.jpg?$p=db6d928&f=16x10&w=852&q=0.8)
പ്രതീകാത്മകചിത്രം | Mathrubhumi archives
അടുത്ത കാലത്ത് നമ്മുടെ രാജ്യം നേരിടുന്ന പ്രധാന പ്രശ്‌നങ്ങളിലൊന്നാണ് ഊര്‍ജപ്രതിസന്ധി. കല്‍ക്കരിയുടെ ലഭ്യതക്കുറവും വേനലില്‍ ഉണ്ടായ വിതരണ തടസ്സങ്ങളും പ്രതിസന്ധിയുടെ ആക്കം കൂട്ടി. വൈദ്യുതി ദൗര്‍ലഭ്യതക്ക് ഒരു ശാശ്വത പരിഹാരമായി സര്‍ക്കാരും വ്യാവസായിക മേഖലയും ഒരുപോലെ ചൂണ്ടിക്കാണിക്കുന്ന പരിഹാരമാണ് ഗ്രീന്‍ എനര്‍ജി. അതില്‍ തന്നെ നമ്മുടെ കാലാവസ്ഥയ്ക്ക് ഏറ്റവും അനുയോജ്യമായ വൈദ്യുതി സ്രോതസ്സാണ് സൗരോര്‍ജം അഥവാ സോളാര്‍ എനര്‍ജി
ഗ്രീന്‍ എനര്‍ജി, സോളാര്‍ പവര്‍ ഫോര്‍ ഫ്യൂച്ചര്‍, സോളാര്‍ സബ്സിഡി എന്നെല്ലാം കേള്‍ക്കാത്തവര്‍ കുറവാണ്. എന്നാല്‍ സൗരോര്‍ജ പ്ലാന്റുകളുടെ സ്വീകാര്യത ഇനിയും ഉദ്ദേശിച്ച വിധത്തില്‍ വ്യപിച്ചിട്ടില്ല എന്നാണ് പ്രായോഗിക പരിശോധനയില്‍ കാണുന്നത്. സോളാറിന്റെ സ്വീകാര്യത വര്‍ധിപ്പിക്കാനായി കേന്ദ്രസര്‍ക്കാര്‍ പല സബ്സിഡി ആനുകൂല്യങ്ങളും അനുവദിച്ചു. തുടക്കത്തില്‍ 2022-ഓട് കൂടി നാല് ഗിഗാവാട്ട്‌സ് പുരപ്പുറ സൗരോര്‍ജ പദ്ധതി ആയിരുന്നു വിഭാവനം ചെയ്തതെങ്കിലും വിവിധ വൈദ്യുത വിതരണ കമ്പനികളുടെയും മറ്റു ഏജന്‍സികളുടെയും തമ്മിലുള്ള ഏകോപനമില്ലായ്മ കാരണം ഉദ്ദേശ്യ ലക്ഷ്യം കൈവരിച്ചില്ല. 2022 ആഗസ്റ്റ് രണ്ടിന് പ്രധാനമന്ത്രി ഉദ്ഘാടനം ചെയ്ത 'നാഷണല്‍ പോര്‍ട്ടല്‍ ഫോര്‍ റൂഫ് ടോപ്പ് സോളാര്‍ (National Portal for Rooftop Solar) സോളാര്‍ സബ്സിഡി സ്‌കീമിനെ കൂടുതല്‍ ജനകീയമാക്കുന്നതിനുള്ള ആദ്യ ചുവടുവെപ്പായി.
പുതിയ സോളാര്‍ സബ്സിഡി സ്‌കീം
നാഷണല്‍ സോളാര്‍ സബ്സിഡി സ്‌കീം ഡയറക്ട് ബാങ്ക് ട്രാന്‍സ്ഫര്‍ സ്‌കീം എന്നും അറിയപ്പെടുന്നുണ്ട്. പദ്ധതി അനുസരിച്ച് പുതിയ നാഷണല്‍ സോളാര്‍ പോര്‍ട്ടലില്‍ അപേക്ഷ സമര്‍പ്പിക്കുന്ന ഉപഭോക്താവിന് തന്റെ സോളാര്‍ പ്ലാന്റ് കമ്മീഷന്‍ ചെയ്ത് 30 ദിവസങ്ങള്‍ക്കുള്ളില്‍ ബാങ്ക് അക്കൗണ്ട് വഴി സബ്സിഡി ലഭിക്കുന്നതാണ്. അതായത് ഉപഭോക്താവിന്റെ വൈദ്യുത വിതരണ കമ്പനിയുടെ സബ്സിഡി സ്‌കീം നിലവിലില്ലെങ്കില്‍ പോലും സര്‍ക്കാര്‍ സബ്സിഡി ആനുകൂല്യം ഡയറക്ട് ട്രാന്‍സ്ഫര്‍ വഴി കൈപറ്റാവുന്നതാണ്.
