സീസണല്ലാതിരുന്നിട്ടും കാഴ്ചയില്‍ പുതുപുത്തന്‍ പോലിരിക്കുന്ന പച്ചക്കറികളും ധാന്യങ്ങളും നമുക്കു ലഭിക്കുന്നത് ശ്രദ്ധിച്ചിട്ടില്ലേ. അവ അപ്രകാരം തോന്നിപ്പിക്കുന്നതിന് ചിലപ്പോള്‍ കൃത്രിമനിറങ്ങള്‍ ചേര്‍ത്തിരിക്കുന്നതു കൊണ്ടാകാം.

ഇന്ത്യന്‍ ഭക്ഷണരീതിയില്‍ ഒഴിച്ചുകൂടാനാവാത്ത ഒന്നാണ് ഗ്രീന്‍പീസ്. ഗ്രീന്‍പീസിന്റെ പച്ചനിറം കണ്ട് പുതിയതാണെന്ന് തെറ്റിദ്ധരിച്ച്  കടയില്‍നിന്ന് വാങ്ങിക്കൊണ്ടുവരാറുണ്ട്. വീട്ടിലെത്തി കറിവെച്ചു കഴിയുമ്പോഴാണ് നമ്മള്‍ കബളിപ്പിക്കപ്പെട്ട വിവരം അറിയുക. എന്നാല്‍, ഗ്രീന്‍പീസില്‍ കൃത്രിമനിറം ചേര്‍ത്തിട്ടുണ്ടോയെന്ന് അറിയാന്‍ എളുപ്പവഴി വിവരിക്കുകയാണ് ഫുഡ് സേഫ്റ്റി ആന്‍ഡ് സ്റ്റാന്‍ഡാര്‍ഡ്‌സ് അതോറിറ്റി ഓഫ് ഇന്ത്യ(എഫ്.എസ്.എസ്.എ.ഐ.) വീഡിയോയിലൂടെ. തങ്ങളുടെ സാമൂഹികമാധ്യമങ്ങളിലെ പേജുകളിലൂടെയാണ് എഫ്.എസ്.എസ്.എ.ഐ. ഈ വീഡിയോ പങ്കുവെച്ചിരിക്കുന്നത്. 

ഗ്രീന്‍ പീസിലെ കൃത്രിമനിറം കണ്ടുപിടിക്കുന്നതെങ്ങനെ?

ഒരു ഗ്ലാസില്‍ മുക്കാല്‍ ഭാഗത്തോളം വെള്ളമെടുക്കുക. ഇതിലേക്ക് കുറച്ച് ഗ്രീന്‍പീസ് ഇടുക. അരമണിക്കൂറിനുശേഷം ഗ്ലാസിലെ വെള്ളം സ്പൂണ്‍ ഉപയോഗിച്ച് ഇളക്കുക. അപ്പോള്‍ വെള്ളത്തിന്റെ നിറം മാറുന്നുണ്ടെങ്കില്‍ കൃത്രിമ നിറം ചേര്‍ത്തിട്ടുണ്ടായിരിക്കും. നിറം മാറുന്നില്ലെങ്കില്‍ മായം കലരാത്ത ഗ്രീന്‍പീസായിരിക്കും നിങ്ങളുടെ കൈവശമുള്ളത്.

Content highlights: are your green peas sprayed with artificial colour find out here