ന്യൂഡൽഹി: പ്രധാനപ്പെട്ട 29 വിഷയങ്ങളിൽ മാത്രം പരീക്ഷ നടത്താൻ സി.ബി.എസ്.ഇ തീരുമാനിച്ചെന്ന തരത്തിൽ പ്രചരിക്കുന്ന വാർത്തകൾ വ്യാജമാണെന്ന് വ്യക്തമാക്കി ബോർഡ്. മേയ് നാലുമുതൽ പത്ത്, പന്ത്രണ്ട് ക്ലാസ്സുകളിലെ പരീക്ഷകൾ ആരംഭിക്കാനിരിക്കുന്ന സാഹചര്യത്തിൽ ഇത്തരം വാർത്തകളെ കരുതിയിരിക്കണമെന്നും സി.ബി.എസ്.ഇ ട്വിറ്ററിലൂടെ ആവശ്യപ്പെട്ടു.

കോവിഡ്-19 രോഗവ്യാപനത്തെത്തുടർന്ന് പ്രധാനപ്പെട്ട വിഷയങ്ങളുടെ മാത്രം പരീക്ഷ നടത്താൻ കഴിഞ്ഞ വർഷം സി.ബി.എസ്.ഇ നിശ്ചയിച്ചിരുന്നു. അന്നത്തെ വാർത്തകളും സർക്കുലറുകളും കേന്ദ്ര വിദ്യാഭ്യാസ മന്ത്രിയുടെ ട്വീറ്റുകളുമാണ് ഇപ്പോൾ വീണ്ടും പ്രചരിക്കുന്നത്.

വാട്സ് ആപ്പിലൂടെയും മറ്റും ഇത്തരം വ്യാജ വിവരങ്ങൾ വ്യാപകമായി ഷെയർ ചെയ്യപ്പെടുന്നുണ്ടെന്നും വിദ്യാർഥികളും രക്ഷിതാക്കളും അത് അവഗണിക്കണമെന്നും സി.ബി.എസ്.ഇ പറഞ്ഞു. പരീക്ഷയെ സംബന്ധിക്കുന്ന എല്ലാ വിവരങ്ങളും ഓദ്യോഗിക വെബ്സൈറ്റായ cbse.gov.in-ൽ ഉണ്ടാകുമെന്നും ബോർഡ് അറിയിച്ചു.

Content Highlights: CBSE to conduct exams for only 29 main subjects? Board warns of fake notice