുത്തിട്ട് മിക്സിയുടെ ജാറിൽ നല്ല സോഫ്റ്റ്‌ ആയി അരച്ചെടുക്കുക.

വായനക്കാർക്കും റെസിപ്പികൾ പങ്കുവെക്കാം

Content Highlights: baker style samosa and pomegranate chutney