കേന്ദ്ര പുനരുപയോഗ ഊര്‍ജ മന്ത്രാലയം (MNRE) സൗരോര്‍ജ സബ്സിഡി തുകയും നിര്‍ണയിച്ചിട്ടുണ്ട്. ഒരു കിലൊവാട്ട് മുതല്‍ മൂന്നു കിലോവാട്ട് വരെ കിലോവാട്ടിന് 14,588 രൂപയും നാല് മുതല്‍ പത്തു വരെ കിലോവാട്ടിനു 7,204 രൂപയും അതിന് മുകളില്‍ ഫിക്‌സഡ് സബ്സിഡി ആയ 94,882 രൂപയും ലഭിക്കും.
അപേക്ഷിക്കേണ്ട വിധം
ഉപഭോക്താക്കള്‍ക്ക് ആദ്യം അവരുടെ സിഎ നമ്പര്‍ പൂരിപ്പിച്ച് സോളാര്‍ സബ്സിഡി സ്‌കീമിന് അപേക്ഷിക്കാവുന്നതാണ്. അവരുടെ വൈദ്യുതി ബില്ലില്‍ സൂചിപ്പിച്ചിരിക്കുന്നതുപോലെ, അവര്‍ക്ക് ഗ്രിഡ് കണക്ഷനുള്ള ഡിസ്‌കോം തിരഞ്ഞെടുക്കുക, രജിസ്റ്റര്‍ ചെയ്ത മൊബൈല്‍ നമ്പറും രജിസ്റ്റര്‍ ചെയ്ത ഇമെയില്‍ ഐഡിയും പൂരിപ്പിക്കുക. ഉപഭോക്താവ് നാഷണല്‍ ഇന്‍ഫര്‍മേഷന്‍ സെന്റര്‍ വികസിപ്പിച്ച സര്‍ക്കാര്‍ സന്ദേശ ആപ്പും ഇന്‍സ്റ്റാള്‍ ചെയ്യേണ്ടതുണ്ട്, അതായത് Sandes ആപ്പ്. ഈ ആപ്പ് ഇന്‍സ്റ്റാള്‍ ചെയ്തുകഴിഞ്ഞാല്‍ രജിസ്റ്റര്‍ ചെയ്ത മൊബൈല്‍ നമ്പര്‍ ഉപയോഗിച്ച് ലോഗിന്‍ ചെയ്യുക.
ദേശീയ സൗരോര്‍ജ പോര്‍ട്ടലില്‍ അക്കൗണ്ട് ഉണ്ടാക്കുമ്പോള്‍ ആ വെബ്സൈറ്റില്‍ നിന്ന് തന്നെ ഉപഭോക്താവിന്റെ Sandes ആപ്പിലേക്ക് OTP ലഭിക്കുന്നതാണ്. OTP ഉപയോഗിച്ച് ആവശ്യമായ വിശദാംശങ്ങള്‍ പൂരിപ്പിച്ച് കഴിഞ്ഞാല്‍, അക്കൗണ്ട് പോര്‍ട്ടലില്‍ സൃഷ്ടിക്കപ്പെടും.അപേക്ഷാ ഫോം പൂരിപ്പിക്കുമ്പോള്‍ സൂചിപ്പിച്ച ഇമെയില്‍ ഐഡിയില്‍ ഉപഭോക്താവിന് അയച്ച വെരിഫിക്കേഷന്‍ മെയിലില്‍ നിന്ന് ഇമെയില്‍ ഐഡി സ്ഥിരീകരിക്കേണ്ടതുണ്ട്. അത് ചെയ്തുകഴിഞ്ഞാല്‍, സോളാര്‍ നിര്‍ദ്ദിഷ്ട ശേഷി, അനുവദിച്ച ലോഡ് (ഉപഭോക്താവിന്റെ വൈദ്യുതി ബില്ലില്‍ സൂചിപ്പിച്ചിരിക്കുന്നു), വീടിന്റെ ജിയോ സ്ഥാനം (രേഖാംശവും അക്ഷാംശവും) പോലുള്ള ആവശ്യമായ വിശദാംശങ്ങള്‍ പൂരിപ്പിക്കേണ്ടതുണ്ട്. ഉപഭോക്താവ് ഇതിനകം ഒരു പ്ലാന്റ് ഇന്‍സ്റ്റാള്‍ ചെയ്യുകയും പ്ലാന്റ് ശേഷി വര്‍ദ്ധിപ്പിക്കുകയും ചെയ്തിടുണ്ടെങ്കില്‍ പോര്‍ട്ടലില്‍ ആവശ്യമുള്ള കോളതില്‍ അത് സൂചിപ്പിക്കേണ്ടതുണ്ട്.
