ഏറെനാളായി ഫ്‌ളെക്‌സ്‌ നിരോധനത്തെക്കുറിച്ചുള്ള ചർച്ചകൾ കേരളത്തിൽ മുഴങ്ങിക്കേൾക്കുന്നു. രാഷ്ട്രീയപ്പാർട്ടികളാണ് ഫ്‌ളെക്‌സ്‌

ഏറ്റവുമധികം ഉപയോഗിക്കുന്നതെന്നും അവർ നിർത്തിയാൽ തങ്ങളും നിർത്താമെന്നും ഫ്‌ളെക്‌സ്‌  നിർമാതാക്കൾ പറയുമ്പോൾ, അവർ നിർമാണം നിർത്തിയാൽ തങ്ങൾ നിർത്താമെന്നാണ് രാഷ്ട്രീയനേതാക്കളുടെ പക്ഷം. പ്രകൃതിയെയും മനുഷ്യാരോഗ്യത്തേയും മുൻനിർത്തി തർക്കം മുറുകുന്നതിനിടെ ഫ്ളെക്സ് ഉപേക്ഷിക്കാനുള്ള തീരുമാനത്തില്‍ ഒടുവില്‍ കേരളം എത്തിച്ചേര്‍ന്നിരിക്കുകയാണ്.

 

ഇന്ന് പ്രചാരത്തിലുള്ള ഫ്‌ളെക്‌സിന്റെ നിർമാണത്തിന് ഏറ്റവുമധികം ഉപയോഗിക്കുന്ന വസ്തുവാണ് പോളിവിനൈൽ ക്ലോറൈഡ് എന്ന പി.വി.സി. വിനൈൽ ക്ലോറൈഡ് മോണോമറുകളെ (വി.സി.എം.) പോളിമറൈസ് ചെയ്താണ് പി.വി.സി. ഉണ്ടാക്കുന്നത്. ഈ വിനൈൽ മോണോമറുകൾ അർബുദത്തിനു കാരണമാകുന്നതാണെന്നു കണ്ടെത്തിയിട്ടുള്ളതാണ്. ഇക്കഴിഞ്ഞ ദിവസമാണ് ചെവി വൃത്തിയാക്കാൻ ഉപയോഗിക്കുന്ന ഇയർ ബഡ്‌സ് ഉൾപ്പെടെയുള്ള പി.വി.സി. നിർമിത വസ്തുക്കൾക്കുപോലും നിരോധനമേർപ്പെടുത്താൻ ബ്രിട്ടൻ ഒരുങ്ങുന്നു എന്ന വാർത്ത പുറത്തുവന്നത്. വികസിത രാഷ്ട്രങ്ങൾ ഇത്തരത്തിൽ പി.വി.സി.യിൽ നിന്ന് മുഖംതിരിച്ച് നടക്കുമ്പോഴാണ് നമ്മ‌ളിക്കാലത്തും പി.വി.സി.ക്ക് അമിതപ്രാധാന്യം നൽകുന്നത്. വഴക്കമുള്ള പി.വി.സി.യുടെ ഉപയോഗമാണ് ഫ്‌ളെക്സ് ഷീറ്റുകളിൽ ആകർഷകമായ വർണമുദ്രണവും തെളിമയും ലഭിക്കാൻ കാരണമാകുന്നത്. ചെലവ് കുറവെന്ന ഘടകത്തെപ്പോലെതന്നെ ഉപഭോക്താക്കളെ വളരെയധികം ഈ ഘടകവും സ്വാധീനിക്കുമെന്നതും ഈ അമിതപ്രാധാന്യത്തിന്റെ കാരണമാണ്.വൻതോതിൽ ക്ലോറിൻ ആവശ്യമായ ഒരു വ്യവസായമാണ് പി.വി.സി. ഉത്പാദനം. ലോകത്തെ ഏറ്റവും കുപ്രസിദ്ധമായ രാസവിഷ ദുരന്തങ്ങളുടെയൊക്കെ പിന്നിൽ ക്ലോറിന്റെ സാന്നിധ്യമുണ്ടായിരുന്നു. ഓരോദിവസവും ക്ലോറിൻ അടിസ്ഥാനമാക്കിയ വിഷം നമ്മുടെ അന്തരീക്ഷത്തിൽ വർധിക്കുകയാണെന്നതാണ് യാഥാർഥ്യം.

 

പി.വി.സി. കട്ടിയേറിയ പ്ലാസ്റ്റിക്കാണ്. അതിനു വഴക്കവും മൃദുത്വവും വർധിപ്പിക്കുന്നതിനാണ് താലേറ്റ് എന്ന രാസഘടകം ചേർക്കുന്നത്. ഒരു പി.വി.സി. ഉത്പന്നത്തിൽ 20-70 ശതമാനം താലേറ്റുണ്ടാവും. വഴക്കം കൂടുന്നതനുസരിച്ച് താലേറ്റിന്റെ അളവും കൂടും.താലേറ്റ് നിസ്സാരക്കാരനല്ല. പി.വി.സി. പ്ലാസ്റ്റിക്കുള്ള പാത്രങ്ങളിൽ സൂക്ഷിച്ചിരിക്കുന്ന ഭക്ഷണപദാർഥങ്ങളിലേക്ക് താലേറ്റ് സ്രവിച്ചിറങ്ങും. സ്ത്രീഹോർമോണുകളുടെ പ്രവർത്തനത്തെ അനുകരിക്കുകയാണ് അവ ചെയ്യുന്നത്. താലേറ്റ് കൂടുതലായി ഉള്ളിലെത്തുമ്പോള്‍ സ്ത്രീഹോർമോൺ ശരീരത്തിലെത്തിയതായുള്ള അനുഭവമാണുണ്ടാവുക. സ്തനവളർച്ച കൂടുതലുണ്ടാവുക, വളരെ നേരത്തേ ആർത്തവമുണ്ടാവുക, ആൺകുട്ടികളിൽ സ്ത്രീഭാവങ്ങൾ പ്രകടമാവുക. അണ്ഡാശയ അർബുദം പോലുള്ള രോഗങ്ങളുണ്ടാവുക തുടങ്ങിയ പ്രശ്നങ്ങളുണ്ടാവാം. ചൈനീസ് കളിപ്പാട്ടങ്ങളിലും ചൈനയിൽനിന്നുള്ള പാത്രങ്ങളിലുമൊക്കെ താലേറ്റിന്റെ അളവ് കൂടുതലാണെന്നു കണ്ടെത്തിയിട്ടുള്ളതാണ്.കുട്ടികൾക്ക് ഏറെ ദോഷം ചെയ്യുമെന്നു കണ്ടെത്തിയതിനെത്തുടർന്ന് താലേറ്റുകൾ അടങ്ങിയ കളിപ്പാട്ടങ്ങൾ യൂറോപ്പിലും മറ്റു വികസിത രാജ്യങ്ങളിലും നിരോധിക്കുകയോ നിയന്ത്രിക്കുകയോ ചെയ്തുകഴിഞ്ഞു. 2008-ലാണ് താലേറ്റ് അടങ്ങിയ കളിപ്പാട്ടങ്ങൾ യു.എസിൽ നിരോധിക്കുന്നത്. യു.എസിന് പിന്നാലെ ഓസ്ട്രിയ, ഡെന്മാർക്ക്, ഫിൻലൻഡ്, ഫ്രാൻസ്, ജർമനി, ഗ്രീസ്, ഇറ്റലി, ജപ്പാൻ, ഐസ്‌ലൻഡ്, മെക്സിക്കോ, നോർവേ, സ്വീഡൻ എന്നീ രാജ്യങ്ങളും ഇവ നിരോധിച്ചു.

