ചൈനയുടെ സമ്പദ്‌വ്യവസ്ഥ നേരിടുന്ന ഘടനാപരമായ പ്രതിസന്ധികളുടെ അടയാളമായി ഇപ്പോഴത്തെ സംഭവവികാസങ്ങളെ വിലയിരുത്തുന്നതിൽ സാമ്പത്തികപണ്ഡിതർ യോജിക്കുന്നു. അതിനുള്ള കാരണങ്ങളും പരിഹാരങ്ങളും എന്താണെന്ന കാര്യത്തിലാണ് അഭിപ്രായ ഭിന്നതകൾ. 

‘പൂച്ച കറുത്തതായാലും വെളുത്തതായാലും എലിയെ പിടിച്ചാൽ മതിയെന്ന’ (1) ചൈനയുടെ ശുദ്ധ പ്രായോഗികവാദം തലകീഴ് മറിയുമോ? മറിയുമെന്നാണ് പാശ്ചാത്യനാടുകളിലെ ചൈനനോക്കികളായ വിദഗ്ധരുടെ അഭിപ്രായം. ഈ വിദഗ്ധരുടെ പ്രവചനങ്ങൾ യാഥാർഥ്യമായെങ്കിൽ ഈ കുറിപ്പ് വേണ്ടിവരുമായിരുന്നില്ല എന്നുകൂടി പറയേണ്ടതുണ്ട്. കാരണം, ചൈനീസ് സമ്പദ്‌വ്യവസ്ഥയുടെ തകർച്ചയെപ്പറ്റി കഴിഞ്ഞ 20 വർഷമായി മുടങ്ങാതെ അവർ നൽകുന്ന മുന്നറിയിപ്പുകൾ ഇതുവരെ ഒരു കരയിൽ എത്തിയിട്ടില്ല. വിദഗ്ധരുടെ പ്രവചനങ്ങൾ ലക്ഷ്യംകാണുമെന്നു തീർച്ചയില്ലെങ്കിലും ചൈന അതിന്റെ സമീപകാല ചരിത്രത്തിലെ നിർണായക വഴിത്തിരിവിലാണെന്ന കാര്യത്തിൽ സംശയമില്ല.

ചായുമോ ചെരിയുമോ ചൈന

റിയൽ എസ്റ്റേറ്റ് തകർച്ച, വൈദ്യുതിക്ഷാമം, കോവിഡിന്റെ ശേഷിപ്പുകൾ ഇവ മൂന്നുംകൂടി ചേരുമ്പോൾ ‘ഇക്കണോമിസ്റ്റിന്റെ’ കണക്കെടുപ്പിൽ ചൈനയുടെ പ്രതിസന്ധി രൂക്ഷമാകുന്നതിനുള്ള സാധ്യത തള്ളിക്കളയാനാവില്ല. സെപ്‌റ്റംബറിൽ അവസാനിച്ച 2021-ലെ മൂന്നാം പാദത്തിൽ ജി.ഡി.പി. വളർച്ച (മൊത്തം ആഭ്യന്തരോത്‌പാദനം) 4.9 ശതമാനം മാത്രം രേഖപ്പെടുത്തിയത് സാമ്പത്തികവളർച്ച മന്ദഗതിയിലാവുന്നതിന്റെ സൂചനയായി കണക്കാക്കപ്പെടുന്നു. പ്രതീക്ഷിത വളർച്ച 5.2 ശതമാനമായിരുന്നു. കണ്ണഞ്ചിപ്പിക്കുന്ന തരത്തിലുള്ള ചൈനയുടെ വളർച്ചയുടെ തോതും വേഗവും അവസാനിച്ചെന്ന ചിന്തകൾ വ്യാപകമാകുന്നതിന്റെ അടിയന്തരസാഹചര്യം മേൽപ്പറഞ്ഞവയാണ്.

സാമ്പത്തികമേഖലയിലെ ആന്തരിക വൈരുധ്യങ്ങൾ, പ്രത്യേകിച്ചും ധനമേഖല, അകമേ നിന്നുള്ള പൊട്ടിത്തെറിയിൽ അവസാനിക്കുമെന്നാണ് പാശ്ചാത്യരാജ്യങ്ങളിലെ വിശകലന വിദഗ്ധരുടെ അഭിപ്രായം. 2008-ലെ സബ് പ്രൈം പ്രതിസന്ധി അമേരിക്കയിലും മറ്റു രാജ്യങ്ങളിലും സാമ്പത്തികമാന്ദ്യത്തിനു വഴിതെളിച്ചതിന് സമാനമായ സ്ഥിതിയാണ് ചൈന ഇപ്പോൾ നേരിടുന്നതെന്നും അവർ കണക്കുകൂട്ടുന്നു. അമേരിക്കയിലെ സ്ഥിതിഗതികളുമായി ചൈനയെ താരതമ്യം ചെയ്യുന്നതിൽ അർഥമില്ലെന്നും ഇപ്പോഴത്തെ പ്രതിസന്ധി ചൈന മറികടക്കുമെന്നും വാദിക്കുന്നവരുടെ എണ്ണവും കുറവല്ല. ഇരുകൂട്ടരുടെയും വാദങ്ങളുടെ വിശദാംശങ്ങളിലേക്കു കടക്കുന്നതിനു മുമ്പ് വസ്തുതാപരമായ ചില വിവരങ്ങൾ അഭികാമ്യമായിരിക്കും.      

