ഈ തിരഞ്ഞെടുപ്പില്‍ മാധ്യമപ്രവര്‍ത്തകര്‍ക്ക് ജനം വിധിയെഴുതിയതിങ്ങനെ....

അടിതെറ്റിയാല്‍ നികേഷും

nikesh

ന്യൂസ് ഡെസ്‌കിലെ അസാമാന്യ എനര്‍ജി ഒട്ടും മായാതെയായിരുന്നു പ്രമുഖ മാധ്യമപ്രവര്‍ത്തകന്‍ നികേഷ് കുമാര്‍ അഴീക്കോട് മണ്ഡലത്തില്‍ പ്രചാരണത്തിനെത്തിയത്. അച്ഛന്റെ രാഷ്ട്രീയ പാരമ്പര്യത്തോടൊപ്പം ഊര്‍ജസ്വലനായ മാധ്യമപ്രവര്‍ത്തകനെന്ന അംഗീകാരവും നികേഷിന്റെ മുതല്‍ക്കൂട്ടായിരുന്നു. ഓരോ ദിവസവും അഞ്ഞൂറോളം വീടുകള്‍ കയറിയ നികേഷിനൊപ്പമോടി സഖാക്കള്‍ നന്നായി കിതച്ചു.. എന്നാല്‍ പ്രതീക്ഷകള്‍ക്ക് തിരിച്ചടിയായി 2287 വോട്ടിന്റെ ഭൂരിപക്ഷം നേടി യു.ഡി.എഫ് സ്ഥാനാര്‍ത്ഥി കെ.എം.ഷാജിയാണ് അഴീക്കോട് വിജയിച്ചത്.

60795 വോട്ട് നേടി നികേഷ് കുമാര്‍ രണ്ടാംസ്ഥാനത്തെത്തും ബി.ജെ.പി സ്ഥാനാര്‍ത്ഥി അഡ്വ. എ.വി.കേശവന്‍ 12,580 വോട്ട് നേടി മൂന്നാമതും എത്തി.

വാര്‍ത്താസ്റ്റുഡിയോയുടെ തണുപ്പില്‍ നിന്ന് അഴീക്കോടിന്റെ മേടച്ചൂടിലേയ്‌ക്കെത്തിയ നികേഷിന് രാഷ്ട്രീയക്കാരന്റെ മെയ്‌വഴക്കം നേടാന്‍ അത്ര സമയം വേണ്ടിവന്നില്ല. വ്യത്യസ്തമായ പ്രചാരണമാര്‍ഗങ്ങളുമായിട്ടായിരുന്നു നികേഷ് കുമാര്‍ അഴീക്കോട് മണ്ഡലത്തില്‍ എത്തിയിരുന്നത്. വാര്‍ത്താ അവതരണ രീതിയിലുളള ദൃശ്യപരമ്പര ഒരുക്കിയാണ് ദിവസവും രാവിലെ നികേഷ് തന്റെ പ്രചാരണം ആരംഭിച്ചിരുന്നത്. പേര് ഗുഡ്‌മോണിങ് അഴീക്കോട്. ഒരു മണിക്കൂറോളം ഇൗ പരിപാടിയുടെ ഷൂട്ടിങിനായി നികേഷ് മാറ്റിവെച്ചിരുന്നു. വാട്‌സ്ആപ്പിന്റേയും ഫെയ്‌സ്ബുക്കിന്റേയും സഹായത്തോടെയാണ് ഈ വാര്‍ത്താചിത്രം പ്രചരിപ്പിച്ചത്. 

അതിനിടയിലായിരുന്നു കിണറ്റിലിറങ്ങിയെടുത്ത വീഡിയോ  വിവാദമായത്. അഴീക്കോട്ടെ കുടിവെള്ള പ്രശ്‌നം ജനങ്ങളെ മനസ്സിലാക്കുന്നതിനായി കിണറ്റിലിറങ്ങുകയും അതിന്റെ വീഡിയോ ഫെയ്‌സ്ബുക്കില്‍ വൈറലാകുകയും ചെയ്തതോടെ ഒട്ടേറെ പരിഹാസമാണ് നികേഷിന് ലഭിച്ചത്. 

എന്നാല്‍ പ്രശ്‌നപരിഹാരത്തിനായി ഏത് കിണറ്റിലിറങ്ങാനും എന്ത് അഭ്യാസം കാണിക്കാനും താന്‍ ജനങ്ങള്‍ക്കൊപ്പമുണ്ടാകുമെന്ന് കുറിച്ച് ഫെയ്‌സ്ബുക്കിലൂടെ നികേഷ് തന്റെ മറുപടി അറിയിച്ചു. 

അതിനിടയിലായിരുന്നു നികേഷ് കുമാറിനെതിരെ രൂക്ഷവിമര്‍ശനവുമായി എം.വി.ആറിന്റെ സഹോദരി എം.വി. ലക്ഷ്മിയമ്മ രംഗത്ത് വന്നത്.പണം വാങ്ങിയാണ് നികേഷ് കുമാര്‍ സ്ഥാനാര്‍ത്ഥിയായതെന്നും താനോ തന്റെ കുടുംബമോ നികേഷിന് വോട്ട് ചെയ്യില്ലെന്നും ലക്ഷ്മിയമ്മ പറഞ്ഞിരുന്നു.