 

കേരളമിന്ന് അഭിമുഖീകരിക്കുന്ന ഏറ്റവും വലിയ മാലിന്യപ്രശ്നങ്ങളിലൊന്ന് പുനഃചംക്രമണം ചെയ്യാൻ സാധിക്കാത്ത ​ഫ്ളെക്സാണ്. തുണികൊണ്ടുള്ള പരസ്യ ബാനറുകളുടെ ഏറ്റവും വലിയ ഗുണമെന്നത് അവ മണ്ണിൽ അലിഞ്ഞുചേരുന്ന നിരുപദ്രവ മാധ്യമമായിരുന്നു എന്നതാണ്. എന്നാൽ, നിലവിൽ പ്രചാരത്തിലുള്ള പി.വി.സി. ​ഫ്ളെക്സുകൾ അങ്ങനെയല്ല. അവ ഒട്ടും മണ്ണിൽ ലയിക്കാതെ പൊതുജനാരോഗ്യത്തിനും പരിസ്ഥിതിക്കും കടുത്ത ദോഷം സൃഷ്ടിക്കും.

 

സൂര്യപ്രകാശത്തിന്റെ സാന്നിധ്യത്തിൽ 40 ഡിഗ്രി സെൽഷ്യസിനപ്പുറം താപനിലയിൽ പെട്ടെന്നു നശിച്ചുപോകുന്ന ഒരു സ്വഭാവവും പി.വി.സി.ക്കുണ്ട്. അതിന്റെ വേഗം കുറയ്ക്കാനായി ഉത്പാദനസമയത്തുതന്നെ ലെഡ്, കാഡ്മിയം തുടങ്ങിയ ഘനലോഹങ്ങൾ ഇതിൽ താപസമീകാരികളായി ചേർക്കാറുണ്ട്. ഇവ ഗുരുതരമായ ആരോഗ്യപ്രശ്നങ്ങൾക്കു കാരണമാകുന്നവയാണ്‌.പി.വി.സി. പ്ലാസ്റ്റിക്കിൽ വേറെയും രാസപദാർഥങ്ങൾ ചേർക്കാറുണ്ട്. താപവിരോധികളായ ബ്രോമിൻ അടിസ്ഥാനമായ രാസപദാർഥങ്ങൾ, പലയിനം ഫില്ലറുകൾ, കീടനാശിനികൾ, പൂപ്പൽനാശിനികൾ. ഇവയൊന്നും പി.വി.സി.യുമായി രാസബന്ധത്തിലല്ലാത്തതുകൊണ്ട് ഇവയൊക്കെയും കാലം ചെല്ലുംതോറും അന്തരീക്ഷത്തിലേക്കോ പി.വി.സി.യുമായി സമ്പർക്കത്തിലുള്ള ഭക്ഷണത്തിലേക്കോ വെള്ളത്തിലേക്കോ മനുഷ്യശരീരത്തിലേക്കോ കടക്കുന്നു. ഉത്പാദനസമയത്തും ഉപഭോഗസമയത്തും ഇത്രയേറെ അപകടമുണ്ടാക്കുന്ന വസ്തു വേറെയില്ലെന്നു പറയേണ്ടിവരും.

 

ഇനി ഇത് കത്തിച്ചാലോ? ഓർഗാനിക് വസ്തുവിനോടൊപ്പം ക്ലോറിൻ കൂടിയുള്ളതിനാൽ പി.വി.സി. ഫ്ളെക്സ് കത്തിക്കുമ്പോൾ ഡയോക്സിൻ, ഫ്യൂറാൻ തുടങ്ങിയ അർബുദത്തിനും വന്ധ്യതയ്ക്കും കാരണമാകുന്ന വിഷവാതകങ്ങൾ അന്തരീക്ഷത്തിൽ കലരാൻ സാധ്യതയുണ്ട്. കൂടാതെ സൾഫൈറ്റ്, നൈട്രേറ്റ് പോലെയുള്ള മാരകമായ രാസമാലിന്യങ്ങളും ഇവ കത്തിക്കുമ്പോൾ പുറത്തുവരും.  

വെന്തുരുകാൻ 299 ഡിഗ്രി സെൽഷ്യസ് ചൂടുവേണ്ട അവ ചുറ്റുമുള്ള അന്തരീക്ഷത്തിലെ താപനില ഉയർത്തും. 4.7 പി.എച്ച്. മൂല്യമുള്ള ഫ്ളെക്സ് ചാരം മണ്ണിലെയും വെള്ളത്തിലെയും വായുവിലെയും അമ്ലാംശം അപകടരമാംവിധം ഉയർത്തും. പ്രകൃതിക്കും ജീവജാലത്തിനും ദോഷകരമായ, അന്തരീക്ഷവായുവിനേക്കാൾ കനംകൂടിയ ആ മാലിന്യങ്ങൾ ഒരു കരിമ്പടമായി രൂപപ്പെട്ട് പ്രാണവായു വിതരണം തടസ്സപ്പെടുത്തുകയും ചെയ്യും. പി.വി.സി. പ്ലാസ്റ്റിക് രൂപത്തിൽ മാത്രമല്ല, പ്ലാസ്റ്റിക്കുകൾ പ്രിന്റ് ചെയ്യുന്ന മഷിയായും അതുപയോഗിക്കുന്നുണ്ട്. അതായത് പ്രിന്റ് ചെയ്യപ്പെട്ടിട്ടുള്ള ഏതു പ്ലാസ്റ്റിക് ഉത്പന്നം തീയിലെറിഞ്ഞാലും അതപകടമാണ്.

