സീതാറാം യെച്ചൂരി? പ്രധാനമന്ത്രിയും കേന്ദ്രമന്ത്രിമാരും കേരളത്തിൽ വരുന്നത് ബി.ജെ.പി.യെ ജയിപ്പിക്കാനല്ല മറിച്ച് എൽ.ഡി.എഫിൻറെ തോൽവി ഉറപ്പാക്കാനാണെന്നാണ് താങ്കൾ പറയുന്നത്. എന്തുകൊണ്ടാണിത്

ഇത് പുതുമയുള്ള കാര്യമല്ല. 1960ൽ പട്ടാമ്പിയിൽ ഇ.എം.എസ്. മത്സരിക്കുന്ന കാലത്തുതന്നെ തുടങ്ങിയതാണ്. ഇ.എം.എസ്സിനെ തോല്പിക്കാൻ നെഹ്രുവും ഇന്ദിരയും മൊറാർജിയും മാത്രമല്ല, ആർ.എസ്.എസ്. ആചാര്യൻ ദീൻദയാൽ ഉപാധ്യായയും ലീഗ് നേതാക്കളുമൊക്കെ പ്രവർത്തിച്ചിരുന്നു. പിന്നീട് പലപ്പോഴും യു.ഡി.എഫ്.-ബി.ജെ.പി.-ആർ.എസ്.എസ്. സഖ്യമുണ്ടായി. ബി.ജെ.പി.യുടെ ശ്രമം എങ്ങനെയും നിയമസഭയിൽ കയറിപ്പറ്റുക എന്നതാണ്. അതിനാണ് ഇത്തരം ഒത്തുകളികൾ.
 

? ഈ ഒത്തുകളി വിജയിക്കുമോ, അതിനെ പ്രതിരോധിക്കാൻ എന്തുചെയ്യാനാവും

(മറുപടി ചിരിയിൽ തുടങ്ങി) ലോക്‌സഭാ തിരഞ്ഞെടുപ്പിൽ 12 ശതമാനത്തോളവും തദ്ദേശ തിരഞ്ഞെടുപ്പിൽ 14 ശതമാനത്തോളവും വോട്ട് ബി.ജെ.പി.ക്ക് കിട്ടിയിട്ടുണ്ട്. അത് കുറഞ്ഞാൽ അതിനർഥം ഒത്തുകളി നടന്നുവെന്നാണ്. ഇത്തരം ഒത്തുകളിയും വികൃതികളും ജനം പരാജയപ്പെടുത്തണം. അതിനാണ് എൽ.ഡി.എഫിന് വോട്ടുചെയ്യാൻ ജനങ്ങളോട് അഭ്യർഥിക്കുന്നത്.
 

? മതനിരപേക്ഷ ശക്തികളെ ഒന്നിപ്പിക്കാൻ കോൺഗ്രസ്സിനേ കഴിയൂ എന്ന എ.കെ. ആന്റണിയുടെ പ്രസ്താവന ഒരു തന്ത്രമാണോ

ഇത്തരം പ്രസ്താവനയ്ക്കൊന്നും ഒത്തുകളി തടയാനാവില്ല. കോൺഗ്രസ്സിന്റെ അഴിമതിയുടെയും ഭരണരീതിയുടെയുമൊക്കെ ഫലമായാണ് മോദിസർക്കാർ അധികാരത്തിൽ വന്നത്. അതുകൊണ്ടുതന്നെ വർഗീയശക്തികൾക്കെതിരായ പോരാട്ടത്തിൽ കോൺഗ്രസ് ഒരിക്കലും സ്ഥിരതയാർന്ന കക്ഷിയല്ല.

? മെച്ചപ്പെട്ട ഒരു പ്രകടനപത്രികയുണ്ടാക്കിയിട്ടും അതൊന്നും ചർച്ചചെയ്യാതെ ഇടതുനേതാക്കൾപോലും പ്രചാരണ പരിപാടികളിൽ വിവാദ വിഷയങ്ങൾ മാത്രം പറയുന്നതെന്തുകൊണ്ടാണ്

മാധ്യമങ്ങൾ വിവാദ വിഷയങ്ങൾ മാത്രമാണ് പ്രധാന അജൻഡയായി ചർച്ചചെയ്യുന്നത്. മെച്ചപ്പെട്ട കേരളം സൃഷ്ടിക്കുന്നതിനായി പ്രതീക്ഷയേകുന്ന നയമാണ് എൽ.ഡി.എഫിന്റേത്. പ്രകടനപത്രികയുടെ ഊന്നൽ ഇതാണ്. പൊതുയോഗങ്ങളിൽ സഖാക്കൾ പറയുന്നതും ഇതാണ്.

? ബി.ജെ.പി. എത്ര വോട്ടുപിടിക്കും അത് എൽ.ഡി.എഫിനെയും യു.ഡി.എഫിനെയും എങ്ങനെ ബാധിക്കും എന്നതാണ് എല്ലാവരും സംസാരിക്കുന്നത്. ഇതേപ്പറ്റി എന്താണ് പറയുന്നത്

സീറ്റുകളേക്കാൾ നീക്കുപോക്കുകളാണ് ബി.ജെ.പി. നടത്തിപ്പോരുന്നത്. ഇതുവരെ ബി.ജെ.പി. കേരള നിയമസഭയിൽ എത്തിയിട്ടില്ല. ഇത്തവണ അവർക്ക് എങ്ങനെയെങ്കിലും കയറിപ്പറ്റണം. ഒത്തുകളിയുണ്ടെങ്കിൽ അവർക്ക് സീറ്റാണ് പ്രധാനം, വോട്ടുവിഹിതമല്ല. അങ്ങനെയെങ്കിൽ തിരിച്ച് ആർ.എസ്.എസ്., യു.ഡി.എഫ്. സ്ഥാനാർഥികളെ പിന്തുണയ്ക്കും.