കന്നിയങ്കത്തില്‍ വിജയം കൊയ്ത് വീണാജോര്‍ജ്

veena

നീണ്ട ചര്‍ച്ചകള്‍ക്ക് ശേഷമായിരുന്നു പത്തനംതിട്ട ജില്ലയിലെ ആറന്മുള സീറ്റില്‍ മാധ്യമപ്രവര്‍ത്തക വീണാ ജോര്‍ജിനെ സ്ഥാനാര്‍ത്ഥിയാക്കാന്‍ സി.പി.എം ജില്ലാ നേതൃത്വം തീരുമാനിച്ചത്. സ്ഥാനാര്‍ത്ഥി നിര്‍ണയത്തിന്റെ ആദ്യഘട്ടത്തില്‍ ഏഴോളം പേരുകളായിരുന്നു പാര്‍ട്ടി  ജില്ലാ ഘടകം സംസ്ഥാന സെക്രട്ടേറിയറ്റിന് നിര്‍ദ്ദേശിച്ചിരുന്നത്. എന്നാല്‍ ഇതില്‍ അമര്‍ഷം രേഖപ്പെടുത്തിയ സംസ്ഥാന നേതൃത്വം രണ്ട് പേരുടെ ചുരുക്കപ്പട്ടിക സമര്‍പ്പിക്കാന്‍ ആവശ്യപ്പെടുകയായിരുന്നു. 

മുന്‍ എം.എല്‍.എ കെ.സി. രാജഗോപാല്‍, സാമൂഹിക പ്രവര്‍ത്തക എം.എസ്.സുനില്‍, ഓമലൂര്‍ ശങ്കരന്‍ തുടങ്ങിയ നേതാക്കളെയെല്ലാം പരിഗണിച്ച ശേഷമാണ് വീണ ജോര്‍ജിനെ രംഗത്തിറക്കാന്‍ പാര്‍ട്ടി തീരുമാനിച്ചത്. പ്രമുഖ ബി.ജെ.പി നേതാവ് എം.ടി.രമേശനെ കളത്തിലിറക്കി ബി.ജെ.പിയും അഡ്വ.കെ.ശിവദാസന്‍ നായരെ മുന്‍നിര്‍ത്തി യു.ഡി.എഫും നടത്തിയ വാശിയേറിയ പോരാട്ടത്തില്‍ 7646 വോട്ട് ഭൂരിപക്ഷത്തോടെ വീണ ജോര്‍ജ് വിജയിക്കുകയായിരുന്നു. 64523 വോട്ടാണ് വീണാ ജോര്‍ജിന് ലഭിച്ചത്. 56877 വോട്ട് നേടി യു.ഡി.എഫും 37906 വോട്ട് നേടി ബി.ജെ.പിയും ആറന്മുള മണ്ഡലത്തില്‍ പരാജയത്തിന്റെ കയ്പ്പുനീര്‍ കുടിച്ചിറക്കി.

മാധ്യമപ്രവര്‍ത്തനത്തില്‍ നിന്ന് രാഷ്ട്രീയത്തിലേക്ക് എത്തിയ വീണജോര്‍ജ് ഏറെ പ്രതീക്ഷയോട് കൂടിത്തന്നെയാണ് രാഷ്ട്രീയത്തില്‍ ഹരിശ്രീ കുറിച്ചത്. മാധ്യമ പ്രവര്‍ത്തക എന്ന നിലയില്‍ ഏവര്‍ക്കും പരിചിതയായ വീണ വോട്ട് തേടി പോയപ്പോള്‍ ഏറെ കൗതുകത്തോട് കൂടിയായിരുന്നു ജനങ്ങള്‍ വീണയെ വരവേറ്റത്. 

പാരമ്പര്യം തുണച്ചില്ല; സെബാസ്റ്റ്യന്‍ പോള്‍  തോറ്റു

sebastian

കമ്മ്യൂണിസ്റ്റ് സഹയാത്രികനും മാധ്യമവിമര്‍ശകനുമായ സെബാസ്റ്റ്യന്‍ പോള്‍ തൃക്കാക്കര മണ്ഡലത്തിലെ ചമ്പക്കരയില്‍ കടകളിലും മത്സ്യത്തൊഴിലാളികള്‍ക്കിടയിലും വോട്ട് അഭ്യര്‍ത്ഥിച്ച് കൊണ്ടായിരുന്നു തൃക്കാക്കരയില്‍ തന്റെ പ്രചാരണം തുടങ്ങിയത്.

1997ലെ ലോകസഭാ ഉപതിരഞ്ഞെടുപ്പില്‍ മത്സരിച്ചിട്ട് കൊണ്ടാണ് സെബാസ്റ്റ്യന്‍ പോള്‍ തന്റെ രാഷ്ട്രീയ ജീവിതം ആരംഭിച്ചത്. 2003-ല്‍ പതിമൂന്നാം ലോക്‌സഭയിലേക്കും ഉപതിരഞ്ഞെടുപ്പിലൂടെ തിരഞ്ഞെടുക്കപ്പെട്ടു. പിന്നീട് 2004-ല്‍ നടന്ന 14-ാം ലോക്‌സഭാ തിരഞ്ഞെടുപ്പില്‍ എറണാകുളത്തും സെബാസ്റ്റ്യന്‍ പോള്‍ വിജയിച്ചു. എന്നാല്‍ രാഷ്ട്രീയപാരമ്പര്യവും മാധ്യമപാരമ്പര്യവും സെബാസ്റ്റ്യന്‍ പോളിനെ ഇപ്രാവശ്യം തുണച്ചില്ല.  11996 വോട്ട് ഭൂരിപക്ഷം നേടി യു.ഡി.എഫ് സ്ഥാനാര്‍ത്ഥി പി.ടി.തോമസ് വന്‍വിജയം നേടുകയായിരുന്നു. സെബാസ്റ്റ്യന്‍ പോളിന് വെറും 49455 വോട്ട് മാത്രമേ നേടാന്‍ സാധിച്ചുളളൂ.