 

അനുദിനം വഷളാവുന്ന പ്ലാസ്റ്റിക് മാലിന്യപ്രശ്നത്തിന് പരിഹാരവുമായാണ് പ്ലാസ്റ്റിക് റോഡുകൾ എന്ന ആശയം സംസ്ഥാനത്ത് വിദഗ്ധർ മുന്നോട്ടുവെച്ചത്. പരീക്ഷണാടിസ്ഥാനത്തിൽ കേരളത്തിന്റെ പലയിടങ്ങളിലും പ്ലാസ്റ്റിക് കലർത്തിയ റോഡുകളുടെ നിർമാണം നടക്കുകയാണ്. ദേശീയ ഗതാഗത ആസൂത്രണ ഗവേഷണകേന്ദ്രം (നാറ്റ്പാക്) ആണ് പ്ലാസ്റ്റിക് പാഴ്‍വസ്തുക്കളുപയോഗിച്ചുള്ള റോഡുകളുടെ പ്രതലീകരണത്തിന് രംഗത്തുള്ളത്. പോളി എത്തിലീൻ, പോളി പ്രൊപ്പലീൻ, പോളിസ്റ്റിറീൻ വിഭാഗത്തിൽപ്പെടുന്ന പാൽക്കവർ, പോളികപ്പ്, പ്ലേറ്റ്, കാരിബാഗ്, പാഴ്‌സൽ കവർ തുടങ്ങി ഉപയോഗശൂന്യമായ പല പ്ലാസ്റ്റിക് സാധനങ്ങളും റോഡുനിർമാണത്തിന് ഉപയോഗിക്കാം. 60 മൈക്രോണിൽത്താഴെയുള്ള എല്ലാ പ്ലാസ്റ്റിക് നിർമിത ഉപകരണങ്ങളും ഇതിൽപ്പെടും. എന്നാൽ, പി.വി.സി. ഉത്പന്നങ്ങൾ ഒഴിവാക്കണമെന്നതാണ് കർശനമായ വ്യവസ്ഥ. ചൂടാവുമ്പോൾ അവയിൽനിന്ന് വിഷവാതകങ്ങൾ പുറത്തെത്തുമെന്നതുതന്നെ കാരണം.

 

2014-ലെ സംസ്ഥാനസർക്കാരിന്റെ ഉത്തരവുപ്രകാരം പി.വി.സി. ഫ്ളെക്സുകൾ ഉപയോഗിക്കുന്നത് സർക്കാർ ചടങ്ങുകളിൽനിന്ന്‌ പൂർണമായി വിലക്കിയിരുന്നു. പി.വി.സി. ഫ്ളെക്സിന് പകരമായി മറ്റു പരിസ്ഥിതി സൗഹൃദ വസ്തുക്കളുടെ ദൗർലഭ്യവും ഈ മേഖലയിൽ പ്രവർത്തിക്കുന്നവരുടെ തൊഴിൽസുരക്ഷയും പി.വി.സി. ഫ്ളെക്സിന്റെ പൂർണനിരോധനത്തിന് തടസ്സമാകുന്നതായി ഉത്തരവിൽത്തന്നെ പറയുന്നുണ്ട്. ഫ്ളെക്സ് ബോർഡുകൾക്ക് നിയന്ത്രണം ഏർപ്പെടുത്തിയ സർക്കാർ ഉത്തരവ് ഫലപ്രദമായി നടപ്പാക്കാൻ കഴിയാതിരുന്നത് ഫ്ളെക്സിന് ബദലായി റീസൈക്കിൾ ചെയ്യാവുന്നതും പി.വി.സി. രഹിതവുമായ മറ്റൊരു വസ്തു ഇല്ലാതിരുന്നതുകൊണ്ടാണ്.പ്ലാസ്റ്റിക് മാലിന്യങ്ങൾക്കുള്ള നിയന്ത്രണം കേന്ദ്ര പരിസ്ഥിതി-വനംമന്ത്രാലയം കർശനമാക്കിയപ്പോൾ അതിൽപ്പറഞ്ഞിരുന്ന പ്രധാന വ്യവസ്ഥകളിലൊന്ന് ഇതായിരുന്നു- ‘പുനരുപയോഗ സാധ്യതയില്ലാത്ത പ്ലാസ്റ്റിക് ഉത്പന്നങ്ങളുടെ നിർമാണവും ഉപയോഗവും രണ്ടുവർഷത്തിനുള്ളിൽ നിർത്തലാക്കണം.’-അതുകൊണ്ടുതന്നെ ഒരുതരത്തിലും പുനരുപയോഗം സാധ്യതയില്ലാത്ത പി.വി.സി. ​ഫ്ളെക്സുകളുടെ നിരോധനം അത്യാവശ്യമാണ്.

 

