മൂന്നുവർഷത്തെ താഴ്ചയിൽ ഗോതമ്പുശേഖരം; ആട്ടയടക്കമുള്ളവയുടെ കയറ്റുമതി നിരോധിച്ചു, wheat storage, three year low, food

08 July 2022, 09:24 AM IST

ധാന്യശേഖരം 15 വർഷത്തെ താഴ്ചയിലെന്ന് കോൺഗ്രസ്

പ്രതീകാത്മക ചിത്രം | Photo: A.F.P

ന്യൂഡല്‍ഹി: രാജ്യത്തെ ഗോതമ്പുശേഖരം മൂന്നുവര്‍ഷത്തെ താഴ്ചയിലെത്തിയതിനു പിന്നാലെ ആട്ടയും മൈദയും റവയും ഉള്‍പ്പെടെയുള്ള ഉത്പന്നങ്ങള്‍ക്ക് കേന്ദ്രസര്‍ക്കാര്‍ കയറ്റുമതിനിയന്ത്രണം ഏര്‍പ്പെടുത്തി.

ഫുഡ് കോര്‍പ്പറേഷന്‍ ഓഫ് ഇന്ത്യയില്‍(എഫ്.സി.ഐ.) ശേഖരം വന്‍തോതില്‍ കുറഞ്ഞതിനെത്തുടര്‍ന്ന് മേയ് 13-ന് ഗോതമ്പുകയറ്റുമതി നിരോധിച്ചിരുന്നു. പൊതുവിതരണ കേന്ദ്രങ്ങളിലൂടെയുള്ള സൗജന്യവിതരണം കൂടിയതും കാലാവസ്ഥ അനുകൂലമല്ലാത്തതിനാല്‍ ഉത്പാദനം ഇടിഞ്ഞതും നിയന്ത്രണങ്ങള്‍ക്ക് കാരണമായതായി കേന്ദ്രസര്‍ക്കാര്‍ വൃത്തങ്ങള്‍ അറിയിച്ചു.

രാജ്യത്തെ ധാന്യശേഖരം 15 വര്‍ഷത്തെ ഏറ്റവും കുറഞ്ഞ നിരക്കിലെത്തിയിരിക്കയാണെന്നും പ്രതിശീര്‍ഷ ശേഖരം 50 വര്‍ഷത്തെ കുറഞ്ഞ നിരക്കിലാണെന്നും കോണ്‍ഗ്രസ് ആരോപിച്ചു. ധാന്യപ്രതിസന്ധിയുടെ നിജസ്ഥിതി രാജ്യത്തെ അറിയിക്കാന്‍ ധവളപത്രം പുറപ്പെടുവിക്കണമെന്ന് കോണ്‍ഗ്രസ് നേതാവ് ദീപേന്ദര്‍ സിങ് ഹൂഡ പത്രസമ്മേളനത്തില്‍ ആവശ്യപ്പെട്ടു.

ജൂണ്‍ അവസാനംവരെ 3.11 കോടി ടണ്‍ ഗോതമ്പാണ് എഫ്.സി.ഐ. ശേഖരത്തിലുള്ളത്. 2019, 2020, 2021 വര്‍ഷങ്ങളില്‍ ഇത് യഥാക്രമം 3.78, 3.67, 3.51 കോടി ടണ്‍ എന്ന കണക്കിലായിരുന്നു. എങ്കിലും നിര്‍ബന്ധമായും ഉണ്ടായിരിക്കേണ്ട 76 ലക്ഷം ടണ്‍ ശേഖരത്തെക്കാള്‍ കൂടുതലാണിപ്പോഴുള്ളതെന്നും ഭയക്കേണ്ട സ്ഥിതിയില്ലെന്നും എഫ്.സി.ഐ. വൃത്തങ്ങള്‍ പറഞ്ഞു.

യുക്രൈന്‍ യുദ്ധം തുടങ്ങിയതിനുപിന്നാലെ അന്താരാഷ്ട്രതലത്തില്‍ ഗോതമ്പുള്‍പ്പെടെയുള്ള ധാന്യങ്ങള്‍ക്ക് വന്‍തോതില്‍ വില ഉയര്‍ന്നിരുന്നു. ക്വിന്റലിന് അന്താരാഷ്ട്ര വിപണിയില്‍ 3500 രൂപയിലെത്തിയപ്പോള്‍ ഇന്ത്യയിലെ തറവില 2000 രൂപയായിരുന്നു. ഇതുകാരണം, കര്‍ഷകര്‍ സ്വകാര്യസ്ഥാപനങ്ങള്‍ക്ക് ഗോതമ്പ് നല്‍കിയതോടെ സംഭരണം കുത്തനെ കുറഞ്ഞു.

Content Highlights: wheat storage, three year low, food

ഇത് പരസ്യ ഫീച്ചറാണ്. മാതൃഭൂമി.കോം ഈ പരസ്യത്തിലെ അവകാശവാദങ്ങളെ ഏറ്റെടുക്കുന്നില്ല. പരസ്യത്തിൽ ഉന്നയിക്കുന്ന അവകാശവാദങ്ങൾക്ക് ഉപോദ്ബലകമായ വസ്തുതകൾ പരസ്യദാതാക്കളുമായി ബന്ധപ്പെട്ട് പരിശോധിച്ചു ബോധ്യപ്പെട്ട ശേഷം മാത്രം ഇടപാടുകൾ നടത്തുക. പരാതികൾ ഉണ്ടെങ്കിൽ ഇവിടെ രേഖപ്പെടുത്താവുന്നതാണ്. (feedback@mpp.co.in)