കോഴിക്കോട്: എന്‍എസ്എസിനെ തള്ളി ആര്‍എസ്എസിനെ പുല്‍കിയതിന്റെ താല്‍കാലിക വിജയമാണ് വട്ടിയൂര്‍ക്കാവില്‍ എല്‍ഡിഎഫിനുണ്ടായതെന്ന് കെ. മുരളീധരന്‍ എംപി. ആര്‍എസ്എസ് വോട്ടുകള്‍ സിപിഎമ്മിന് മറിച്ചതാണ് എല്‍ഡിഎഫ് സ്ഥാനാര്‍ഥിയുടെ വിജയത്തിന് കാരണമെന്നും ഇക്കാര്യം താന്‍ നേരത്തെ പറഞ്ഞിരുന്നതാണെന്നും മുരളീധരന്‍ പറഞ്ഞു.
വിശ്വാസ സംരക്ഷണത്തിന്റെ പേരില്‍ ശക്തമായ നിലപാടെടുത്തത് യുഡിഎഫാണ്. അതുകൊണ്ടാണ് എന്‍എസ്എസ് യുഡിഎഫിന് അനുകൂലമായി നിലപാടെടുത്തത്. എന്‍എസ്എസിന്റെ ഈ മതേതര നിലപാടാണ് ആര്‍എസ്എസിന് പ്രകോപനം ഉണ്ടാക്കിയത്. മതേതരത്വം പറയുന്ന ഇടതുപക്ഷം എന്‍എസ്എസിനെ തള്ളി ആര്‍എസ്എസിനെ സ്വീകരിച്ചതിന്റെ താല്‍കാലിക വിജയമാണ് വട്ടിയൂര്‍ക്കാവില്‍ ഉണ്ടായത്. തിരഞ്ഞെടുപ്പില്‍ പരാജയപ്പെട്ടു എന്നതുകൊണ്ട് എന്‍എസ്എസിനെ തള്ളിപ്പറയുന്നത് ശരിയല്ല.
ആര്‍എസ്എസിന്റെ വോട്ടുകള്‍ സിപിഎമ്മിലേയ്ക്ക് മറിക്കും എന്ന് താനും പ്രതിപക്ഷ നേതാവും കെപിസിസി പ്രസിഡന്റും പറഞ്ഞിരുന്നു. എന്നാല്‍ സ്ഥാനാര്‍ഥിക്ക് ആ വിവിരം കിട്ടാതിരുന്നതുകൊണ്ടാകാം അദ്ദേഹം അത് നിഷേധിച്ചതോടെ ജനം അക്കാര്യം ഗൗരവത്തിലെടുത്തില്ല. കുമ്മനം രാജശേഖരന്‍ മാറി സുരേഷ് സ്ഥാനാര്‍ഥിയായി വന്നതോടെ ബിജെപി രംഗത്തുനിന്ന് അപ്രത്യക്ഷമായി.
മന്ത്രി കടകംപള്ളി സുരേന്ദ്രന്റെ നേതൃത്വത്തില്‍ പച്ചയായി ജാതി പറഞ്ഞാണ് ഈഴവ കുടുംബങ്ങളില്‍ ചെന്ന് വോട്ട് പിടിച്ചത്. എന്‍എസ്എസ് അല്ല, തങ്ങളാണ് ഇവിടെ തീരുമാനമെടുക്കുന്നതെന്ന് കാണിക്കാന്‍ അവര്‍ സംഘടിതമായി വോട്ട് മറിച്ചു. വോട്ട് മറിക്കലാണ് വട്ടിയൂര്‍ക്കാവില്‍ സംഭവിച്ചതെന്ന കാര്യത്തില്‍ സംശയമില്ല.
അതേസമയം, യുഡിഎഫിനെ തുണച്ചിരുന്ന പരമ്പരാഗത വോട്ടര്‍മാരില്‍ ഒരു മനംമാറ്റം ഉണ്ടായിട്ടുണ്ട്. അക്കാര്യം പരിശോധിച്ച് തിരുത്തും. പാര്‍ട്ടിയിലെ ആഭ്യന്തര പ്രശ്‌നങ്ങളൊന്നും കാര്യമായി ബാധിച്ചിട്ടില്ല. ഞാന്‍ മത്സരിച്ചപ്പോള്‍ നടന്നതിനേക്കാള്‍ നല്ല പ്രവര്‍ത്തനം ഇത്തവണ അവിടെ നടന്നിട്ടുണ്ട്. എന്നാല്‍ അത് വോട്ടാക്കി മാറ്റാന്‍ കഴിഞ്ഞില്ല.