പി.വി.സി. ഫ്‌ളെക്സിന് ബദൽ മാർഗമില്ലാതിരുന്നതുകൊണ്ടാണ് അവ ഫലപ്രദമായി നടപ്പാക്കാൻ സാധിക്കാത്തതെന്നാണ് സർക്കാർ വാദം. എന്നാൽ, അതിനു പകരമായി ഉപയോഗിക്കാവുന്ന മറ്റൊരു പദാർഥമാണ് പോളി എത്തിലീൻ നിർമിതമായിട്ടുള്ളതും 100 ശതമാനം പുനഃചംക്രമണം ചെയ്യാവുന്നതുമായ പോളി എത്തിലീൻ പ്രിന്റിങ് മെറ്റീരിയൽ. ഇത് ക്ലോറിൻ മുക്തമാണ്. അതിനാൽത്തന്നെ ഇവയിൽ നിന്ന് പുനഃചംക്രമണ വേളയിൽ ഒരുവിധത്തിലുള്ള വിഷവാതകങ്ങളും പുറന്തള്ളപ്പെടില്ല. പോളി എത്തിലീൻ കത്തുമ്പോൾ താരതമ്യേന ദോഷം കുറഞ്ഞ കാർബൺ ഡൈഓക്സൈഡ് ഉണ്ടാകാനുള്ള സാധ്യതയേയുള്ളൂ. സംസ്ഥാന മലിനീകരണ നിയന്ത്രണബോർഡ് ഇക്കാര്യം സാക്ഷ്യപ്പെടുത്തിയതുമാണ്.35-ാം ദേശീയ ഗെയിംസിൽ പി.വി.സി. ഫ്ളെക്സിനെ പൂർണമായി ഒഴിവാക്കാനുള്ള നിർദേശം സർക്കാരിന്റെ ഭാഗത്തുനിന്നുണ്ടാവുകയും ശുചിത്വമിഷന്റെ ഗ്രീൻ പ്രോട്ടോക്കോളിന്റെ ഭാഗമായി പൂർണമായും പരിസ്ഥിതി സൗഹാർദവസ്തുക്കൾ ഉപയോഗിക്കാനുള്ള തീരുമാനം കൈക്കൊണ്ടതിന്റെ ഭാഗമായും പോളിഎത്തിലീൻ അടിസ്ഥാനമാക്കിയുള്ള ഫ്ളെക്സ് പി.വി.സി. ഫ്‌ളെക്സിന് പകരമായി ഉപയോഗിച്ചു. ഇത് ബദൽ സംവിധാനത്തിന്റെ വിജയമായി കണക്കാക്കാവുന്നതാണ്.

 

നിലവിലെ ഫ്‌ളെക്സ് പ്രിന്റിങ് മെഷീൻ ഉപയോഗിച്ച് അതേ ചുറ്റുപാടിൽത്തന്നെ പോളി എത്തിലീൻ മെറ്റീരിയലും അതുപോലെ പുനഃചംക്രമണം ചെയ്യാൻ സാധിക്കുന്ന ഇതര മെറ്റീരിയലുകളും നിർമിക്കാം. പി.വി.സി. ഫ്ളെക്സിന്റെ അതേവിലയിൽ ഇത്‌ ലഭ്യമാക്കാം. പൂർണനിരോധനത്തിൽ ഫ്ളെക്സ് പ്രിന്റിങ് സ്ഥാപനങ്ങൾക്കും ഉപഭോക്താക്കൾക്കും ബുദ്ധിമുട്ടുണ്ടാക്കില്ല. അതിനാൽത്തന്നെ പി.വി.സി. ഫ്‌ളെക്സിന്റെ പൂർണ ഉപയോഗത്തിന് വിലങ്ങുതടിയാണെന്ന് സർക്കാർതന്നെ പറയുന്ന തൊഴിൽസുരക്ഷയുടെ കാര്യത്തിൽ ആശങ്കപ്പെടേണ്ടതില്ല.പുനഃചംക്രമണം ചെയ്യാവുന്നതും പരിസ്ഥിതിക്ക് ദോഷം ചെയ്യാത്തതുമായ പോളി എത്തിലീൻ ഉപയോഗിക്കുന്നതിന് തദ്ദേശസ്വയംഭരണ വകുപ്പ് അനുമതി നൽകിയിട്ടുണ്ട്. പോളി എത്തിലീൻ പരിസ്ഥിതിക്ക് ദോഷംചെയ്യില്ലെന്ന് ശുചിത്വമിഷൻ, മലിനീകരണ നിയന്ത്രണബോർഡ്, ക്ലീൻ കേരളാ കമ്പനി എന്നിവ ശുപാർശ ചെയ്തതും എടുത്തുപറയേണ്ടതുണ്ട്. ഫ്‌ളെക്സ് ബോർഡുകൾ സ്ഥാപിച്ചുകഴിഞ്ഞാൽ അവ ഉപയോഗശേഷം സ്ഥാപിച്ചവർ എടുത്തുമാറ്റാതെ അവ അതേപടി ഉപേക്ഷിക്കുന്ന സ്ഥിതിവിശേഷമാണ് കേരളത്തിലെന്നല്ല, എല്ലായിടങ്ങളിലും കണ്ടുവരുന്നത്. ഇവ മണ്ണിലലിഞ്ഞു ചേരാത്തതുമൂലമുള്ള മലിനീകരണം കണക്കിലെടുത്താണ് സംസ്ഥാനസർക്കാർ പോളി എത്തിലീൻ ഉപയോഗിക്കുന്നതിന് അനുമതി നൽകിയത്.

 

 

എത്തിലീൻ ഉപയോഗിക്കണം
ചെറിയരീതിയിലാണ് തുടങ്ങിയതെങ്കിലും അതിവേഗമാണ് ഫ്ളെക്സ് വ്യാപിച്ചത്. അതിന്റെ തെളിമയും മറ്റും തന്നെ അതിനുകാരണം. ഉപയോഗശേഷം ഫ്ലക്സ് കത്തിക്കുകയാണ് എല്ലാവരും ചെയ്യുന്നത്. വേറെ മാർഗമില്ലാത്തതു കൊണ്ടാണിത്. കേരളംപോലുള്ള സംസ്ഥാനങ്ങളിലാണ് പി.വി.സി. ​ഫ്ളെക്സിന്റെ ആധിക്യം ഏറ്റവുമധികമുള്ളത്. ഇതപകടകരമാണ്. തുണിയാണ് ഏറ്റവും നല്ല മാർഗമെങ്കിലും ഫ്‌ളെക്സിൽ പ്രിന്റ് ചെയ്യുന്ന തെളിമയൊന്നും തുണിയിൽ കിട്ടില്ല. പി.വി.സി.ക്കുപകരം പോളി എത്തിലീൻ ഉപയോഗിക്കാൻ എല്ലാവരും തുടങ്ങണം.
ഡോ. എം. ചന്ദ്രദത്തൻ
മുഖ്യമന്ത്രിയുടെ ശാസ്ത്രോപദേഷ്ടാവ്

 

