ഓരോ കാലാവസ്ഥയ്ക്കും അനുയോജ്യമായ ഭക്ഷണരീതി സ്വീകരിക്കുന്നത് ശരീരത്തിന്റെ ആരോഗ്യം നിലനിര്‍ത്താന്‍ സഹായിക്കും. മഞ്ഞുകാലത്ത് ശരീരം പോഷണത്തിനൊപ്പം ചൂടും ആഗ്രഹിക്കുന്നു. അതിനാല്‍ രോഗപ്രതിരോധശേഷി വര്‍ധിപ്പിക്കുന്നതും ആരോഗ്യവും ഉന്മേഷവും പ്രദാനം ചെയ്യുന്നതുമായ ഭക്ഷണം കഴിക്കാന്‍ ശ്രദ്ധിക്കണം.
ശുദ്ധവും പ്രകൃതിദത്തവും എളുപ്പത്തില്‍ ദഹിക്കുന്നതുമായ ഭക്ഷണം ശരീരത്തിന്റെ രോഗപ്രതിരോധശേഷി വര്‍ധിപ്പിക്കുന്നു. ഉദാ: പഴങ്ങള്‍, പച്ചക്കറികള്‍, ഉണങ്ങിയ ഫലങ്ങള്‍, മുഴുധാന്യങ്ങള്‍, ഒപ്പം ചില സുഗന്ധവ്യഞ്ജനങ്ങളും.
കടുംനിറത്തിലുള്ള പഴങ്ങളും പച്ചക്കറികളും ധാരാളം ആന്റി ഓക്സിഡന്റുകളും വിറ്റാമിനുകളുംകൊണ്ട് സമ്പുഷ്ടമാണ്. ഉദാ: തക്കാളി, ചുവന്ന ചീര, വയലറ്റ് കാബേജ്, മത്തങ്ങ, നാരങ്ങ, ഓറഞ്ച്. സിങ്ക് അടങ്ങിയ ഭക്ഷണം വൈറസ് അണുബാധയെ പ്രതിരോധിക്കാനുള്ള കഴിവ് വര്‍ധിപ്പിക്കും. ഉദാ: കടല്‍വിഭവങ്ങള്‍, ചീര, പയര്‍, നട്സ്. കൂടാതെ അയണ്‍, വൈറ്റമിന്‍ ബി-12 എന്നിവയടങ്ങിയ ഇലക്കറികള്‍, പാല്‍, മുട്ട, ചീസ്, കടല എന്നിവയും നല്ലതാണ്.
തണുപ്പുകാലത്ത് ശരീര താപനില ഉയര്‍ത്താന്‍ സഹായിക്കുന്ന ഭക്ഷണമാണ് മണ്ണിനടിയില്‍ വിളയുന്ന കിഴങ്ങുവര്‍ഗ്ഗങ്ങള്‍. ഉദാ: ഉരുളക്കിഴങ്ങ്, മധുരക്കിഴങ്ങ്, ചേന, ചേമ്പ്, കാരറ്റ്, റാഡിഷ്, സവാള, വെളുത്തുള്ളി, ഇഞ്ചി എന്നിവയും ധാന്യങ്ങളായ ഗോതമ്പ്, ബ്രൗണ്‍ റൈസ് എന്നിവയും. കുരുമുളക്, ഇഞ്ചി, വെളുത്തുള്ളി, മഞ്ഞള്‍പ്പൊടി, ഉലുവ, ചുവന്നുള്ളി എന്നിവ പാചകത്തിന് ഉപയോഗിക്കുന്നത് ജലദോഷം, ചുമ, കഫക്കെട്ട് എന്നിവയുടെ കാഠിന്യം കുറയ്ക്കും.
തണുപ്പുകാലമാണെങ്കിലും ദാഹം തോന്നിയില്ലെങ്കിലും 1.5-2 വരെ ലിറ്റര്‍ ശുദ്ധജലം കുടിക്കണം. ജലത്തിനൊപ്പം ചുക്കുകാപ്പി, ഗ്രീന്‍ ടീ, ഇഞ്ചി, പുതിന, തേന്‍ എന്നിവ ചേര്‍ന്ന ചായ, കുരുമുളകും മഞ്ഞള്‍പ്പൊടിയും ചേര്‍ത്ത പാല്‍ എന്നിവയും ഉപയോഗിക്കാം. കൂടാതെ വെജിറ്റബിള്‍ സൂപ്പ്, ചിക്കന്‍സൂപ്പ് എന്നിവ അത്താഴത്തിന് മുമ്പ് കഴിക്കുന്നത് നല്ലതാണ്. പപ്പായ, പൈനാപ്പിള്‍, ഉണക്കമുന്തിരി, ഈന്തപ്പഴം എന്നിവയും കഴിക്കാം.
ആരോഗ്യകരമായ ഭക്ഷണത്തിനൊപ്പം വ്യായാമവും പ്രധാനമാണ്. യോഗ, പ്രാണായാമം, സൂര്യ നമസ്‌കാരം എന്നിവ പരിശീലിക്കുന്നത് ശ്വസനം സുഗമമാക്കും. അരമണിക്കൂര്‍ ലഘുവ്യായാമവും ഏഴുമണിക്കൂര്‍ എങ്കിലും ശരിയായ ഉറക്കവും ഉറപ്പുവരുത്തണം.
വിവരങ്ങള്‍ക്ക് കടപ്പാട്: അനു മാത്യു, ഡയറ്റീഷ്യന്‍, എസ്.യു.ടി. ഹോസ്പിറ്റല്‍, പട്ടം
Content Highlight: winter food