തുടര്‍ന്ന് കഴിഞ്ഞ ആറ് മാസത്തെ ഏതെങ്കിലും വൈദ്യുതി ബില്‍ അപ്ലോഡ് ചെയ്യുകയും അതിനു ശേഷം അപേക്ഷ സമര്‍പ്പിക്കുകയും വേണം. 15 ദിവസത്തിനുള്ളില്‍ സാധ്യതാ മൂല്യനിര്‍ണ്ണയ അംഗീകാരം വരും, അതിനുശേഷം ഉപഭോക്താവ് തിരഞ്ഞെടുക്കുന്ന ഏതെങ്കിലും വെണ്ടര്‍മാരില്‍ നിന്ന് സോളാര്‍ പവര്‍ പ്ലാന്റ് സ്ഥാപിക്കുകയും ആവശ്യമായ ബാങ്ക് വിശദാംശങ്ങള്‍ സഹിതം ഇന്‍സ്റ്റാളേഷന്‍ വിശദാംശങ്ങള്‍ പൂരിപ്പിക്കുകയും ചെയ്യാം. തുടര്‍ന്ന് ഉപഭോക്താവിന്റെ ഡിസ്‌കോമിന്റെ അംഗീകൃത പ്രതിനിധി പ്ലാന്റിന്റെ പരിശോധന നടത്തും. അത് ചെയ്തുകഴിഞ് നെറ്റ് മീറ്ററും ഇന്‍സ്റ്റാള്‍ ചെയ്തുകഴിഞ്ഞാല്‍, പ്ലാന്റിന്റെ കമ്മീഷനിംഗ് റിപ്പോര്‍ട്ട് ജനറേറ്റുചെയ്യുകയും ഉപഭോക്താവിന്റെ അപേക്ഷ സബ്സിഡി അഭ്യര്‍ത്ഥനയിലേക്ക് നീങ്ങുകയും 30 ദിവസത്തിനുള്ളില്‍ സബ്സിഡി ബാങ്ക് അക്കൗണ്ടിലേക്ക് നേരിട്ട് വിതരണം ചെയ്യുകയും ചെയ്യും.
എല്ലാ ഉപഭോക്താക്കള്‍ക്കും ഒരു പോര്‍ട്ടലില്‍ നിന്ന് ഒറ്റത്തവണ പരിഹാരം നേടാനും കാലതാമസം ഇല്ലാതാക്കാനും മള്‍ട്ടി-പാര്‍ട്ടി ലൈസണിംഗ് പ്രശ്നത്തില്‍ നിന്ന് മുക്തി നേടാനും കഴിയുക വഴി റെസിഡന്‍ഷ്യല്‍ മേഖലയില്‍ സോളാര്‍ സ്ഥാപിക്കുന്നത് വര്‍ദ്ധിപ്പിക്കുന്നതിന് പുതിയ സോളാര്‍ സ്‌കീം സഹായിക്കും എന്ന് കരുതാം.
(ഊട്ടി വെല്ലിങ്ടണ്‍ മദ്രാസ് റെജിമെന്റ് സെന്ററിലെ ഓഫീസറാണ് ലേഖകന്‍)
Content Highlights: Solar Panel Subsidy, green energy, India, National Portal for Rooftop Solar, solar scheme
Also Watch
IN CASE YOU MISSED IT
.jpg?$p=751b393&q=0.8&f=16x11&w=104)
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..