vikramനരിക്കുനി: 2020-21 വര്‍ഷത്തെ ഇന്‍സ്പയര്‍ അവാര്‍ഡിനായി നരിക്കുനി ഗവ: ഹൈസ്‌കൂളിലെ ഒന്‍പതാം ക്ലാസ് വിദ്യാര്‍ത്ഥി വിക്രം സി.യുടെ ആശയം തിരഞ്ഞെടുത്തു. കേന്ദ്ര ശാസ്ത്ര-സാങ്കേതിക വകുപ്പും നാഷണല്‍ ഇന്നവേഷന്‍ ഫൗണ്ടേഷനും ചേര്‍ന്ന് ദേശീയ തലത്തില്‍ ആറാം ക്ലാസ് മുതല്‍ പത്താം ക്ലാസു വരെയുള്ള കുട്ടികളിലെ നൂതന ആശയങ്ങള്‍ക്ക് പ്രോത്സാഹനം നല്‍കാനാണ് ഇന്‍സ്പയര്‍ അവാര്‍ഡ് ഏര്‍പ്പെടുത്തിയിരിക്കുന്നത്.

മാലിന്യ-സംസ്‌കരണവുമായി ബന്ധപ്പെട്ട് വിക്രം സ്വന്തമായി വികസിപ്പിച്ചെടുത്ത ആശയമാണ് തിരഞ്ഞെടുക്കപ്പെട്ടത്. ഉപയോഗശൂന്യമായ പ്ലാസ്റ്റിക്കില്‍ നിന്നും കണ്ടന്‍സേഷന്‍ വഴി ക്രൂഡോയിലിനോട് സാദൃശ്യമുള്ള ഇന്ധനം ഉത്പാദിപ്പിക്കുന്നതാണ് പ്രൊജക്ട്. ഈ ഇന്ധനത്തില്‍നിന്ന് നിന്ന് പെട്രോള്‍, ഡീസല്‍, ടാര്‍, ടാര്‍പ്പെന്റയിന്‍ എന്നിവ വേര്‍തിരിച്ചെടുത്ത് മലിനീകരണം കുറച്ച് വാഹനമോടിക്കാന്‍ കഴിയുന്ന പ്രോജക്ടാണ് തയ്യാറാക്കിയത്. 10,000 രൂപയാണ് അവാര്‍ഡ് തുക.

പുന്നശ്ശേരി സ്വദേശി ചാത്തങ്ങാരി ഗോപാലകൃഷ്ണന്റെയും മഞ്ജുളയുടെയും മകനാണ് വിക്രം. സ്‌കൂള്‍ പി.ടി.എ.യും സ്റ്റാഫ് കൗണ്‍സിലും വിക്രമിനെ അഭിനന്ദിച്ചു.

Content Highlights: High school student wins inspire award, plastic waste