നോവായിരുന്നു നിർഭയ. ഡൽഹിയിൽ ബസിനുള്ളിൽ പിച്ചിച്ചീന്തപ്പെട്ടവൾ. പെരുമ്പാവൂരിലെ പെൺകുട്ടിയും തീവണ്ടിയിൽ ആക്രമിക്കപ്പെട്ട് ബലാത്സംഗത്തിനിരയായി മരിച്ച പെൺകുട്ടിയും നീറുന്ന ഒാർമകളാണ്. അതിക്രൂരമായി ജീവനെടുത്തപ്പോഴും സത്യത്തിന്റെ ഒരു അടയാളം അവിടെ ബാക്കി നിന്നിരുന്നു. നഖങ്ങൾക്കിടയിൽ ജനിതകതന്മാത്രകളായി അവ ഒളിച്ചിരുന്നു. ഡി.എൻ.എ. എന്ന പേരിൽ ആ തെളിവുകൾ ഒട്ടേറെ കുറ്റകൃത്യങ്ങൾക്ക് ഉത്തരം കണ്ടെത്തി. സംശയങ്ങൾക്ക് നിവാരണമുണ്ടാക്കി. സാഹചര്യത്തെളിവിനപ്പുറം രക്തംമുതൽ മുടിവരെ ശാസ്ത്രതെളിവായി. ദൃക്‌സാക്ഷികളില്ലാത്ത കേസിൽ ഡി.എൻ.എ. പ്രൊഫൈലിങ് അഥവാ ഡി.എൻ.എ. ഫിഗർപ്രിന്റിങ് സത്യമുദ്രയാവുകയാണ്.
കൊലപാതകം, ബലാത്സംഗം തുടങ്ങി പിതൃത്വപരിശോധനയ്ക്കടക്കം ഡി.എൻ.എ. സാംപിൾ ഉപയോഗിക്കുന്നു. ഡി.എൻ.എ. എന്ന ചുറ്റുഗോവണിയുടെ സത്യം ആർക്കും ഒളിപ്പിക്കാനാകില്ല.

കരഞ്ഞുണങ്ങിയ കണ്ണുകൾ

തീവണ്ടിയിൽവെച്ച് ആക്രമിക്കപ്പെടുകയും പിന്നീട് മരിക്കുകയുംചെയ്ത പെൺകുട്ടി. പെരുമ്പാവൂരിലെ മറ്റൊരു പെൺകുട്ടി, കേരളം കണ്ട അതിക്രൂരമായ കൊലപാതകങ്ങൾ.  ദൃക്‌സാക്ഷികളില്ലാത്ത  രണ്ടുകേസിലും പോലീസ് ആശ്രയിച്ചത് ശാസ്ത്രീയ തെളിവുകളെയായിരുന്നു. ഇരുകേസിലും ഡി.എൻ.എ.ഫലം നിർണായകമായി. നിയമത്തിന്റെ നൂലിഴയിലൂടെ വധശിക്ഷയിൽനിന്ന് ഒരു കേസിലെ പ്രതി ഗോവിന്ദച്ചാമി രക്ഷപ്പെട്ടെങ്കിലും ഡി.എൻ.എ. കൃത്യമായ സത്യം രേഖപ്പെടുത്തിയിരുന്നു. ഡി.എൻ.എ. പരിശോധിച്ചത് തിരുവനന്തപുരം ഫൊറൻസിക് ലാബിലായിരുന്നു; മുൻ സംസ്ഥാന ഫൊറൻസിക് ഡയറക്ടർ ഡോ. ആർ.ശ്രീകുമാറിന്റെ നേതൃത്വത്തിൽ. 2011 ഫെബ്രുവരി ഒന്നിന് വൈകീട്ട് അഞ്ചരയുടെ എറണാകുളം-ഷൊർണൂർ പാസഞ്ചറിലെ ലേഡീസ് കമ്പാർട്ട്‌മെന്റിലാണ് പെൺകുട്ടി ആക്രമിക്കപ്പെട്ടത്. ട്രാക്കിലേക്ക് തലയിടിച്ചുവീണ പെൺകുട്ടിയെ അതിക്രൂരമായി ബലാത്സംഗംചെയ്തു. പെൺകുട്ടിയുടെ ശരീരഭാഗങ്ങളിൽക്കണ്ട പുരുഷബീജവും നഖത്തിനുള്ളിൽനിന്ന് കിട്ടിയ തൊലിയും ഗോവിന്ദച്ചാമിയുടേതാണെന്ന് ഡി. എൻ.എ. പരിശോധന തെളിയിച്ചു. അയാളുടെ ബീജത്തിന്റെ സാന്നിധ്യം ഇരയുടെ ശരീരത്തിലും വസ്ത്രത്തിലും കണ്ടെത്തി. 