തിരഞ്ഞെടുപ്പ് മുന്‍കൂട്ടി കണ്ട് പ്രശാന്തിനെ ബ്രോ മേയര്‍ എന്ന് അവതരിപ്പിച്ചു. കഴിഞ്ഞ വര്‍ഷം അയച്ചതിന്റെ പകുതി സാധനങ്ങളേ ഇക്കാര്യം അയച്ചിട്ടുള്ളൂ. അതിന് മേയര്‍ എന്ന നിലയില്‍ കൊടിവീശുക മാത്രമേ പ്രശാന്ത് ചെയ്തിട്ടുള്ളൂ. ചെറുപ്പക്കാരന്‍ സ്ഥാനാര്‍ഥിയായതിന്റെ മെച്ചം അദ്ദേഹത്തിന് കിട്ടിയിട്ടുണ്ടെന്നത് സത്യമാണ്. എന്നാല്‍ അതൊന്നും ഇത്രയധികം ഭൂരിപക്ഷം ഉണ്ടാക്കാനുള്ള കാരണങ്ങളല്ല. കോണ്‍ഗ്രസിന്റേത് മികച്ച സ്ഥാനാര്‍ഥിതന്നെയായിരുന്നു. എന്നാല്‍ ജനങ്ങള്‍ക്കിടയില്‍ അദ്ദേഹത്തിന് ബന്ധം കുറവായിരുന്നു. ഇതൊക്കെയാണ് വട്ടിയൂര്‍ക്കാവില്‍ എല്‍ഡിഎഫിന്റെ വിജയത്തിലേയ്ക്ക് നയിച്ചത്.
വട്ടിയൂര്‍ക്കാവിലെ സ്ഥാനാര്‍ഥിയുടെ പേര് താന്‍ നിര്‍ദേശിച്ചിട്ടില്ലെന്നും മുരളീധരന്‍ പറഞ്ഞു. കൂട്ടായിട്ടുള്ള അഭിപ്രായപ്രകാരമാണ് ആദ്യം പീതാംബരക്കുറുപ്പിന്റെ പേര് ഉയര്‍ന്നുവന്നത്. എന്നാല്‍ അതിനെതിരെ ചില കോണുകളില്‍നിന്ന് എതിര്‍പ്പുണ്ടായി. തുടര്‍ന്നാണ് കെ. മോഹന്‍കുമാറിന്റെ പേര് സ്ഥാനാര്‍ഥിയാക്കിയത്. അത് താന്‍ പൂര്‍ണമായി അംഗീകരിച്ച് അദ്ദേഹത്തിനായി പ്രവര്‍ത്തിക്കുകയും ചെയ്‌തെന്നും അദ്ദേഹം പറഞ്ഞു.
അരൂരില്‍ എല്‍ഡിഎഫിന്റെ പരമ്പരാഗത കോട്ടയാണ് തകര്‍ക്കപ്പെട്ടത്. ഷാനിമോള്‍ ഉസ്മാന്റെ വിജയം യുഡിഎഫിന്റെ വലിയ നേട്ടമാണ്. തിരഞ്ഞെടുപ്പ് പരാജയത്തില്‍ പാര്‍ട്ടിക്ക് വീഴ്ചയുണ്ടായിട്ടുണ്ട്. എന്നാല്‍ അതിന്റെ ഉത്തരവാദിത്വം ഏതെങ്കിലും വ്യക്തിയുടെ പേരില്‍ കെട്ടിവെക്കുന്നത് ശരിയല്ല. പാര്‍ട്ടിയുടെ സംഘടനാ സംവിധാനം കൂടുതല്‍ കാര്യക്ഷമമാക്കേണ്ടത് ആവശ്യമാണെന്നും മുരളീധരന്‍ പറഞ്ഞു.
Content Highlights: k muraleedharan reacts on byelection result in vattiyoorkavu
