Shiv Senaകൊല്‍ക്കത്ത:  മഹാരാഷ്ട്രയില്‍ എന്‍ഡിഎ സഖ്യത്തിന്റെ ഭാഗമായി നില്‍ക്കുമ്പോഴും ബംഗാളില്‍ ഒറ്റയ്ക്ക് മത്സരിക്കാനൊരുങ്ങ് ശിവസേന. ബംഗാളിലെ 11 സീറ്റുകളിലേക്കുള്ള സ്ഥാനാര്‍ഥികളെ ശിവസേന പ്രഖ്യാപിക്കുകയും ചെയ്തു. അടുത്ത കുറച്ചു ദിവസങ്ങള്‍ക്കുള്ളില്‍ നാലു സീറ്റുകളിലേക്കുള്ള സ്ഥാനാര്‍ഥികളെ കൂടി പ്രഖ്യാപിക്കുമെന്നാണ് ശിവസേന അറിയിച്ചിരിക്കുന്നത്.

താംലുക്, കോണ്‍ടെയ്, മിഡ്‌നാപുര്‍, നോര്‍ത്ത് കൊല്‍ക്കത്ത, പുരുലിയ, ബാരക്‌പോര്‍, ബങ്കുര,ബിഷ്ണുപുര്‍,നോര്‍ത്ത് മാല്‍ഡ,ജാധവ്പുര്‍ തുടങ്ങിയ മണ്ഡലങ്ങളിലേക്കുള്ള സ്ഥാനാര്‍ഥികളെയാണ് ശിവസേന പ്രഖ്യാപിച്ചിരിക്കുന്നത്. 

ബംഗാളിലെ ബിജെപി തൃണമൂല്‍ കോണ്‍ഗ്രസിന്റെ മറ്റൊരു ഭാഗമായി മാറിയെന്ന് ശിവസേന ആരോപിച്ചു.  സംസ്ഥാനത്തെ ബിജെപി നേതൃത്വത്തിന് തൃണമൂലിനെ നേരിടാന്‍ സാധിക്കില്ലെന്നും അതിനാലാണ് ശിവസേന മത്സരിക്കാന്‍ രംഗത്തിറങ്ങുന്നതെന്നും പാര്‍ട്ടി സംസ്ഥാന ജനറല്‍ സെക്രട്ടറി അശോക് സര്‍ക്കാര്‍ പറയുന്നു.

കളങ്കിതരായ എല്ലാ തൃണമൂല്‍ നേതാക്കളും ബിജെപിയിലെത്തി. അതിനാല്‍ തൃണമൂലിന്റെ മറ്റൊരു പതിപ്പായി ബിജെപി മാറിയെന്ന് ശിവസേന ആരോപിച്ചു. തൃണമൂല്‍ കോണ്‍ഗ്രസിന്റെ സിറ്റിങ് എംഎല്‍എമാരും എംപിമാരും അടക്കം നിരവധി നേതാക്കള്‍ അടുത്തിടെ ബിജെപിയില്‍ ചേര്‍ന്നിരുന്നു. ഇതു പരാമര്‍ശിച്ചാണ് ശിവസേനയുടെ ആരോപണം. 

ബിജെപി സംസ്ഥാന അധ്യക്ഷന്‍ ദിലീപ് ഘോഷ് മത്സരിക്കുന്ന മിഡ്‌നാപ്പുര്‍ മണ്ഡലത്തില്‍ സ്ഥാനാര്‍ഥിയെ നിര്‍ത്തുമെന്നാണ് ശിവസേന അറിയിച്ചിട്ടുണ്ട്. 2016ലെ നിയമസഭാ തിരഞ്ഞെടുപ്പില്‍ 18 സീറ്റുകളില്‍ ശിവസേന മത്സരിച്ചിരുന്നു. എന്നാല്‍ തിരഞ്ഞെടുപ്പില്‍ കാര്യമായ ചലനം ഉണ്ടാക്കാന്‍ ശിവസേനയ്ക്ക് സാധിച്ചിരുന്നില്ല.

Content Highlights: Shiv Sena To Contest Lok Sabha Seats In West Bengal