ഈ തിരിച്ചറിവ് നല്ലതുടക്കം

കാലമേറെക്കഴിഞ്ഞാലും മണ്ണിൽ ലയിച്ചുചേരാത്ത, പരിസ്ഥിതിക്കും പൊതുജനാരോഗ്യത്തിനും ഹാനികരമായ ഫ്ളെക്സിന്റെ ഉപയോഗം നിയന്ത്രിക്കുന്നതിനെ കഴിഞ്ഞദിവസം ചേർന്ന  സർവകക്ഷിയോഗം സ്വാഗതംചെയ്തത് പ്രതീക്ഷനൽകുന്നു. താത്കാലിക ലാഭങ്ങൾക്കുപരി പ്രകൃതിയോടും അതിലെ ജീവജാലങ്ങളോടും നാം കാട്ടേണ്ട പ്രതിബദ്ധത മനസ്സിലാക്കിക്കൊണ്ടുള്ള സമീപനമാണ് തദ്ദേശസ്വയംഭരണവകുപ്പ് മന്ത്രി കെ.ടി. ജലീൽ വിളിച്ചുചേർത്ത ആ യോഗത്തിൽ പങ്കെടുത്ത  രാഷ്ട്രീയപ്പാർട്ടികളെല്ലാം സ്വീകരിച്ചത്. ഈ തിരിച്ചറിവ് നല്ലതുടക്കമാണ്. മണ്ണിനെ നശിപ്പിക്കുന്ന പോളി വിനൈൽ ക്ലോറൈഡ് (പി.വി.സി.) ഉപയോഗിച്ചുള്ള ഫ്ലെക്സിന്റെ വ്യാപകമായ ഉപയോഗം അവസാനിപ്പിച്ച് ബദൽമാർഗങ്ങളിലേക്ക്‌ കടക്കാൻ ഇതോടെ കേരളത്തിൽ സാഹചര്യമൊരുങ്ങിയിരിക്കുന്നു. തൊഴിലും വരുമാനവും നഷ്ടമാകുന്ന ഫ്ലെക്സ് ബോർഡ് നിർമാതാക്കളുടെയും തൊഴിലാളികളുടെയും  ആശങ്കകൾകൂടി പരിഹരിച്ചുള്ള തീരുമാനമാണ് ഇനിയുണ്ടാകേണ്ടത്. സർക്കാർ ഇതുസംബന്ധിച്ച നയം വൈകാതെ വ്യക്തമാക്കണം. രാഷ്ട്രീയപ്പാർട്ടികളുടെയും വിവിധ വിഭാഗങ്ങളുടെയും അഭിപ്രായ നിർദേശങ്ങളും കൂടി കണക്കിലെടുത്ത് പ്രായോഗികവും ശാസ്ത്രീയവുമായ തീരുമാനമാണ് ഇക്കാര്യത്തിൽ കേരളം കാത്തിരിക്കുന്നത്. പരിസ്ഥിതി സംരക്ഷണമെന്ന ജീവൽപ്രധാനമായ സങ്കല്പത്തിനായിരിക്കണം ഈ തീരുമാനത്തിൽ മുൻതൂക്കം. 

പി.വി.സി. ഉപയോഗിച്ചുള്ള ഫ്ലെക്സ് പരിസ്ഥിതിക്ക് നാശവും പൊതുജനാരോഗ്യത്തിന് ഭീഷണിയുമാണ് എന്നത് ശാസ്ത്രീയമായി തെളിയിക്കപ്പെട്ടതാണ്. കേരളത്തിൽ ഇതിന്റെ ഉപയോഗമുണ്ടാക്കുന്ന പ്രത്യാഘാതങ്ങളെക്കുറിച്ച് പഠിക്കാൻ സർക്കാർ നിയോഗിച്ച സമിതിയുടെ റിപ്പോർട്ടും ഇതിന് അടിവരയിടുന്നുണ്ട്. നമ്മുടെ നാട്ടിലെ ഫ്ളെക്ല് ഉപയോഗത്തിന്റെ മാരകമായ വ്യാപ്തി കണക്കിലെടുത്താൽ പ്രത്യാഘാതവും മാരകമാണെന്ന് കാണാം. എന്നാൽ, ഇതുപയോഗിച്ചുള്ള പരസ്യപ്പലകകളുടെ നിർമാണം ഇന്ന് ഒട്ടേറെപ്പേരുടെ  ജീവിതമാർഗമാണ്. ഫ്ലെക്സ് നിരോധിക്കാൻ മുൻപ്‌ നടന്ന നീക്കങ്ങളെല്ലാം തടസ്സപ്പെട്ടത് പെട്ടെന്നുള്ള നിരോധനം ഈ രംഗത്ത് മുതൽമുടക്കിയവരെയും തൊഴിലെടുക്കുന്നവരെയും നിരാശ്രയരാക്കും എന്നുള്ളതിനാലാണ്. ഇത് നിരോധിക്കുന്നതിന്റെ ലാഭനഷ്ടങ്ങൾ തുലനംചെയ്താൽ തത്കാലം ഉണ്ടാകുന്ന നഷ്ടത്തെക്കാൾ സമൂഹത്തിന് ഭാവിയിലുണ്ടാകുന്ന നേട്ടത്തിനായിരിക്കും തൂക്കം കൂടുതലെന്നതിലും തർക്കംവേണ്ട. എന്നാൽ, ഇതുകൊണ്ടുണ്ടാകുന്ന ഹ്രസ്വകാല ദുരിതങ്ങളെ അവഗണിക്കാനാവില്ല.  പുനരുപയോഗിക്കാവുന്നതും പി.വി.സി. മുക്തവുമായ പോളി എത്തിലിൻകൊണ്ട് നിർമിച്ച വസ്തുക്കളിലേക്ക്‌ ഈ പരസ്യപ്പലക നിർമാണമേഖല എത്രയും പെട്ടെന്ന് മാറുകയാണ് വേണ്ടത്. ഇതിലേക്ക്‌ ഈരംഗത്ത് ഇപ്പോഴുള്ളവരെ സജ്ജമാക്കാൻ സർക്കാർതന്നെ മുൻകൈയെടുക്കണം. അതിനുവേണ്ട മൂലധന നിക്ഷേപത്തിനും സാങ്കേതികസംവിധാനങ്ങളുടെ കാലാനുസൃതമായ മാറ്റത്തിനും സർക്കാരിന്റെ പിന്തുണ ഇവർക്ക് ലഭിക്കണം. ഈ മേഖലയുടെ  ആശങ്കകൾ മനസ്സിലാക്കാനും അവയ്ക്ക് പ്രായോഗികപരിഹാരം നിർദേശിക്കാനും സംരംഭകരും തൊഴിലാളികളുമായി ചർച്ചചെയ്യാനും സർക്കാർ തയ്യാറാവണം. പരിസ്ഥിതിക്ക് ഹാനികരമല്ലാത്ത ബദൽ മാർഗങ്ങളിലേക്ക്‌ കടക്കാൻ സാഹചര്യമൊരുങ്ങുന്നതോടെ ദോഷകരമായ ഫ്ലെക്സ് ഷീറ്റുകളുടെ ഉപയോഗം പൂർണമായും ഒഴിവാക്കാനാകണം. 