ഊർജപ്രതിസന്ധി

കോവിഡിനെ നിയന്ത്രിക്കുന്നതിൽ വലിയ വിജയം കൈവരിച്ചെങ്കിലും പ്രാദേശികമായ രോഗവ്യാപനവും അടച്ചിടലുകളും ഇപ്പോഴും ചൈനയെ അലട്ടുന്നു. അടച്ചിടലുകൾ പ്രാദേശികതലത്തിലാണെങ്കിലും സാമ്പത്തികക്രമത്തിന്റെ താളം സാധാരണനില കൈവരിച്ചിട്ടില്ല. ചെറുകിട വ്യാപാരം, ഹോട്ടൽ, വ്യോമഗതാഗതം എന്നിവയെല്ലാം ഇതുവരെ പൂർണശേഷിയിൽ പ്രവർത്തനം തുടങ്ങിയിട്ടില്ല. ഇതിനു പുറമേയാണ് ഊർജമേഖലയിൽ ദൃശ്യമായ പ്രതിസന്ധി. ചൈനയുടെ വൈദ്യുതിയുത്‌പാദനത്തിന്റെ 60 ശതമാനവും സംഭാവനചെയ്യുന്ന കൽക്കരി ഉത്‌പാദനത്തിലെ ഇടിവ് സാമ്പത്തികവളർച്ചയെ ഇനിയും മന്ദഗതിയിലാക്കുമെന്ന് വിലയിരുത്തപ്പെടുന്നു. ലോകത്തിലെ ഏറ്റവും വലിയ ഇന്ധന ഉപഭോക്താവായ ചൈനയുടെ കൽക്കരിയുത്‌പാദനം സെപ്‌റ്റംബറിൽ 334.1 ദശലക്ഷം ടണ്ണായിരുന്നു.

ഓഗസ്റ്റിലെ 335.24 ദശലക്ഷം ടണ്ണിനെക്കാൾ കുറവായിരുന്നു ഉത്‌പാദനം. ജൂലായിൽ ഹെനാൻ പ്രവിശ്യയിലും ഒക്ടോബറിൽ ഷാൻക്‌സിയിലുമുണ്ടായ വെള്ളപ്പൊക്കം, കൽക്കരി ഉത്‌പാദനത്തിന്റെ 25 ശതമാനവും സംഭാവനചെയ്യുന്ന മംഗോളിയൻ മേഖലയിലെ അഴിമതിയുമായി ബന്ധപ്പെട്ടുള്ള അന്വേഷണം, കൽക്കരി നിലയങ്ങളുടെയും ഖനികളുടെയും സുരക്ഷാ പരിശോധനകൾ, കൽക്കരി ഇന്ധനമായി ഉപയോഗിക്കുന്ന വൈദ്യുതിനിലയങ്ങൾ ക്രമേണ നിർത്തലാക്കുന്നതിനുള്ള തീരുമാനം തുടങ്ങിയ ഒട്ടേറെ ഘടകങ്ങൾ ഊർജപ്രതിസന്ധിയുടെ കാരണമായി ചൂണ്ടിക്കാണിക്കപ്പെടുന്നു.

