ഹൈറേഞ്ചിലെ ഭൂമി വീണ്ടും വിറച്ചല്ലോ. ചെറിയ വിറയൽ അല്ല. റിക്ടർ സ്കെയിലിൽ മൂന്നോളം തീവ്രതയുണ്ടായി. ഉറവെടുത്തത് ഏറെ ആഴത്തിൽനിന്നാണ്. മുഴക്കത്തിന്റെ അകമ്പടിയും ഉണ്ടായി. എന്നുവെച്ചാൽ അടിയിലെ കട്ടിപ്പാറ ഉടഞ്ഞു! വലിയ അണക്കെട്ടുകളുടെ ജലാശയങ്ങൾ രൂപപ്പെടുമ്പോൾ ആ പരിസരത്ത് ഇങ്ങനെ വിറയൽ ഉണ്ടാകാറുണ്ട്. അറുപതുകളുടെ ആദ്യത്തിൽ കൊയ്‌ന അണക്കെട്ടുമായി ബന്ധപ്പെട്ട് ഞാൻ ഇത് നേരിട്ട് നിരീക്ഷിച്ചിട്ടുണ്ട്. 
അന്നെനിക്ക് അഖിലലോക ഭൂചലന മാപന ശൃംഖലയുടെ (WWSS) പുണെയിലെ ഉപകരണത്തിന്റെ ചുമതല ഉണ്ടായിരുന്നു. (ഇതേകാലത്തു തന്നെയായിരുന്നു ചൈന അവരുടെ ആദ്യത്തെ അണുസംയോജനബോംബിന്റെ പരീക്ഷണം നടത്തിയതും. അതിന്റെ തരംഗങ്ങളും ഉപരിതല തരംഗങ്ങൾ ആയിരുന്നതുകൊണ്ടാണ് രണ്ടുകാര്യവും ചേർത്ത് ചിന്തിക്കാനും ഓർക്കാനും ഇടയായത്.)
വെള്ളത്തിന്റെ ഭാരംകൊണ്ട് അടിയിലെ പാറകളിൽ ചിലത് അമർന്ന് ഉടഞ്ഞതാണ് കൊയ്‌നയിലെ ചലനങ്ങൾക്കു കാരണം. ഏറെ ആഴത്തിലായിരുന്നില്ല സംഭവം. ജലസംഭരണി മുഴുവനായി നിറഞ്ഞതോടെ, ഉടയാനുള്ള പാറയൊക്കെ ഉടഞ്ഞുകഴിഞ്ഞതിനാൽ, ഈ ചലനങ്ങൾ നിലയ്ക്കുകയും ചെയ്തു.
ഇവിടെ ഇപ്പോൾ ജലസംഭരണികളൊക്കെ ഉണ്ടായി ദശകങ്ങൾക്കുശേഷമാണ് ചലനങ്ങൾ എന്നു മാത്രമല്ല, അവ വളരെ ആഴത്തിൽനിന്നാണ് പുറപ്പെടുന്നതും. അപ്പോൾ ഇവിടത്തെ കാര്യങ്ങൾക്ക് എന്തെങ്കിലും പ്രത്യേകത ഉണ്ടോയെന്ന് ആലോചിക്കേണ്ടിവരുന്നു.
ഉണ്ട്, കേരളം എന്ന ഭൂമി രൂപംകൊണ്ടത് അസാധാരണ രീതിയിലാണ്. അതിവിദൂര ഭൂതകാലത്ത് ഈ ഭൂഭാഗം ഉണ്ടായിരുന്നില്ല. പശ്ചിമഘട്ടം എന്ന നെടുങ്കൻ അഗ്നിപർവതം പൊങ്ങിപ്പിറന്നതിന്റെ ഭാഗമായി ലാവ ഒഴുകി കടൽ നികന്നാണ് ഇതുണ്ടായത്. ക്രമേണ ശക്തികുറഞ്ഞുവന്നു എങ്കിലും, തുടരെത്തുടരെ ഒരുപാട് സ്ഫോടനങ്ങൾ ഉണ്ടായി. പോകെപ്പോകെ ഇവയുടെ ഇടവേള വർധിച്ചും വന്നു.