നിർഭയ സംഭവത്തോടാണ് പെരുമ്പാവൂരിലെ പെൺകുട്ടിയുടെ വധം താരതമ്യംചെയ്തത്. കൊലയാളിയുടെ ഡി.എൻ.എ. വിവരങ്ങൾ പോലീസിനുലഭിച്ചത് നിർണായക വഴിത്തിരിവായി. പെൺകുട്ടിയുടെ കൈവിരലിൽനിന്ന് ലഭിച്ച രക്തക്കറയിലെ ഡി.എൻ.എ.യും വസ്ത്രത്തിൽനിന്ന് ലഭിച്ച ഉമിനീരിലെ ഡി.എൻ.എ.യും തമ്മിൽ ഘടനയിൽ സാമ്യമുണ്ടെന്ന ഫലം മുന്നോട്ടുനയിച്ചു. 

അന്വേഷണം മറുനാട്ടുകാരിലേക്കും അസം സ്വദേശിയായ അമീറുളിലേക്കും നീണ്ടു. പിടിയിലായ അമീറുളിന്റെ ഡി.എൻ.എ. സാംപിൾ ശേഖരിച്ച് പരിശോധനയ്ക്കയച്ചു. പ്രതി ഇയാൾതന്നെയെന്ന് തെളിഞ്ഞു. ഇയാളിൽനിന്ന്‌ ശേഖരിച്ച മൂന്ന് ഡി. എൻ.എ. സാംപിളുകളും ഒന്നാണെന്ന് തിരുവനന്തപുരം ഫൊറൻസിക് ലാബ് ഉറപ്പിച്ചു. 
ഇരുകേസിലും വഴിത്തിരിവായത്‌ ഡി.എൻ.എ. ആയിരുന്നുവെന്ന് ഡോ. ആർ.ശ്രീകുമാർ പറഞ്ഞു. ശിക്ഷാവിധികളിൽ ഏറെയും ഡി.എൻ.എ. പ്രധാന തെളിവായി മാറിക്കഴിഞ്ഞു. 

13 വർഷം ‘ഒളിച്ചിരുന്ന’ കൊലയാളി

കട്ടപ്പനയിലെ അമ്പതുവയസ്സുകാരിയെ ബലാത്സംഗംചെയ്തുകൊന്ന പ്രതി ‘ഒളിച്ചിരുന്നത്’ 13 വർഷം. 2008 ഓഗസ്റ്റിലാണ് കാഞ്ചിയാർ കൈപ്പറ്റയിലെ 50 വയസ്സുകാരി ക്രൂരമായ ബലാത്സംഗത്തിനിരയായി കൊല്ലപ്പെട്ടത്. ലോക്കൽ പോലീസിന്റെ അന്വേഷണത്തിൽ പ്രതിയെ പിടിക്കാൻ കഴിഞ്ഞില്ല. 2008 ഒക്ടോബറിൽ കേസ് ക്രൈംബ്രാഞ്ച് ഏറ്റെടുത്തു. അന്വേഷണം നീണ്ടു. പിന്നീട് ഇടുക്കി ക്രൈംബ്രാഞ്ച് എസ്.പി. പി.കെ. മധുവും സംഘവും അന്വേഷണം ഏറ്റെടുത്തു. ഇടുക്കി ക്രൈം ബ്രാഞ്ച് ഇൻസ്പെക്ടർ ഷിന്റോ പി. കുര്യനും ടീമും ഫൊറൻസിക് റിപ്പോർട്ടുകളുടെ അടിസ്ഥാനത്തിൽ തെളിവുകൾ ശേഖരിച്ചു. സ്ത്രീയുടെ വസ്ത്രത്തിൽനിന്ന്  ശുക്ലം കിട്ടിയിരുന്നു. ഇതിന്റെ ഡി.എൻ.എ. കണ്ണൂർ ഫൊറൻസിക് ലാബിൽ എത്തിച്ചു. പ്രതി ഗിരീഷ് ഉൾപ്പെടെ കൊലപാതകത്തിൽ പങ്കുണ്ടെന്ന് സംശയിക്കുന്ന 19 പേരുടെ പട്ടിക പോലീസ് തയ്യാറാക്കിയിരുന്നു. അവരുടെ രക്തസാംപിളിൽനിന്ന് ഡി.എൻ.എ. എടുത്തു. അതിലൊന്ന് സ്ത്രീയിൽനിന്ന് കിട്ടിയ ഡി.എൻ.എ.യുമായി യോജിച്ചു. അത് കൽക്കൂന്തൽ ഈട്ടിത്തോപ്പ് പതാലിപ്ലാവിൽ ഗിരീഷിന്റെ(38)തായിരുന്നു. ബലാത്സംഗത്തിനിടെ എതിർത്ത സ്ത്രീയെ പ്രതി കൊലപ്പെടുത്തിയതെന്ന് പോലീസ് കണ്ടെത്തി. പ്രതിയെ പിടിച്ചപ്പോൾ ബാക്കി 18 പേർ സംശയത്തിന്റെ മുൾമുനയിൽനിന്ന് രക്ഷപ്പെട്ടു. 