റിയൽ എസ്റ്റേറ്റ് സോംബികൾ

ജി.ഡി.പി.യുടെ 20 ശതമാനത്തോളം സംഭാവന ചെയ്യുന്ന കെട്ടിടനിർമാണമേഖല (റിയൽ എസ്റ്റേറ്റ്) നേരിടുന്ന തകർച്ചയാണ് ചൈനയുടെ സാമ്പത്തിക മേഖലയെക്കുറിച്ചുള്ള ഉത്കണ്ഠകൾ ആഗോളതലത്തിൽ ചർച്ചയാവുന്നതിനുള്ള പ്രധാനകാരണം. ചൈനയിലെ ഏറ്റവും വലിയ റിയൽ എസ്റ്റേറ്റ്‌ കമ്പനിയായ എവർഗ്രാൻഡെയുടെ തകർച്ചയുണ്ടാക്കിയ അനിശ്ചിതത്വങ്ങളുടെ പിന്നാലെയാണ് ഊർജപ്രതിസന്ധിയും പൂർണമായും വിട്ടുമാറാത്ത കോവിഡിന്റെ ശേഷിപ്പുകളുടെ ഭാഗമായ കഷ്ടനഷ്ടങ്ങളും ആഗോളശ്രദ്ധയാവുന്നത്. എവർഗ്രാൻഡെ പ്രതിസന്ധി മൂർധന്യത്തിൽ നിൽക്കുന്നതിനിടയിൽ മറ്റൊരു കെട്ടിടനിർമാണക്കമ്പനിയും തങ്ങളുടെ കടപ്പത്രം വഴി സമാഹരിച്ച പണം കാലാവധി കഴിഞ്ഞപ്പോൾ നിക്ഷേപകർക്ക് തിരികെ നൽകുന്നതിൽ പരാജയപ്പെട്ടു. ഒക്ടോബർ നാലാം തീയതിയാണ് ഫന്റാസിയ ഹോൾഡിങ്‌സ്‌ എന്ന സ്ഥാപനം 206 ദശലക്ഷം ഡോളറിന്റെ കടപ്പത്രബാധ്യത സമയത്തു തീർക്കാനാവില്ലെന്ന കാര്യം തുറന്നുപറഞ്ഞത്.

ചുരുക്കത്തിൽ, ചൈനയിലെ റിയൽ എസ്റ്റേറ്റ് മേഖലയിലെ 15-20 ശതമാനം കമ്പനികളും സോംബി എന്ന ഗണത്തിൽ വരുന്ന സ്ഥിതിയിലാണ്. ശമ്പളം, വാടക, പലിശയുടെ തിരിച്ചടവ് എന്നിവ കിഴിച്ചുകഴിഞ്ഞാൽ മൂലധന ചെലവുകൾക്കും കടം വാങ്ങിയ തുക മടക്കിനൽകുന്നതിനും ശേഷിയില്ലാതായ സ്ഥാപനങ്ങളാണ് സോംബി എന്നു വിശേഷിപ്പിക്കുക. ഈയൊരു സ്ഥിതിവിശേഷം ചൈനയുടെ മാത്രം പ്രത്യേകതയല്ല. മിക്കവാറും മുൻനിര മുതലാളിത്തരാജ്യങ്ങളിലെ റിയൽ എസ്റ്റേറ്റ്‌ സ്ഥാപനങ്ങളുടെ 15-20 ശതമാനം സോംബി ഗണത്തിൽ വരുന്നവയാണ്.    

ഘടനാപരമായ പ്രതിസന്ധികൾ

ചൈനയുടെ സമ്പദ്‌വ്യവസ്ഥ നേരിടുന്ന ഘടനാപരമായ പ്രതിസന്ധികളുടെ അടയാളമായി ഇപ്പോഴത്തെ സംഭവവികാസങ്ങളെ വിലയിരുത്തുന്നതിൽ സാമ്പത്തികപണ്ഡിതർ യോജിക്കുന്നു. അതിനുള്ള കാരണങ്ങളും പരിഹാരങ്ങളും എന്താണെന്ന കാര്യത്തിലാണ് അഭിപ്രായഭിന്നതകൾ. വിപണിയുടെ സ്വൈരവിഹാരത്തിന് ഭംഗംവരുത്തുന്ന സർക്കാരിന്റെ ഇടപെടലുകളാണ് പ്രതിസന്ധിയുടെ കാരണമെന്നാണ് മുഖ്യധാരയിലെ വിദഗ്ധരുടെ നിഗമനങ്ങൾ. പാർട്ടി-ഉദ്യോഗസ്ഥ തലങ്ങളിലെ കുത്തകാധികാരവും അഴിമതിയും അതിന്റെ പ്രഭവകേന്ദ്രങ്ങളായും ഈ വിലയിരുത്തലുകളിൽ തെളിയുന്നു. സ്വകാര്യ മൂലധനത്തിന്റെ പ്രവർത്തനമേഖല കൂടുതൽ വിപുലമാക്കുകയും കെട്ടിടനിർമാണ മേഖലയിൽ മൂലധനനിക്ഷേപം നടത്തിയിട്ടുള്ളവരുടെ താത്‌പര്യങ്ങൾ സംരക്ഷിക്കുകയും ചെയ്യുന്നതാണ് ഇപ്പോഴത്തെ പ്രതിസന്ധി മറികടക്കുന്നതിനായി അവർ മുന്നോട്ടുവെക്കുന്ന പരിഹാരനിർദേശങ്ങൾ. ജോർജ് സോറോസിനെ പോലുള്ള പാശ്ചാത്യനിക്ഷേപകരുടെ വിലയിരുത്തലുകൾ പരിശോധിച്ചാൽ അക്കാര്യം വ്യക്തമാകും.      

