ന്യൂഡല്‍ഹി: ഓള്‍ ഇന്ത്യ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസ് (എയിംസ്), ജവാഹര്‍ലാല്‍ ഇന്‍സ്റ്റിറ്റ്യൂട്ട് ഓഫ് പോസ്റ്റ് ഗ്രാജ്വേറ്റ് മെഡിക്കല്‍ എജ്യുക്കേഷന്‍ ആന്‍ഡ് റിസര്‍ച്ച് (ജിപ്മര്‍) എന്നിവയിലേക്കുള്ള എം.ബി.ബി.എസ്. പ്രവേശനം 2020 മുതല്‍ നീറ്റ് (നാഷണല്‍ എലിജിബിലിറ്റി കം എന്‍ട്രന്‍സ് ടെസ്റ്റ്) യു.ജി. അടിസ്ഥാനമാക്കിയാകുമെന്ന് കേന്ദ്ര ആരോഗ്യമന്ത്രി ഹര്‍ഷവര്‍ധന്‍ അറിയിച്ചു.
എം.ബി.ബി.എസ്. പ്രവേശനം ഏകീകരിക്കുന്നതിന്റെ ഭാഗമായിട്ടാണ് രാജ്യത്തെ എല്ലാ മെഡിക്കല്‍ പ്രവേശനവും നീറ്റിന്റെ അടിസ്ഥാനത്തിലാക്കുന്നത്.
ദേശീയ മെഡിക്കല്‍ കമ്മിഷന്‍ നിയമം നിലവില്‍വരുന്നതോടെ പ്രാക്ടീസ് ചെയ്യുന്നതിനും പി.ജി. കോഴ്സിലെ പ്രവേശനത്തിനും നാഷണല്‍ എക്സിറ്റ് ടെസ്റ്റ് (നെക്സ്റ്റ്) വിജയിക്കണം. വിദേശത്തുനിന്ന് മെഡിക്കല്‍ ബിരുദം നേടിയവര്‍ നെക്സ്റ്റ് പരീക്ഷയില്‍ യോഗ്യത നേടണമെന്നും മന്ത്രി പറഞ്ഞു. പി.ജി. പ്രവേശനത്തിന് റാങ്ക് മികച്ചതാക്കാന്‍ വിദ്യാര്‍ഥിക്ക് എത്രതവണ വേണമെങ്കിലും നെക്സ്റ്റ് അഭിമുഖീകരിക്കാം.
നിലവില്‍ എയിംസും ജിപ്മറും സ്വന്തമായി പ്രവേശനപരീക്ഷ നടത്തിയാണ് എം.ബി.ബി.എസ്. പ്രവേശനം നടത്തുന്നത്. ന്യൂഡല്‍ഹി, ഭോപാല്‍, ഭുവനേശ്വര്‍, ഗുണ്ടൂര്‍, ജോധ്പുര്‍, നാഗ്പുര്‍, പട്ന, റായ്പുര്‍, ഋഷികേശ്, ബത്തിന്‍ഡ, ദിയോഗര്‍, ഗോരഖ്പുര്‍, കല്യാണി, റായ്ബറേലി, തെലങ്കാന എന്നീ 15 എയിംസുകളിലായി 1150 സീറ്റിലേക്കാണ് 2019-ല്‍ പ്രവേശനം നടത്തിയത്.
പോണ്ടിച്ചേരി (150 സീറ്റ്), കാരൈക്കല്‍ (50 സീറ്റ്) കാമ്പസുകളിലായി 200 സീറ്റിലേക്കാണ് ജിപ്മറില്‍ പ്രവേശനം.
കുറഞ്ഞ ഫീസില്‍ മികച്ച സൗകര്യത്തോടെ മെഡിക്കല്‍ വിദ്യാഭ്യാസം പൂര്‍ത്തിയാക്കാമെന്നതാണ് ഇരു സ്ഥാപനങ്ങളുടെയും പ്രത്യേകത. ദേശീയ മെഡിക്കല്‍ കമ്മിഷന്‍ നിയമം നടപ്പാകുന്നതോടെ രാജ്യത്ത് മെഡിക്കല്‍ പ്രവേശനത്തിന് നീറ്റ് എന്ന ഒറ്റ പരീക്ഷയാകും.
Content Highlights: AIIMS, JIPMER MBBS Admissions will be based on NEET from next year
