ഉപഭോക്താവിന്റെ ഭക്ഷണത്തിന് പണമടച്ച് ജീവനക്കാരി, വീഡിയോ ഏറ്റെടുത്ത് സോഷ്യല്‍ മീഡിയ, Food,Viral video,McDonald

30 September 2020, 12:41 PM IST

നിങ്ങളുടെ ഓര്‍ഡറിന്റെ പണം താന്‍ അടക്കാമെന്നും, ഭക്ഷണം വാങ്ങണോ എന്ന് അമ്മയെ വിളിച്ച് ചോദിച്ചത് വളരെ വലിയ കാര്യമാണെന്നുമാണ് ഇനിയ പറഞ്ഞത്.

വീഡിയോയിൽ നിന്ന് | Photo: twitter.com|Josh_U_R_Artist

ഉപഭോക്താവിന്റെ ഭക്ഷണത്തിന് പണമടച്ച ഈ പെൺകുട്ടിയാണ് ഇപ്പോൾ സോഷ്യൽ മീഡിയയിലെ താരം. ജോഷ്വ ഹെന്റി എന്ന കസ്റ്റമറാണ് പെൺകുട്ടിയുടെ വീഡിയോ ട്വിറ്ററിൽ പോസ്റ്റ് ചെയ്തത്. ഈ ദിനത്തിലെ നന്മ എന്നാണ് വീഡിയോക്ക് പലരും കമന്റ് നൽകുന്നത്.

വെസ്റ്റ് മിഡ്ലൻഡിലെ ഒരു മക്ഡോണാൾഡ് ഔട്ടലറ്റിലെ ജീവനക്കാരിയാണ് ഇനിയ വെങ്കേരെ എന്ന ഈ പെൺകുട്ടി. ഹെന്റി ഇവിടെ ഭക്ഷണം കഴിക്കാനെത്തിയപ്പോഴാണ് സംഭവം. തനിക്കുള്ള ഭക്ഷണം ഓർഡർ നൽകി കഴിഞ്ഞ് തന്റെ അമ്മയ്ക്ക് എന്തെങ്കിലും കഴിക്കാൻ ആവശ്യമുണ്ടോ എന്ന് ഫോൺ ചെയ്ത് അന്വേഷിക്കുകയും ചെയ്തു. പിന്നീട് ബില്ലടക്കാനായി എത്തിയപ്പോഴുള്ള ഇനിയയുടെ പ്രതികരണമാണ് തന്നെ അത്ഭുതപ്പെടുത്തിയതെന്നാണ് ഹെന്റി വീഡിയോക്കൊപ്പം കുറിക്കുന്നത്. ഇന്ന് നിങ്ങളുടെ ഓർഡറിന്റെ പണം താൻ അടക്കാമെന്നും, ഭക്ഷണം വാങ്ങണോ എന്ന് അമ്മയെ വിളിച്ച് ചോദിച്ചത് വളരെ വലിയ കാര്യമാണെന്നുമാണ് ഇനിയ പറഞ്ഞത്.

ആ വാക്കുകൾ തന്നെ വളരെയധികം സ്പർശിച്ചുവെന്നും, ഈ നന്മയ്ക്ക് എപ്പോഴെങ്കിലും തിരിച്ചൊരു സമ്മാനം താൻ നൽകുമെന്നും ഹെന്റി കുറിക്കുന്നു. ഒരു ലക്ഷത്തിലധികം ആളുകൾ വീഡിയോ കണ്ടു കഴിഞ്ഞു.

Content Highlights:employee pays for customer’ s mealwins praise for her kindness