വിപണിയുടെ അനിവാര്യതയാണ് പരസ്യപ്പലകകൾ. ചെലവുകുറച്ച് അനായാസം മിഴിവാർന്ന മുദ്രണം സാധ്യമാകുന്ന മാധ്യമങ്ങൾ ലഭ്യമാണെങ്കിൽ വിപണിക്ക് അതാണ് അനുഗ്രഹം. അങ്ങനെയാണ് ഫ്ലെക്സ് ഷീറ്റുകളിൽ കേരളത്തിന്റെ കാഴ്ച മറഞ്ഞത്. മണ്ണ് നശിച്ചുതുടങ്ങിയത്. താത്കാലിക നേട്ടങ്ങൾക്കായി മണ്ണിനെയും പ്രകൃതിയെയും നശിപ്പിക്കുന്ന ഒരു പരസ്യപ്രചാരണ മാധ്യമം വിവേകമുള്ള ആർക്കും സ്വീകരിക്കാനാവില്ല. എന്തിനും ഏതിനും ഫ്ലെക്സ് ബോർഡ് ഉയർത്തുന്നവർ ആത്മനിയന്ത്രണത്തിലൂടെ ഈ വിവേകം ഇനിയെങ്കിലും കാട്ടേണ്ടതുണ്ട്. സാങ്കേതികവിദ്യ അതിവേഗം വളരുന്ന ഇക്കാലത്ത് കൂടുതൽ മെച്ചപ്പെട്ട മാർഗങ്ങൾ കണ്ടെത്തി ഫ്ലെക്സ് ബോർഡ് നിർമാതാക്കൾക്ക്  താത്കാലിക നഷ്ടങ്ങൾ അതിജീവിക്കാവുന്നതേയുള്ളൂ. പരിസ്ഥിതിസംരക്ഷണം പ്രകൃതിയുടെയും പരിസ്ഥിതിവാദികളുടെയും മാത്രം ഉത്തരവാദിത്വമല്ല, എല്ലാവരും ഒരുമനസ്സോടെ നിർവഹിക്കേണ്ട കർത്തവ്യമാണിത്. ലോകമെങ്ങും ഈ മാർഗത്തിലാണിപ്പോൾ. സർക്കാരും  പൊതുസമൂഹവും ഫ്ളെക്സിന്റെ ദൂഷ്യങ്ങൾ തിരിച്ചറിയുന്ന ഇക്കാലത്ത് ഇതൊരു ഉപജീവനമാർഗമായി സ്വീകരിച്ചിരിക്കുന്നവർക്കും അത് ബോധ്യപ്പെട്ടിരിക്കുന്നുവെന്നത് പ്രശ്നപരിഹാരം അനായാസമാക്കുന്നുണ്ട്. അവരുടെ സഹകരണം ഉറപ്പാക്കുകയാണ് ഇനി വേണ്ടത്.  എല്ലാവരും  സർവാത്മനാ സഹകരിച്ചാലേ ഈ വിപത്തിൽനിന്ന് കേരളത്തിന് രക്ഷയുള്ളൂ. 

പി.വി.സി. ഫ്‌ളെക്‌സ് ഉപയോഗിച്ചാല്‍ പിഴയ്ക്ക് ശുപാര്‍ശ

തിരുവനന്തപുരം: തിരഞ്ഞെടുപ്പ് അടക്കമുള്ള പരസ്യ പ്രചാരണങ്ങള്‍ക്ക് പി.വി.സി. ഫ്‌ളെക്‌സ് ഉപയോഗിക്കാനോ പ്രിന്റുചെയ്യാനോ പാടില്ലെന്ന് വിദഗ്ധസമിതി. സര്‍ക്കാര്‍ പരിപാടികളുടെയും സ്വകാര്യ, മത ചടങ്ങുകളുടെയും പ്രചാരണത്തിന് പി.വി.സി. ഫ്‌ളെക്‌സ് ബോര്‍ഡോ ബാനറോ ഉപയോഗിക്കാന്‍ പാടില്ല. നിരോധനത്തിനുശേഷവും ഫ്‌ളെക്‌സ് അച്ചടിക്കുന്നവരില്‍നിന്നും സ്ഥാപിക്കുന്നവരില്‍നിന്നും ചതുരശ്ര അടിക്ക് 20 രൂപ നിരക്കില്‍ പിഴ ഈടാക്കാന്‍ സമിതി ശുപാര്‍ശചെയ്യുന്നു. പരിസ്ഥിതിക്ക് ദോഷകരമായ പി.വി.സി. ഫ്‌ളെക്‌സ് നിരോധിക്കുന്നതുസംബന്ധിച്ച് തദ്ദേശസ്വയംഭരണ അഡീഷണല്‍ ചീഫ് സെക്രട്ടറി അധ്യക്ഷനായ സമിതിയാണ് സര്‍ക്കാരിന് റിപ്പോര്‍ട്ട് സമര്‍പ്പിച്ചത്.

