ഏഴാറ്റുമുഖം പ്രകൃതിഗ്രാമത്തിന് 98.18 ലക്ഷം

അങ്കമാലി : ഏഴാറ്റുമുഖം പ്രകൃതിഗ്രാമത്തിന്റെ രണ്ടാംഘട്ട നവീകരണ പ്രവൃത്തികൾക്കായി 98.18 ലക്ഷം രൂപ അനുവദിച്ചതായി റോജി എം. ജോൺ എം.എൽ.എ. അറിയിച്ചു. ഒന്നാംഘട്ട നവീകരണത്തിനായി അമ്പത് ലക്ഷം രൂപ അനുവദിച്ച് പ്രവൃത്തികൾ പൂർത്തീകരിച്ചിരുന്നു. ഇവിടെ കൂടുതൽ സൗകര്യങ്ങൾ സന്ദർശകർക്ക് ഒരുക്കുന്നതിനായി എം.എൽ.എ. മുൻകൈയെടുത്ത് പുതിയ പദ്ധതി ടൂറിസം വകുപ്പിന്റെ ഭരണാനുമതിക്കായി സമർപ്പിക്കുകയായിരുന്നു. പുതിയ കഫറ്റേരിയ നിർമാണം, ഇൻഫർമേഷൻ കിയോസ്ക് സ്ഥാപിക്കൽ, പുഴയോടു ചേർന്ന ഭാഗത്ത് സംരക്ഷണ ഭിത്തി കെട്ടൽ, ചുറ്റുമതിൽ നിർമാണം, ടോയ്‌െലറ്റ് ബ്ലോക്ക്, സി.സി.ടി.വി. ക്യാമറ സ്ഥാപിക്കൽ, മാലിന്യ നിർമാർജന സൗകര്യം ഒരുക്കൽ, വാക്ക്-വേ, റാംപ്‌ എന്നിവയുടെ നിർമാണം, അത്യാവശ്യ അറ്റകുറ്റപ്പണികൾ എന്നിവയാണ് ഉൾപ്പെടുത്തിയിരിക്കുന്നത്. ജില്ലാ ടൂറിസം പ്രൊമോഷൻ കൗൺസിലിനാണ് ഇതിന്റെ നിർവഹണ ചുമതല.