കുറ്റവാളി കാമുകനല്ല

ഡി.എൻ.എ. വഴിത്തിരിവായപ്പോൾ കാമുകൻ കുറ്റവിമുക്തനായി. പത്തനംതിട്ടയിൽ 2019-ൽ യുവതിയെ തൂങ്ങിമരിച്ചനിലയിൽ കണ്ടെത്തിയ സംഭവം കൊലപാതകമാണെന്ന് തെളിയിച്ചത് ക്രൈംബ്രാഞ്ചിന്റെ ശാസ്ത്രീയാന്വേഷണമായിരുന്നു. നിലവിൽ തിരുവനന്തപുരം കൺട്രോൾ റൂം എ.സി.പി.യും നേരത്തേ പത്തനംതിട്ട ക്രൈംബ്രാഞ്ച് ഡിവൈ.എസ്.പി.യുമായിരുന്ന ആർ.പ്രതാപൻ നായരാണ് അന്വേഷണത്തിൽ നിർണായക പങ്കുവഹിച്ചത്.  2019 ഡിസംബർ 15-നാണ് പത്തനംതിട്ട കോട്ടാങ്ങൽ പുല്ലാനിപ്പാറയിലെ കാമുകന്റെ വീട്ടിൽ താമസിച്ചുവരികയായിരുന്ന യുവതിയെ തൂങ്ങിമരിച്ച നിലയിൽ കണ്ടെത്തിയത്. പോസ്റ്റ്‌മോർട്ടത്തിൽ യുവതിയുടെ ശരീരത്തിൽ മുറിവുകൾ കണ്ടെത്തിയിരുന്നു. ബലപ്രയോഗം നടന്നിട്ടുണ്ടെന്ന് അന്വേഷണസംഘം സ്ഥിരീകരിച്ചു. കൂടെത്താമസിക്കുന്നയാളെ കസ്റ്റഡിയിലെടുത്തു. പക്ഷേ, കേസ് മുന്നോട്ടുപോയില്ല.  2021  ഫെബ്രുവരിയിൽ ആർ. പ്രതാപൻനായർ സ്റ്റേറ്റ് ക്രൈംബ്രാഞ്ച് ഡിവൈ.എസ്.പി.യായി പത്തനംതിട്ടയിൽ എത്തി ശാസ്ത്രീയരീതിയിൽ അന്വേഷണം തുടങ്ങി. യുവതിയുടെ സ്വകാര്യഭാഗങ്ങളിൽനിന്ന് ശേഖരിച്ച സാംപിളുകൾ പരിശോധനക്കയച്ചു. ഇതിലൊന്നിൽ പുരുഷബീജത്തിന്റെ സാന്നിധ്യം കണ്ടെത്തി. തുടർന്ന് സംശയിക്കപ്പെട്ടവരുടെ  രക്തസാംപിളുകൾ ശേഖരിച്ചു. ലാബ് പരിശോധനയിൽ പുരുഷബീജം കാമുകന്റേതാണെന്ന്‌ കണ്ടെത്തി. കേസ് വീണ്ടും നിന്നു. 
എന്നാൽ, യുവതിയുടെ നഖത്തിനിടയിൽനിന്ന് ശേഖരിച്ച ഡി.എൻ.എ. സാംപിൾ അപ്രതീക്ഷിതമായി. തിരുവനന്തപുരം ഫൊറൻസിക് ലാബിൽ പരിശോധിച്ച സാംപിളിലൊന്ന് കാമുകന്റെ സാംപിളുമായി ചേരുന്നതായിരുന്നു. മറ്റൊരു സാംപിൾ ഇയാളുടെ സാംപിളുമായി ചേരുന്നതായിരുന്നില്ല.  സംശയത്തിലുള്ളവരുടെ രക്തസാംപിൾ അന്വേഷണസംഘം ശേഖരിച്ചു. ഡി.എൻ.എ. മാച്ചിങ്ങിൽ യുവതിയുടെ നഖത്തിനിടയിലെ ഡി.എൻ.എ. തടിക്കച്ചവടക്കാരനായ നസീറിന്റേതാണെന്ന് കണ്ടെത്തി. യുവതിയെ ബലാത്സംഗംചെയ്ത് കെട്ടിത്തൂക്കി കൊന്നതായി കേസ് മാറി. ഇതോടെ കോട്ടാങ്ങൽ പുളിമൂട്ടിൽ വീട്ടിൽ നെയ്‌മോൻ എന്ന നസീറിനെ(39) ക്രൈംബ്രാഞ്ച് സംഘം അറസ്റ്റുചെയ്തു. 

