06 May 2023, 12:55 PM IST

1 min read

Read later

Representative Image| Photo: Canva.com

ഒന്നും ചെയ്യാന്‍ തോന്നാത്ത അവസ്ഥ, ഒരുപാട് കാര്യങ്ങള്‍ ചെയ്തു തീര്‍ക്കാനുണ്ടായിട്ടും ഒന്നിനും വയ്യെന്നുള്ള ഉന്മേഷമില്ലായ്മ, ഇത്തരം തോന്നലുകള്‍ അടിക്കടി വരാറുണ്ടോ? ഇതൊക്കെ നിസാരമായി തള്ളിക്കളയാന്‍ വരട്ടെ. ഇതെല്ലാം വിളര്‍ച്ചയുടെ ലക്ഷണമാകാം.ഹീമോഗ്ലോബിന്റെയും ചുവന്ന രക്താണുക്കളുടെയും അളവില്‍ ഗണ്യമായ കുറവുണ്ടാവുന്നതാണ് വിളര്‍ച്ച അഥവാ അനീമിയ എന്ന രോഗാവസ്ഥയ്ക്കിടയാക്കുന്നത്.

തളര്‍ച്ചയും ക്ഷീണവും തലവേദനയുമൊക്കെ ആണ് ഇതിന്റെ പ്രധാന ലക്ഷണങ്ങള്‍. ഭക്ഷണത്തില്‍ കൃത്യമായ മാറ്റം കൊണ്ടുവന്നാല്‍ മാത്രമേ നഷ്ടമായ ആരോഗ്യം വീണ്ടെടുക്കാന്‍ കഴിയുകയുള്ളൂ. ഹീമോഗ്ലോബിന്റെ അളവ് കൂട്ടാനായി ഡയറ്റില്‍ ഇവയുള്‍പ്പെടുത്താം.

എപ്പോഴും ക്ഷീണമാണെന്ന് സങ്കടം പറഞ്ഞിരിക്കുന്നവര്‍ നിര്‍ബന്ധമായി കഴിച്ചിരിക്കേണ്ടയൊന്നാണ് ചീര.അയണ്‍ ധാരാളം അടങ്ങിയ ചീര കഴിക്കുന്നത് ശരീരത്തിന്റെ മൊത്തം ആരോഗ്യത്തിനും നല്ലതാണ്. മുരിങ്ങയിലയും ഡയറ്റില്‍ ഉള്‍പ്പെടുത്തുന്നത് വിളര്‍ച്ചയെ തടയാന്‍ സഹായിക്കും.

കൂടാതെ നെല്ലിക്കയില്‍ അടങ്ങിയിരിക്കുന്ന ഇരുമ്പ് രക്തത്തിലെ ഹീമോഗ്ലോബിന്റെ അളവ് കൂട്ടാന്‍ സഹായിക്കും. ഓറഞ്ചും ഇരുമ്പിന്റെ മികച്ച സ്രോതസാണ്. കൂടാതെ അവയില്‍ വിറ്റാമിന്‍ സിയും അടങ്ങിയിട്ടുണ്ട്. വിറ്റാമിന്‍ സി ഇരുമ്പ് ആഗിരണം ചെയ്യാന്‍ സഹായിക്കും. ഇത് അനീമിയ ഉണ്ടാകാനുള്ള സാധ്യത കുറയ്ക്കും.

ബീറ്റ്‌റൂട്ട് കഴിക്കുന്നതും ഗുണം ചെയ്യും. ബീറ്റ്‌റൂട്ട് ആന്റിഓക്സിഡന്റുകളാല്‍ സമ്പന്നമാണ്. ഇരുമ്പ്, ഫോളിക്ക് ആസിഡ്, പൊട്ടാസ്യം, നാരുകള്‍ തുടങ്ങിയവയും ബീറ്റ്റൂട്ടില്‍ ധാരാളമായി അടങ്ങിയിരിക്കുന്നു. അതിനാല്‍ ഇവ പതിവായി കഴിക്കുന്നത് രക്തത്തിലെ ഹീമോഗ്ലോബിന്റെ അളവ് കൂട്ടും.

ഹീമോഗ്ലോബിന്റെ കുറവിന് ഏറ്റവും നല്ല പരിഹാരങ്ങളിലൊന്നാണ് മാതളം. കാത്സ്യം, ഇരുമ്പ്, അന്നജം, നാരുകള്‍ എന്നിവയുടെ കലവറയാണ്. മാതളത്തില്‍ അടങ്ങിയിരിക്കുന്ന വിറ്റാമിന്‍ സി ശരീരത്തിലെ ഇരുമ്പിന്റെ ആഗിരണം വര്‍ധിപ്പിച്ച് വിളര്‍ച്ച തടയുന്നു.

(ശ്രദ്ധിക്കുക: ആരോഗ്യ വിദഗ്ധന്റെയോ ന്യൂട്രീഷനിസ്റ്റിന്റെയോ ഉപദേശം തേടിയ ശേഷം മാത്രം ആഹാരക്രമത്തില്‍ മാറ്റം വരുത്തുക.)