ബെയ്ജിങ്: ചൈനയിലെ ഗാങ്ഷു പ്രവിശ്യയിലെ പത്തിലേറെ സ്‌കൂളുകളിലെ വിദ്യാര്‍ഥികള്‍ക്ക് ഇനിമുതല്‍ ഇലക്ട്രോണിക് ചിപ്പ് ഘടിപ്പിച്ച സ്മാര്‍ട്ട് യൂണിഫോം. ഇതോടെ സ്‌കൂള്‍ അധികൃതര്‍ക്കും അധ്യാപകര്‍ക്കും രക്ഷിതാക്കള്‍ക്കും ഒരേസമയം കുട്ടികളെ ട്രാക്ക് ചെയ്യാനാകും. അന്താരാഷ്ട്ര മാധ്യമമായ എപോക്ക് ടൈംസ് റിപ്പോര്‍ട്ടു ചെയ്തതാണ് ഇക്കാര്യങ്ങള്‍. 

കുട്ടികളെ ട്രാക്ക് ചെയ്യാമെന്നതിന് പുറമേ അനുവാദമില്ലാതെ സ്‌കൂളില്‍നിന്ന് പുറത്ത് കടക്കുന്നത് തടയാന്‍ അലാറം സംവിധാനമുണ്ട്. ക്ലാസില്‍ ആരെങ്കിലും ഉറങ്ങിയാല്‍ ബന്ധപ്പെട്ട അധികാരികളെ  അറിയിക്കാനും കുട്ടികള്‍ വഴിയില്‍ എന്തെല്ലാം വാങ്ങുന്നുണ്ടെന്ന് രക്ഷിതാക്കളെ അറിയിക്കാനുമുള്ള സംവിധാനവും സ്മാര്‍ട്ട് യൂണിഫോമിലുണ്ട്. 

ബ്ലാക്ക് മിറര്‍ എന്ന ട്രാക്കിങ് സാങ്കേതിക വിദ്യ ഡാറ്റാബേസുമായി സമന്വയിപ്പിച്ചുള്ള സംവിധാനമാണ് സ്മാര്‍ട്ട് യൂണിഫോമിലുള്ളത്. സ്‌കൂള്‍ ഗേറ്റില്‍ വെച്ചിട്ടുള്ള പ്രത്യേക ഉപകരണം വഴി കുട്ടിയുടെ മുഖവും യൂണിഫോമിലെ ചിപ്പും സ്‌കാന്‍ ചെയ്ത് രണ്ടും ഒത്തുപോകുന്നുണ്ടോ എന്ന് പരിശോധിക്കും. കുട്ടികള്‍ യൂണിഫോമുകള്‍ പരസ്പരം മാറ്റാതിരിക്കാനാണിത്. സ്മാര്‍ട്ട് യൂണിഫോം വന്നതോടെ സ്‌കൂളിലെ ഹാജര്‍നില മെച്ചപ്പെട്ടതായി അധികൃതര്‍ അവകാശപ്പെടുന്നു.

ചൈനീസ് അധികൃതര്‍ സ്മാര്‍ട്ട് യൂണിഫോമിനെ ഡിജിറ്റല്‍ വിദ്യാഭ്യാസത്തിന്റെ നേട്ടമായി കാണുമ്പോള്‍ എതിര്‍പ്പുമായി ധാരാളം പേര്‍ രംഗത്ത് വന്നിട്ടുണ്ട്. എല്ലാ കാര്യങ്ങളും നിരീക്ഷണത്തിലാവുന്നതോടെ കുട്ടികളുടെ സ്വകാര്യതയ്ക്ക് ഭംഗം വരുമെന്ന് വിമര്‍ശകര്‍ ചൂണ്ടിക്കാണിക്കുന്നു. കുട്ടികളുടെ സ്വാഭാവികമായ സാമൂഹിക പെരുമാറ്റ രീതികളേയും വളര്‍ച്ചയേയും ഇത് ബാധിക്കുമെന്ന് അവര്‍ പറയുന്നു.

Content Highlight: China is Tracking School Students Through Smart Uniforms