പ്രിയപ്പെട്ട അധ്യാപികയെ കൊന്നവർ 

നാടൊന്നടങ്കം ഞെട്ടിയ കേസായിരുന്നു കാസർകോട് ചീമേനി പുലിയന്നൂരിലെ റിട്ട. അധ്യാപിക ജാനകിയുടെ കൊലപാതകം. പുലിയന്നൂർ ഗവ. എൽ.പി. സ്കൂളിൽനിന്ന്‌ വിരമിച്ച ജാനകിയെ 2017 ഡിസംബർ 13-ന് രാത്രിയാണ് അക്രമിസംഘം കഴുത്തറത്ത് കൊന്നത്.  ജാനകിയെ കെട്ടിയിട്ട സെല്ലോടേപ്പിൽനിന്ന്‌ ലഭിച്ച വിയർപ്പുതുള്ളികളിൽ നടത്തിയ ഡി.എൻ.എ. പരിശോധന കേസിലെ പ്രധാന പ്രതിയിലേക്ക് നയിച്ചു. അവരുടെ ഭർത്താവ് കൃഷ്ണനെ കെട്ടിയിട്ട ട്രാക്ക് സ്യൂട്ടിൽനിന്നും ഡി.എൻ.എ കിട്ടി. കേസ് തെളിഞ്ഞു. 

രാജ്യത്ത് അടുത്തിടെ ചുരുളഴിഞ്ഞ കുറ്റാന്വേഷണങ്ങളിലെല്ലാം കുറ്റവാളിയിലേക്കെത്താനുള്ള വഴിതെളിച്ചത് ഡി.എൻ.എ. തെളിവുകളാണ്. ഒാരോ സംഭവങ്ങളിലും സാഹചര്യതെളിവുകൾക്കുമീതെ ശാസ്ത്രീയ തെളിവുകമായി ആ ചുറ്റുഗോവണി കുറ്റകൃത്യങ്ങളുടെ കാണാപ്പുറങ്ങളിലേക്ക്‌ അന്വേഷകനെ നയിച്ചു. കേരളത്തിലും അടുത്തിടെ ഉണ്ടായ പ്രധാനപ്പെട്ട  കേസുകളെല്ലാം തെളിയിക്കപ്പെട്ടത്  
ഡി.എൻ.എ. തെളിവുകളുടെ  അടിസ്ഥാനത്തിൽത്തന്നെ.  അടുത്തിടെ കേരളത്തിൽ നടന്ന കേസന്വേഷണങ്ങളിലേക്ക്‌ ​ഒരെത്തിനോട്ടം...

ഡി.എൻ.എ. വിപ്ലവം

ജനിതകതന്മാത്രയായ ഡി.എൻ.എ.യുടെ (ഡീ ഓക്സി റൈബോ ന്യൂക്ലിക് ആസിഡ്) ഘടനയിലെ വ്യതിയാനങ്ങൾ പരിശോധിച്ച് വ്യക്തികളെ തിരിച്ചറിയുന്ന ഡി. എൻ.എ. പ്രൊഫൈലിങ് അഥവാ ഡി.എൻ.എ. ഫിംഗർപ്രിന്റിങ് ഏറെ മുന്നേറി. മനുഷ്യശരീരത്തിലെ  കോടാനുകോടി കോശങ്ങളിലെ ക്രോമസോമുകളിലാണ് ഡി.എൻ.എ. ഉള്ളത്. ഒരു വ്യക്തിയുടെ തലമുടി, തൊലി, ഉമിനീർ, രക്തം, ശുക്ലം, അസ്ഥികൾ തുടങ്ങിയ എല്ലാ ശരീരകോശങ്ങളിലെയും ഡി.എൻ.എ. ഒരേ സ്വഭാവമുള്ളതാണ്. 1984-ൽ ബ്രിട്ടീഷ് ജനിതക ശാസ്ത്രജ്ഞനായ സർ അലക് ജോൺ ജെഫ്രിയാണ്  ഈ സങ്കേതികവിദ്യ കണ്ടുപിടിച്ചത്. ഇന്ത്യയിൽ ഇതിന് പ്രചാരം നേടിക്കൊടുത്തത്  ഇന്ത്യയിലെ ഡി.എൻ.എ. ഫിംഗർ പ്രിന്റിന്റെ പിതാവായി അറിയപ്പെടുന്ന ഡോ. ലാൽജി സിങ് ആണ്. 
(തുടരും)