മറ്റു ശുപാര്‍ശകള്‍

ഫ്‌ളെക്‌സിനുപകരം പ്രകൃതിസൗഹൃദവും പുനരുപയോഗിക്കാവുന്നതുമായ പോളി എത്തിലിനോ കോട്ടണ്‍ തുണിയോ മാത്രമേ ഉപയോഗിക്കാവൂ. പ്ലാസ്റ്റിക് അടങ്ങിയ തുണി ഉപയോഗിക്കരുത്. അത്തരം വസ്തുക്കളില്‍ പ്രിന്റ് ചെയ്യുമ്പോള്‍ 'പുനരുപയോഗിക്കാവുന്നത്, പി.വി.സി. ഫ്രീ' എന്ന ലോഗോ ഉള്‍പ്പെടുത്തണം. ഉപയോഗം അവസാനിക്കുന്ന തീയതി, പ്രിന്റുചെയ്യുന്ന സ്ഥാപനത്തിന്റെ പേര്, പ്രിന്റിങ് നമ്പര്‍ എന്നിവയും രേഖപ്പെടുത്തണം. തീയതിവെച്ചുള്ള പ്രോഗ്രാം ബാനറുകള്‍ക്ക് പരിപാടി തീരുന്ന തീയതി ഉപയോഗം അവസാനിക്കുന്ന തീയതിയായും തീയതി വെയ്ക്കാത്ത സ്ഥാപനങ്ങളുടെയും മറ്റും പരസ്യങ്ങള്‍ക്ക് പരമാവധി 90 ദിവസം ഉപയോഗം കണക്കാക്കിയുള്ള തീയതിയുമാണ് നല്‍കേണ്ടത്. ബാനര്‍ പ്രിന്റുചെയ്യുന്ന ഉപഭോക്താവിന്റെ മുഴുവന്‍ വിവരങ്ങളും സ്ഥാപനത്തില്‍ സൂക്ഷിക്കണം.

ഉപയോഗം അവസാനിക്കുന്ന തീയതികഴിഞ്ഞ് മൂന്നു ദിവസത്തിനകം അവ സ്ഥാപിച്ചവര്‍ പ്രിന്റുചെയ്ത സ്ഥാപനത്തില്‍ തിരിച്ചേല്‍പ്പിക്കണം. ഇത്തരത്തില്‍ മാറ്റാത്തപക്ഷം ചതുരശ്ര അടിക്ക് നിശ്ചിത നിരക്കില്‍ സ്ഥാപിച്ചവരില്‍നിന്ന് അതത് തദ്ദേശ സ്ഥാപനങ്ങള്‍ക്ക് പിഴ ഈടാക്കാം. തിരിച്ചെത്തിക്കുന്ന ബാനറുകള്‍ പ്രിന്റുചെയ്ത സ്ഥാപനം ഉപഭോക്താവില്‍നിന്ന് തിരിച്ചെടുക്കണം.
പ്രിന്റിങ് തുകയ്ക്കുപുറമേ ചതുരശ്ര അടിക്ക് ഒരുരൂപ നിരക്കില്‍ മുന്‍കൂറായി ഉപഭോക്താവില്‍നിന്ന് ഈടാക്കാം. ബോര്‍ഡ് തിരിച്ചേല്‍പ്പിക്കുമ്പോള്‍ ആ തുക തിരികെനല്‍കണം. തിരിച്ചെടുത്ത ബാനറുകള്‍, പ്രിന്റിങ് സ്ഥാപനങ്ങള്‍ തങ്ങളുടെ വിതരണക്കാര്‍ക്ക് തിരികെനല്‍കണം. 

ഫ്‌ളെക്‌സ് നിരോധനത്തിന് സ്വാഗതം; ആശങ്കകള്‍ പരിഹരിച്ചുവേണമെന്ന് സര്‍വകക്ഷിയോഗം

തിരുവനന്തപുരം: ഫ്‌ലെക്‌സ് നിരോധനത്തെ സ്വാഗതംചെയ്ത് സര്‍വകക്ഷിയോഗം. അതേസമയം, നിരോധിക്കുന്നതിനുമുന്‍പ് ഈ മേഖലയിലുള്ളവരുടെ ആശങ്കകള്‍ പൂര്‍ണമായും പരിഹരിക്കണമെന്ന് രാഷ്ട്രീയപാര്‍ട്ടി പ്രതിനിധികള്‍ അഭിപ്രായപ്പെട്ടു. തൊഴില്‍ നഷ്ടപ്പെടാതെ ഈ മേഖലയില്‍ ജോലിചെയ്യുന്ന നൂറുകണക്കിനാളുകളുടെ പുനരധിവാസം സാധ്യമാകുന്ന തരത്തിലാവണം നിരോധനമെന്നും അവര്‍ നിര്‍ദേശിച്ചു. പരിസ്ഥിതിക്ക് ദോഷംചെയ്യുന്ന പോളിവിനൈല്‍ ക്ലോറൈഡ് (പി.വി.സി.) ഉപയോഗിച്ചുള്ള ഫ്‌ലെക്‌സ് ഉത്പന്നങ്ങളുടെ ഉത്പാദനവും ഉപയോഗവും നിരോധിക്കുന്നതുസംബന്ധിച്ച് അഭിപ്രായം ആരായാനാണ് മന്ത്രി കെ.ടി. ജലീലിന്റെ അധ്യക്ഷതയില്‍ സര്‍വകക്ഷിയോഗം ചേര്‍ന്നത്.

ഇതുസംബന്ധിച്ച് തദ്ദേശസ്വയംഭരണ അഡീഷണല്‍ ചീഫ് സെക്രട്ടറി അധ്യക്ഷനും നിയമ സെക്രട്ടറി, വ്യവസായ വാണിജ്യവകുപ്പ് ഡയറക്ടര്‍, ശുചിത്വ മിഷന്‍ എക്‌സിക്യുട്ടീവ് ഡയറക്ടര്‍ എന്നിവര്‍ അംഗങ്ങളുമായ സമിതി സമര്‍പ്പിച്ച റിപ്പോര്‍ട്ട് യോഗം ചര്‍ച്ചചെയ്തു. ഫ്‌ലെക്‌സ് ബോര്‍ഡുകള്‍ക്ക് പകരം, പുനരുപയോഗിക്കാവുന്നതും പി.വി.സി. മുക്തവുമായ പോളി എത്തിലിന്‍ നിര്‍മിത വസ്തുക്കളോ അതുപോലെയുള്ള വസ്തുക്കളോ ഉപയോഗിക്കണമെന്നാണ് സമിതി ശുപാര്‍ശ. പോളി എത്തിലിന്‍ പോലെയുള്ള വസ്തുക്കള്‍ ഉപയോഗിക്കുക വഴി ഫ്‌ലെക്‌സ് പ്രിന്റിങ് സ്ഥാപനങ്ങള്‍ക്കും ഉപഭോക്താക്കള്‍ക്കും സാമ്പത്തികനഷ്ടം ഉണ്ടാവില്ല. ഫ്‌ലെക്‌സ് നിര്‍മിക്കാനുപയോഗിക്കുന്ന പി.വി.സി. അപകടകാരിയായ രാസവസ്തുവാണെന്നും ഇത് കത്തിക്കുമ്പോള്‍ വിഷവാതകങ്ങളായ ഡയോക്‌സിനും ഫ്യൂറാനും പോലുള്ള വിഷവാതകങ്ങള്‍ ഉണ്ടാകുമെന്നും പഠനങ്ങള്‍ വ്യക്തമാക്കിയിട്ടുണ്ടെന്നും റിപ്പോര്‍ട്ടില്‍ ചൂണ്ടിക്കാട്ടുന്നുണ്ട്.

