തേഞ്ഞിപ്പലം: കാലിക്കറ്റ് സര്‍വകലാശാലാകാമ്പസ് വിദ്യാര്‍ഥികള്‍ക്കായുള്ള ഏകജാലക സേവന പോര്‍ട്ടല്‍ (student.uoc.ac.in) തയ്യാറായി. കാമ്പസ്സില്‍ പഠിക്കുന്നവര്‍ക്കും ഗവേഷകര്‍ക്കും പഠനവും ഗവേഷണവുമായി ബന്ധപ്പെട്ട എല്ലാ സേവനങ്ങളും ഏകജാലകപോര്‍ട്ടലിലൂടെ ലഭ്യമാകും.
വിവിധ അപേക്ഷകള്‍ നല്‍കുന്നതിനും ഫീസടയ്ക്കുന്നതിനും പരാതിപരിഹാരത്തിനും ഇതുപയോഗിക്കാം. വിവിധ സെമസ്റ്ററുകളിലെ ഓപ്ഷനുകള്‍ രേഖപ്പെടുത്തുന്നതിനും പരീക്ഷാഫലം അറിയുന്നതിനും പരീക്ഷാ ഹാള്‍ടിക്കറ്റ് ഡൗണ്‍ലോഡ് ചെയ്യുന്നതിനും മാര്‍ക്ക് ലിസ്റ്റുകള്‍ കാണുന്നതിനും ഇന്റേണല്‍ മാര്‍ക്ക് അറിയാനും വ്യക്തിപരമായി ലഭിക്കുന്ന പോര്‍ട്ടല്‍ വിന്‍ഡോ വഴി സാധിക്കും. കോഴ്സ് കഴിയുന്ന മുറയ്ക്ക് സര്‍ട്ടിഫിക്കറ്റുകളും ലഭ്യമാകും.
വിദ്യാര്‍ഥികളുടെ പ്രവേശനസമയത്ത് തന്നെ വ്യക്തിവിവരങ്ങള്‍ ഇതില്‍ ഉള്‍പ്പെടുത്തും. വകുപ്പ് മേധാവി മുഖേന യൂസര്‍ ഐഡിയും പാസ്വേഡും നല്‍കാനാണ് പരിപാടി. എം.ഫില്‍., പിഎച്ച്.ഡി. പഠിതാക്കള്‍ക്കും ഉപകാരപ്രദമാകും. പഠനവകുപ്പ് മേധാവികള്‍ക്കുള്ള പരിശീലനവും പോര്‍ട്ടല്‍ ഉദ്ഘാടനവും ഡിസംബര്‍ ആദ്യവാരമുണ്ടാകുമെന്ന് സര്‍വകലാശാലാ ആഭ്യന്തരഗുണനിലവാര സമിതി (എ.ക്യു.എ.സി.) ഡയറക്ടര്‍ ഡോ. പി. ശിവദാസന്‍ പറഞ്ഞു.
കാലിക്കറ്റ് സര്‍വകലാശാലാ കംപ്യൂട്ടര്‍ സെന്റര്‍ വിഭാഗമാണ് പോര്‍ട്ടല്‍ തയ്യാറാക്കിയത്. പാഠ്യപദ്ധതിയെക്കുറിച്ചും കോഴ്സിനെക്കുറിച്ചുള്ള വിദ്യാര്‍ഥികളുടെ പ്രതികരണങ്ങള്‍ രേഖപ്പെടുത്താനും അവസരമുണ്ട്. കോഴ്സ് കഴിഞ്ഞാലും പോര്‍ട്ടലിലൂടെ സര്‍വകലാശാലാ അറിയിപ്പുകളും ഓരോരുത്തരുടെ വ്യക്തിഗത വിവരങ്ങളും ഇതിലൂടെ അറിയാനാകും.
Content Highlights: Calicut University introduced new singlewindow portal for university campus students, will soon introduce to colleges