ചൈന ഗുരുതരമായ സാമ്പത്തികപ്രശ്നങ്ങൾ നേരിടുന്നുവെങ്കിലും പാശ്ചാത്യനാടുകളിൽ ദൃശ്യമായതുപോലെ സാമ്പത്തികമേഖലയെ മൊത്തം ബാധിക്കുന്ന മാന്ദ്യമായി ഇപ്പോഴത്തെ പ്രതിസന്ധി വളരുന്നതിനുള്ള സാധ്യതകൾ വിരളമാണെന്ന് മൈക്കൽ റോബർട്‌സിനെപ്പോലുള്ള സാമ്പത്തിക പണ്ഡിതർ അഭിപ്രായപ്പെടുന്നു. സമ്പദ്ഘടനയിൽ സർക്കാരിന്റെ നിയന്ത്രണം ഗണ്യമായി തുടരുന്നതാണ് അതിനുള്ള കാരണമെന്നും അദ്ദേഹം പറയുന്നു. ഇപ്പോഴത്തെ വിഷമവൃത്തത്തിൽനിന്നു പുറത്തുകടക്കുന്നതിനുള്ള പോംവഴികൾ എന്താണെന്ന കാര്യത്തിലും ഭിന്നവീക്ഷണങ്ങളാണ് സാമ്പത്തികപണ്ഡിതർ പുലർത്തുന്നത്.

ഷിയുടെ നിലപാടുകൾ

ചൈനയിലെ കേന്ദ്ര-പ്രാദേശിക സർക്കാരുകൾ കഷ്ടത്തിലായ റിയൽ എസ്റ്റേറ്റ്‌ കമ്പനികളെ രക്ഷിക്കണമെന്ന് ഒരുവിഭാഗം വാദിക്കുന്നു. സർക്കാരിന്റെ ഭാഗത്തുനിന്നുള്ള രക്ഷാപ്രവർത്തനം കമ്പനികളെ വീണ്ടും ഉഷാറാക്കുമെന്നും അതുവഴി സാമ്പത്തികവളർച്ച ത്വരപ്പെടുത്തുമെന്നും അവർ വിലയിരുത്തുന്നു. ചൈനയിലെ സർക്കാർ അത്തരമൊരു നടപടി സ്വീകരിക്കുന്നതിനുള്ള സാധ്യത വിരളമാണെന്ന് കണക്കാക്കുന്നവരാണ് കൂടുതൽ പേരും.

റിയൽ എസ്റ്റേറ്റ്‌ മേഖലയിലെ ഊഹക്കച്ചവടങ്ങളെ അടിസ്ഥാനമാക്കിയുള്ള വളർച്ച നിയന്ത്രിക്കുന്നതിനുള്ള നയപരമായ തീരുമാനത്തിൽ പ്രസിഡന്റ്‌ ഷി ജിൻപെങ്ങിന്റെ നേതൃത്വം ഉറച്ചുനിൽക്കുന്നതാണ് അതിനുള്ള കാരണം. മുടങ്ങിക്കിടക്കുന്ന ഭവനപദ്ധതികൾ പ്രാദേശിക ഭരണകൂടങ്ങൾ ഇതിനകംതന്നെ ഏറ്റെടുക്കാൻ തുടങ്ങിയെങ്കിലും ബോണ്ട് നിക്ഷേപകരുടെ കാര്യത്തിൽ ഇതുവരെ തീരുമാനമായിട്ടില്ല. ചൈനയുടെ അദ്‌ഭുതകരമായ വളർച്ചയുടെ ചാലകശക്തിയായിരുന്ന റിയൽ എസ്റ്റേറ്റ്‌ മേഖലയെ സർക്കാർ കൈവിടുന്നപക്ഷം പകരം എന്താണെന്നുള്ള വിഷയം ബാക്കിയാവുന്നു. സ്വയംപര്യാപ്തമായ മുതലാളിത്തവുമായി ചൈനയുടെ സമ്പദ്ഘടന അതിന്റെ അതിജീവനസാധ്യതകൾ നിലനിർത്തുന്നതിൽ എത്രത്തോളം വിജയിക്കുമെന്നതിനെ ആശ്രയിച്ചിരിക്കും അതിന്റെ ഉത്തരം.

 (1) മാവോ സേ തുങ്ങിന്റെ മരണശേഷം ചൈനയുടെ നേതൃപദവിയിലെത്തിയ ദെങ്‌സിയാവോ പിങ്ങിന്റെ പ്രശസ്തമായ നിരീക്ഷണം.

(മലബാർ ജേണലി​ന്റെ എക്സിക്യുട്ടീവ്‌ ഡയറക്ടറാണ്‌ ലേഖകൻ)