നിരോധനം സംബന്ധിച്ച ശാസ്ത്രീയവും പ്രായോഗികവുമായ വസ്തുതകള്‍ സംബന്ധിച്ച് രാഷ്ട്രീയ പാര്‍ട്ടികള്‍ക്ക് വിശദമായ വിവരം ലഭ്യമാക്കുമെന്ന് മന്ത്രി അറിയിച്ചു. ഇതിന്റെ അടിസ്ഥാനത്തില്‍ ലഭിക്കുന്ന അഭിപ്രായങ്ങളും നിര്‍ദേശങ്ങളും പരിഗണിച്ച് സര്‍ക്കാര്‍ ഉചിതമായ തീരുമാനമെടുക്കും. ഇതുസംബന്ധിച്ച് മുഖ്യമന്ത്രിയുടെ അധ്യക്ഷതയില്‍ പ്രത്യേകയോഗം ചേരാനും തിരുമാനിച്ചു. 
വിവിധ രാഷ്ട്രീയപാര്‍ട്ടി പ്രതിനിധികളെക്കൂടാതെ അഡീഷണല്‍ ചീഫ് സെക്രട്ടറി ടി.കെ. ജോസ്, സര്‍ക്കാരിന്റെ ശാസ്ത്ര ഉപദേഷ്ടാവായ എം.സി. ദത്തന്‍, ശുചിത്വമിഷന്‍ ഡയറക്ടര്‍ അജയ് കുമാര്‍ എന്നിവരും പങ്കെടുത്തു.

ഫ്‌ളക്‌സ് ആരോഗ്യത്തിനും പ്രകൃതിക്കും ദോഷം

ചെങ്ങന്നൂര്‍: രാജ്യത്തെ ഗ്രാമങ്ങളും നഗരങ്ങളും ഫ്‌ളക്‌സ് ബോര്‍ഡുകള്‍ കൊണ്ട് നിറഞ്ഞിരിക്കുകയാണ്. ഇതുണ്ടാക്കുന്ന പാരിസ്ഥിതിക ആഘാതത്തെപ്പറ്റി നിരവധിപഠനങ്ങള്‍ നടന്നിട്ടുണ്ട്. പക്ഷികളും മൃഗങ്ങളും മനുഷ്യര്‍തന്നെയും പ്ലാസ്റ്റിക് ഉള്ളില്‍ ചെന്ന് മാരകരോഗങ്ങള്‍ ബാധിക്കുകയോ മരണമടയുകയോ ചെയ്തിട്ടുണ്ട്. 
ഫ്‌ളക്‌സ് ഉപയോഗം വ്യാപകമായിട്ട് ഏതാണ്ട് 20 വര്‍ഷങ്ങളേ ആയിട്ടുള്ളൂ. ഫ്‌ളെക്‌സ് നിര്‍മിക്കുമ്പോള്‍ വിവിധയിനങ്ങള്‍ ലഭിക്കുന്നതിനും പ്ലാസ്റ്റിക് ഗുണം ലഭിക്കുന്നതിനും വേണ്ടി ഘനലോഹങ്ങള്‍ ചേര്‍ക്കുന്നുണ്ട്. പൂപ്പല്‍ശല്യം ഒഴിവാക്കുവാനായി കുമിള്‍നാശിനികളും മഴയില്‍ നശിക്കാതിരിക്കാന്‍ ലാമിനേറ്റ് ചെയ്യുമ്പോള്‍ ഫ്‌ളെക്‌സില്‍ ഉപയോഗിക്കുന്ന രാസപദാര്‍ഥങ്ങള്‍ വരെ അപകടകാരികളാണ്.

ഫ്‌ളെക്‌സില്‍നിന്നും പുറത്തുവരുന്ന ഘനലോഹങ്ങള്‍, മനുഷ്യശരീരത്തിലെ രാസാഗ്നികളുടെ പ്രവര്‍ത്തനം അവതാളത്തിലാക്കുന്നു. ലാമിനേഷന് ഉപയോഗിക്കുന്ന രാസപദാര്‍ഥങ്ങളും ആസ്മയ്ക്കും ശ്വാസകോശ രോഗങ്ങള്‍ക്കും ഇടവരുത്തുന്നു. നാഡീവ്യൂഹ തളര്‍ച്ചക്കും ഇത് കാരണമാകുന്നുണ്ടെന്ന് ഗവേഷണങ്ങള്‍ സാക്ഷ്യപ്പെടുത്തുന്നു. ഇന്ന് ഹൈദരാബാദ് പോലുള്ള പട്ടണങ്ങളില്‍ പ്രതിമാസം 750 ടണ്‍ എന്ന കണക്കിനാണ് ഫ്‌ളെക്‌സ് ഉപയോഗിച്ച് തള്ളുന്നത്. സംസ്ഥാനത്തെ നഗരങ്ങളിലും സ്ഥിതി വിഭിന്നമല്ല. ഫ്‌ളെക്‌സ് സിന്തറ്റിക് പോളിമര്‍ ഉപയോഗിച്ചശേഷം 80 ശതമാനവും കത്തിച്ചു കളയുകയാണ്. ഫ്‌ളെക്‌സ് ബോര്‍ഡുകള്‍ ഫുട്പാത്തിലൂടെപോലും ജനങ്ങള്‍ക്ക് നടക്കുവാന്‍ പറ്റാത്ത രീതിയില്‍ മാര്‍ഗ്ഗതടസ്സം സൃഷ്ടിക്കുന്നു എന്ന പ്രശ്‌നവുമുണ്ട്.

ഇത്രമാത്രം പ്രശ്‌നം സൃഷ്ടിക്കുന്ന ഫ്‌ളക്‌സ് തിരഞ്ഞെടുപ്പില്‍ ഒഴിവാക്കിക്കൂടെയെന്നാണ് ജനം ചോദിക്കുന്നത്. വോട്ടര്‍മാരുടെ പ്രതികരണം തുടരുന്നു...