ന്യൂഡല്‍ഹി: ഡല്‍ഹി സര്‍വകലാശാല പുതിയ അക്കാദമിക് സെഷന് നവംബറില്‍ തുടക്കമാകുമെന്ന് സര്‍വകലാശാല അധികൃതര്‍ അറിയിച്ചു. യു.ജി., പി.ജി. കോഴ്‌സുകളിലേക്കുള്ള പ്രവേശന നടപടിക്രമങ്ങളുടെ തീയതിയും സര്‍വകലാശാല പ്രഖ്യാപിച്ചിട്ടുണ്ട്.
യു.ജി കോഴ്‌സുകളിലേക്ക് ആദ്യ കട്ട്-ഓഫ് പ്രകാരമുള്ള പ്രവേശനം ഒക്ടോബര്‍ 12 മുതല്‍ 14 വരെ നടക്കും. ഒക്ടോബര്‍ 19 മുതല്‍ 21 വരെ രണ്ടാം കട്ട്-ഓഫ് ലിസ്റ്റ് പ്രകാരവും പിന്നീടുള്ളവ നവംബര്‍ 11 വരെ വിവിധ ഘട്ടങ്ങളിലും നടക്കും. നവംബര്‍ 18-ന് ക്ലാസുകള്‍ ആരംഭിക്കുമെങ്കിലും പ്രത്യേക കട്ട്-ഓഫ് ലിസ്റ്റ് പ്രകാരമുള്ള പ്രവേശനം 20 വരെയുണ്ടാകും.
ഒക്ടോബര്‍ 26 മുതല്‍ പി.ജി കോഴ്‌സുകളിലേക്കുള്ള പ്രവേശനവും നടത്തും. നവംബര്‍ 11 വരെ വിവിധ ഘട്ടങ്ങളിലായാണ് ഇത് നടത്തുക. ഒഴിവുകളുണ്ടെങ്കില്‍ പിന്നീട് അറിയിക്കുമെന്നും സര്‍വകലാശാല വ്യക്തമാക്കി.
കൂടുതല്‍ വിവരങ്ങള്‍ www.du.ac.in എന്ന വെബ്‌സൈറ്റില്‍ പ്രസിദ്ധീകരിച്ചിട്ടുണ്ട്.
Content Highlights: Delhi University to commence new academic session on November 18