ഓരോ ഇടവേളയും കോടാനുകോടി വർഷങ്ങൾ നീണ്ടതായിരുന്നതുകൊണ്ട് അന്നന്നു നിലവിലിരുന്ന ഉപരിതലങ്ങളിൽ സസ്യങ്ങളും മണ്ണും പരസ്പരം സഹകരിച്ച് ഉരുവപ്പെട്ടു. ഓരോ തവണയും ഈ ജൈവസമ്പത്തിനു മേലെയാണ് അടുത്ത ലാവാപ്രവാഹം വന്നത്.
അതായത്, പല തട്ടുകളുള്ള സാൻഡ്‌വിച്ച് എന്ന തീറ്റപ്പണ്ടത്തിന്റെ പ്രകൃതത്തിലാണ് കേരളത്തിന്റെ അസ്തിവാരം. ഇത് മൊത്തമായി ഏതാനുമായിരം അടി ഉയരത്തിൽനിന്ന് സമുദ്രനിരപ്പിലേക്ക് ചെരിഞ്ഞു കിടപ്പുമാണ്.
ഈ പാറയടരുകളിൽ മുകളിലത്തേത് ജലഭാരംകൊണ്ട് ഉടഞ്ഞ് വെള്ളം അടിയിൽ കടക്കാൻ ഇടയായാൽ എന്തുണ്ടാകുമെന്ന് എളുപ്പം ആലോചിക്കാവുന്നതേയുള്ളൂ: അടരുകൾ തമ്മിലുള്ള പിടിത്തം അയയും! അതോടെ, മഹാ ജലസംഭരണികളുടെ ഭാരം വഹിക്കുന്ന മുകളടര് വഴുതിയിറങ്ങി താഴോട്ടിറങ്ങിപ്പോരും!!
ഈ ഭൂമിയിലെ ഏറ്റവും വലിയ ഉരുൾപൊട്ടൽ ആയിരിക്കും അത്! വിശേഷബുദ്ധിയുള്ള മനുഷ്യരായ നാം ഈ സാധ്യത കണ്ടില്ലെന്നു നടിക്കുന്നതാണോ നല്ലത്? അതോ, അതിന് വല്ലവിധവും തടയിടാൻ ശ്രമിക്കുന്നതോ?
വഴിയില്ലാതെ ഇല്ല. ചെറിയ സ്ഫോടനങ്ങൾ കൃത്രിമമായി ഉണ്ടാക്കി ഭൂകമ്പമാപിനി ഉപയോഗിച്ച് ഭൂമിക്കടിയിലെ വിവിധ ആഴങ്ങളിലെ ഘടനാവിശേഷങ്ങൾ അറിയാം. എണ്ണപര്യവേക്ഷണത്തിന് ഉപയോഗിക്കുന്ന സാമഗ്രികൊണ്ട് ആഴങ്ങളിലെ സാംപിളുകൾ ശേഖരിച്ച് പരിശോധിക്കാം. പാറകൾക്കിടയിലും മുകളിലുമുള്ള വ്യാമർദങ്ങളുടെ അളവ് കണക്കാക്കാം. മുകളിലുള്ള ജലഭാരം പരിധിക്കകത്ത് നിർത്താൻ ആവശ്യമായ ക്രമീകരണങ്ങൾ ചെയ്യാം.
ഇത് ഉടനെ ചെയ്തില്ലെങ്കിൽ ഇവിടെ കാര്യം നോക്കാൻ ആരെങ്കിലും ഉണ്ട് എന്നു നാളെ ആരും പറയില്ല. (കേരളത്തിലെ നാലിലൊന്ന് ജനസംഖ്യ ഇല്ലാതാകും എന്നതുകൊണ്ട് പറയാൻ ആരുംതന്നെ ഉണ്ടായില്ലെന്നും വരാം!)
ഇതിനുമുമ്പ് രണ്ടുതവണ ഞാൻ ഈ കാര്യങ്ങൾ ലേഖനങ്ങളിലൂടെ പറഞ്ഞിരുന്നതാണ്. രാഷ്ട്രീയവിവാദമാക്കാൻ വക ഇല്ലാത്തതുകൊണ്ടാവാം, ആരും ശ്രദ്ധിച്ചില്ല.
ഇപ്പോഴെങ്കിലും കക്ഷിരാഷ്ട്രീയം മറന്ന് അല്പം ശാസ്ത്രീയമായി ആലോചിക്കുകയേ വേണ്ടൂ. അല്ല, മുന്നറിയിപ്പിന്റെ കാഹളം മുഴങ്ങുന്നതുപോലും അവഗണിക്കാനാണ് ഭാവമെങ്കിൽ....!