ഡോ. എസ്. രാജൂകൃഷ്ണൻ

10 May 2023, 04:01 PM IST

2 min read

Read later

Representational Image | Freepik.com

ഇൻസ്റ്റിറ്റ്യൂട്ട് ഓഫ് ബയോ ഇൻഫർമാറ്റിക്സ് ആൻഡ് അപ്ലൈഡ് ബയോടെക്നോളജി (ഐ.ബി.എ.ബി.), ബെംഗളൂരു രണ്ട് എം.എസ്‌സി. പ്രോഗ്രാമുകളിലെ പ്രവേശനത്തിന് അപേക്ഷ ക്ഷണിച്ചു.

എം.എസ്‌സി. ബയോടെക്നോളജി ആൻഡ് ബയോ ഇൻഫർമാറ്റിക്സ്
ബയോടെക്നോളജിയിലെയും കംപ്യൂട്ടേഷണൽ ബയോളജി/ബയോ ഇൻഫർമാറ്റിക്സിലെയും പഠനങ്ങൾക്ക് ഊന്നൽനൽകുന്നു. ജനറ്റിക് എൻജിനിയറിങ്, സെൽ ആൻഡ് മോളിക്യുലാർ ബയോളജി, ബയോകെമിസ്ട്രി, ഇമ്യൂണോളജി, ഫെർമന്റേഷൻ, ബിഗ്ഡേറ്റാ അനാലിസിസ് തുടങ്ങിയവയുടെ പഠനവുമുണ്ട്.

എം.എസ്‌സി. ബിഗ് ഡേറ്റാ ബയോളജി
ഇൻറർഡിസിപ്ലിനറി സ്വഭാവമുള്ള ഈ പ്രോഗ്രാമിൽ ബയോളജി, മാത്തമാറ്റിക്സ്, ഡേറ്റാ അനലറ്റിക്സ്, ഇൻഫർമേഷൻ ടെക്നോളജി എന്നീ മേഖലകളിലെ പഠനങ്ങൾക്ക് പ്രാധാന്യം നൽകുന്നു. മെഡിക്കൽമേഖലയുമായി ബന്ധപ്പെട്ട ജിനോമിക് വിവരങ്ങളുടെ കണ്ടെത്തൽ, മെഷീൻ ലേണിങ് ആർട്ടിഫിഷ്യൽ ഇൻറലിജൻസ് എന്നിവ ഉപയോഗിച്ചുള്ള മെഡിക്കൽ ഇമേജ് അനാലിസിസ്, ഹെൽത്ത് കെയർ ഡയഗ്‌നോസിസ് ആൻഡ് തെറാപ്പി തുടങ്ങിയ മേഖലകളിൽ പ്രവർത്തിക്കാൻ പ്രാപ്തരായ കംപ്യൂട്ടേഷണൽ ബയോളജിസ്റ്റുകളെ രൂപപ്പെടുത്താൻ പ്രോഗ്രാം ലക്ഷ്യമിടുന്നു.

യോഗ്യത

സയൻസ്/ടെക്നോളജി/മെഡിസിൻ തുടങ്ങിയ മേഖലകളിൽ കുറഞ്ഞത് 50 ശതമാനം മാർക്കോടെ ബിരുദമുള്ളവർക്ക് (ബി.എസ്‌സി., ബി.ഇ., ബി.ടെക്., ബി.ഫാം., ബി.അഗ്രി., എം.ബി.ബി.എസ്., ബി.ഡി.എസ്., ബി.വി.എസ്‌സി.) അപേക്ഷിക്കാം.

വിഷയമേഖലകൾ: ലൈഫ് സയൻസസ് (സുവോളജി, ബോട്ടണി, ജനറ്റിക്സ്, ഹ്യൂമൺ ബയോളജി, ജനറൽ ലൈഫ് സയൻസസ്, ഇക്കോളജി, എൻവയൺമെൻറൽ ബയോളജി), ബയോ ഇൻഫർമാറ്റിക്സ്, ബയോടെക്നോളജി, കെമിസ്ട്രി, ഫിസിക്സ്, മാത്തമാറ്റിക്സ്, സ്റ്റാറ്റിസ്റ്റിക്സ്, എൻജിനിയറിങ്ങിലെ ഏതെങ്കിലും ശാഖ, ഫാർമസ്യൂട്ടിക്കൽ സയൻസസ്, അഗ്രിക്കൾച്ചർ, മെഡിസിൻ, െഡൻറിസ്ട്രി, ഹോർട്ടിക്കൾച്ചർ, ഫോറസ്ട്രി, വെറ്ററിനറി സയൻസസ് എന്നിവയാകാം. ബിരുദപ്രോഗ്രാമിന്റെ അവസാനസെമസ്റ്റർ പഠിക്കുന്നവർക്കും അപേക്ഷിക്കാം.

പ്രവേശനപരീക്ഷ

പ്രവേശനത്തിന്റെ ഭാഗമായി മേയ് 28-ന് നടത്തുന്ന രണ്ടുമണിക്കൂർ ദൈർഘ്യമുള്ള, ഓൺലൈൻ പ്രോക്ടേർഡ് പ്രവേശനപരീക്ഷയുണ്ട്. പ്ലസ്ടു നിലവാരമുള്ള, 100 മൾട്ടിപ്പിൾ ചോയ്സ് ചോദ്യങ്ങൾ മാത്തമാറ്റിക്സ് ആൻഡ് ലോജിക്കൽ റീസണിങ് (20 ചോദ്യങ്ങൾ), ഫിസിക്സ് (20), കെമിസ്ട്രി (20), ബയോളജി (40) എന്നിവയിൽനിന്നുമുണ്ടാകും. ശരിയുത്തരം രണ്ടുമാർക്ക്. ഉത്തരം തെറ്റിച്ചാൽ അരമാർക്ക് നഷ്ടപ്പെടും.

അപേക്ഷ www.ibab.ac.in-ലെ പ്രോഗ്രാം അഡ്മിഷൻ ലിങ്ക് വഴി മേയ് 13 വരെ നൽകാം.