ദോശയോട് ക്രൂരതയെന്ന് വിമര്‍ശനം ; ഇത് വേറിട്ട പാചകപരീക്ഷണം , Ice Cream,dosa, Bizarre Combination, Foodies,food

02 February 2023, 09:26 PM IST

ഭക്ഷണത്തില്‍ എന്ത് പരീക്ഷണമായാലും ഒരു കൈ നോക്കാമെന്ന് ചിന്തിക്കുന്നവരാകും ചില ഭക്ഷണപ്രിയർ. ഭക്ഷണവുമായി ബന്ധപ്പെട്ട വ്യത്യസ്തയുള്ള വീഡിയോകള്‍ക്ക് നല്ല സ്വീകരണവും ലഭിക്കാറുണ്ട്. അത്തരത്തിലൊരു വീഡിയോയാണ് ഇപ്പോള്‍ സാമൂഹികമാധ്യമങ്ങളില്‍ വൈറലായിരിക്കുന്നത്. ഇതുവരെ കാണാത്തൊരു പാചകപരീക്ഷണമാണ് വീഡിയോയില്‍ കാണുന്നത്. ദോശയിലാണ് പരീക്ഷണം നടക്കുന്നത്.

ഐസ്‌ക്രീം ദോശയാണ് ഈ വിഭവം. ഇതിനായി പതിവ് ദോശയുണ്ടാക്കുന്നത് പോലെയുള്ള ഒരുക്കങ്ങളാണ് നടത്തുന്നത്. ആദ്യം ദോശക്കല്ലിലേയ്ക്ക് ബട്ടറും നെയ്യും പുരട്ടുന്നു. ശേഷം ദോശയ്ക്കുള്ള മാവെടുത്ത് പരത്തി വലിയൊരു ദോശ ചുടുന്നു. ഇനിയാണ് പ്രധാന ചേരുവയെത്തുന്നത്. വെന്തുപാകമായി വരുന്ന ദോശയിലേയ്ക്ക് ഐസ്‌ക്രീം സ്‌കൂപ്പുകള്‍ ചേര്‍ക്കുന്നത് വീഡിയോയില്‍ കാണാം.

പിന്നീട് ഇതിലേയ്ക്ക് ജാമും ചോക്ലേറ്റ് സോസും ചേര്‍ത്ത് ദോശ അലങ്കരിക്കുന്നു. അവസാനം മനോഹരമായി അലങ്കരിച്ചു വെച്ചിരിക്കുന്ന ഐസ്‌ക്രീം ദോശ കാണാന്‍ കഴിയും. ട്വിറ്ററിലൂടെ ആണ് വീഡിയോ പ്രചരിക്കുന്നത്.

രണ്ട് ലക്ഷത്തിലധികം പേരാണ് ഇതിനകം വീഡിയോ കണ്ടുകഴിഞ്ഞത്. നിരവധി പേര്‍ വീഡിയോയ്ക്ക് പ്രതികരണമറിയിച്ചെത്തിയിട്ടുണ്ട്. ദോശ പ്രേമികള്‍ വലിയ വിമര്‍ശനമാണ് ഉന്നയിച്ചിരിക്കുന്നത്. ദോശയോട് ഇങ്ങനെയൊരു ക്രൂരത വേണ്ടായിരുന്നുവെന്നും കമന്റുകളുണ്ട്.