കോഴിക്കോട്: വോട്ടര്‍മാരുമായുള്ള സമ്പര്‍ക്കം വര്‍ധിപ്പിച്ച് തിരഞ്ഞെടുപ്പില്‍ നേട്ടംകൊയ്യാന്‍ ബി.ജെ.പി. ഒരുങ്ങുന്നു. ഇതിനായി ഒരു ബൂത്തില്‍ പതിനൊന്നംഗ തിരഞ്ഞെടുപ്പ് കമ്മിറ്റി രണ്ടാഴ്ചയ്ക്കകം നിലവില്‍വരും.
വോട്ടര്‍പട്ടികയുടെ പേജുതിരിച്ച് ഓരോരുത്തര്‍ക്കും ചുമതല നല്‍കും. ആ പേജിലെ വോട്ടര്‍മാരെ കാണുക, അവരുമായി നിരന്തരം സംവദിക്കുക തുടങ്ങിയവ പേജിന്റെ ചുമതലക്കാരന്റെ ഉത്തരവാദിത്വമാകും. മോദിസര്‍ക്കാരിന്റെ വികസനപ്രവര്‍ത്തനങ്ങളെക്കുറിച്ചും ക്ഷേമപ്രവര്‍ത്തനങ്ങളെക്കുറിച്ചും ഈ സമ്പര്‍ക്കത്തിനിടെ വോട്ടര്‍മാരെ ബോധ്യപ്പെടുത്തണം. നിരന്തരമുള്ള സമ്പര്‍ക്കത്തിലൂടെ പുതുതായി വോട്ടര്‍മാരെ സ്വാധീനിക്കുകയാണ് ലക്ഷ്യം.
കഴിഞ്ഞദിവസം കേരളത്തിലെത്തിയ ബി.ജെ.പി. ദേശീയ അധ്യക്ഷന്‍ ജെ.പി. നഡ്ഡയുടെ നിര്‍ദേശപ്രകാരമാണ് ഈ നീക്കം. പഴയതുപോലെ വോട്ടുശതമാനത്തെക്കുറിച്ചോ ഇരുമുന്നണികള്‍ക്കിടയില്‍ക്കിടന്ന് ശ്വാസം മുട്ടുന്നതിനെക്കുറിച്ചോ പറയേണ്ടതില്ലെന്ന് വ്യക്തമായി നിര്‍ദേശിച്ചാണ് നഡ്ഡ മടങ്ങിയത്.
കേരള രാഷ്ട്രീയത്തില്‍ അവഗണിക്കാനാവാത്ത സാന്നിധ്യമാണ് ബി.ജെ.പി.യെന്ന് വോട്ടര്‍മാരെ ബോധ്യപ്പെടുത്തണം. അതിനനുസരിച്ച് പ്രാദേശികതലംമുതല്‍ പ്രചാരണവും ജനസമ്പര്‍ക്കവും സജീവമാക്കി മാറ്റാനും ദേശീയ അധ്യക്ഷന്‍ നിര്‍ദേശിച്ചു.
ഒരു മണ്ഡലത്തില്‍ മൂന്ന് പൊതുപരിപാടി
നിയമസഭാ മണ്ഡലങ്ങളില്‍ ചുരുങ്ങിയത് മൂന്ന് പൊതുപരിപാടികള്‍ നടത്താനും നിര്‍ദേശമുണ്ട്. ഒന്ന് മഹിളാമോര്‍ച്ചയും മറ്റൊന്ന് യുവമോര്‍ച്ചയുമായിരിക്കും നടത്തേണ്ടത്. സംസ്ഥാന അധ്യക്ഷന്‍ കെ. സുരേന്ദ്രന്‍ നയിക്കുന്ന എന്‍.ഡി.എ. ജാഥ വന്‍വിജയമാക്കാനുള്ള ഒരുക്കങ്ങളും പ്രാദേശികഘടകങ്ങള്‍ തുടങ്ങണം. ജാഥ കടന്നുപോകുന്ന സ്ഥലങ്ങളില്‍ ഒരു മണ്ഡലത്തില്‍ ഒന്നെന്ന രീതിയില്‍ വിപുലമായ പൊതുയോഗങ്ങള്‍ ഉണ്ടാവും. ജാഥ പോകാത്തയിടങ്ങളില്‍ പൊതുയോഗങ്ങള്‍ നടത്തണമെന്നും ദേശീയ അധ്യക്ഷന്‍ നിര്‍ദേശിക്കുന്നു.
Content Highlights: Kerala assembly election 2021; BJP strategy
