കേരള എൻജിനീയറിങ്/ഫാർമസി പ്രവേശന പരീക്ഷകൾ അടുത്തുവരികയാണ്. അതു കഴിഞ്ഞാൽ ഉടൻ നീറ്റ് (നാഷണൽ എലിജബിലിറ്റി കം എൻട്രൻസ് ടെസ്റ്റ്) പരീക്ഷയും വരും. മികച്ച വിജയം നേടാൻ പഠനത്തിനപ്പുറം ഒട്ടേറെ കാര്യങ്ങൾ ശ്രദ്ധിക്കണം. പ്രത്യേകിച്ച് പരീക്ഷയ്ക്കു മുമ്പുള്ള ദിവസവും പരീക്ഷാ ദിവസവും.

  • പരീക്ഷയ്ക്കു മുമ്പ്, പരീക്ഷാകേന്ദ്രത്തെപ്പറ്റി കൃത്യമായ ധാരണ രൂപപ്പെടുത്തണം. താമസസ്ഥലത്തു നിന്ന്‌ അവിടെയെത്താനുള്ള വഴി, യാത്രാരീതി, സമയം, റൂട്ടിന്റെ രണ്ടാം ഓപ്ഷൻ എന്നിവയൊക്കെ മനസ്സിലാക്കണം. കഴിയുമെങ്കിൽ തലേദിവസം അവിടം സന്ദർശിക്കുക. ദൂരക്കൂടുതലുണ്ടെങ്കിൽ തലേദിവസം തന്നെ സ്ഥലത്തുവന്നു താമസിക്കുക. 
  •  കേരള എൻജി., ഫാർമസി പരീക്ഷ തുടങ്ങി 30 മിനിറ്റുവരെ പ്രവേശനം നൽകുമെങ്കിലും പരീക്ഷാ കേന്ദ്രത്തിൽ വൈകിയെത്തുന്നത് അഭികാമ്യമല്ല. നീറ്റിൽ പരീക്ഷാസമയത്തിന് അരമണിക്കൂറിനു മുമ്പുവരെമാത്രമേ പരീക്ഷാകേന്ദ്രത്തിലേക്ക് പ്രവേശിപ്പിക്കൂ.
  •  പരീക്ഷാ ഹാളിലേക്ക് അനുവദനീയമായ സാമഗ്രികൾ തലേദിവസംതന്നെ അടുക്കിവെക്കുക. എല്ലാ പരീക്ഷകൾക്കും അഡ്മിറ്റ് കാർഡ് നിർബന്ധമാണ്. ഇതുകൂടാതെ അനുവദനീയമായ സാമഗ്രികൾ ഏതൊക്കെയെന്ന് അഡ്മിറ്റ് കാർഡ്/പ്രോസ്പക്ടസ് എന്നിവയിൽ വ്യക്തമാക്കിയിരിക്കും. അവമാത്രം കൊണ്ടുപോവുക. 
  •  നീറ്റിന് ‘ഡ്രസ് കോഡ്’ ഉണ്ട്. ഇതുമായി ബന്ധപ്പെട്ട് ഇൻഫർമേഷൻ ബ്രോഷറിൽ നൽകിയ വിവരങ്ങൾ കൃത്യമായി വായിച്ച് മനസ്സിലാക്കണം. ഹാഫ് സ്ലീവ്‌സോടെയുള്ള ലൈറ്റ് വസ്ത്രങ്ങൾ ഉപയോഗിക്കുക. ഫുൾസ്ലീവ്‌സ് പറ്റില്ല. സ്ലിപ്പർ, താഴ്ന്ന ഹീലുള്ള സാൻഡൽ എന്നിവ ആകാം. ഷൂ അനുവദനീയമല്ല. വാച്ച്/റിസ്റ്റ് വാച്ച്, ബൽട്ട്, ബ്രേസ്‌ലറ്റ്, ഓർണമെന്റ്‌സ് എന്നിയൊന്നും ധരിക്കരുത്. ആചാരപരമായ വസ്ത്രധാരണംനടത്തി വരുന്നവർ 12.30-നകം കേന്ദ്രത്തിൽ എത്തണം.
  •  ഹാളിലേക്കു കടക്കുന്നതിനുമുമ്പ് നന്നായി പഠിച്ച പാഠഭാഗങ്ങൾ ഒരാവർത്തികൂടി വായിക്കുക. ഈ സമയം പുതിയ ഒരു ടോപ്പിക് പഠിക്കാൻ ശ്രമിക്കരുത്. അതുപോലെ മറ്റുള്ളവരുമായി, പഠിച്ച/പഠിക്കാൻ കഴിയാതെപോയ വിഷയങ്ങൾ ചർച്ച ചെയ്യരുത്. 
  •  കേരള എൻട്രൻസിന് നീല/കറുപ്പ് മഷിയുള്ള ‘ബോൾ പോയന്റ് പേന’ കൊണ്ടുപോകണം. വെച്ചെഴുതാൻ ഒരു കാർഡ്/ ക്ലിപ് ബോർഡും വേണമെങ്കിൽ ആകാം. 
  •  നീറ്റിൽ പേന അനുവദിക്കില്ല. പരീക്ഷാകേന്ദ്രത്തിൽനിന്നു തരുന്ന പേനയാണ് ഉപയോഗിക്കേണ്ടത്. അഡ്മിറ്റ് കാർഡിൽ ഒട്ടിക്കുന്ന ഫോട്ടോയ്ക്കുപുറമേ അതിന്റെ ഒരു കോപ്പി (അറ്റൻഡൻസ് ഷീറ്റിൽ ഒട്ടിക്കാൻ), സാധുവായ തിരിച്ചറിയൽ കാർഡ് (ഒറിജിൽതന്നെ വേണം) എന്നിവയും നീറ്റിനു പോകുമ്പോൾ കൊണ്ടുപോകണം. പാൻ കാർഡ്/ഡ്രൈവിങ് ലൈസൻസ്/വോട്ടർ ഐ.ഡി./പാസ്‌പോർട്/ആധാർ കാർഡ് എന്നിവയിലൊന്നാകാം.

 

  •  ഇൻവിജിലേറ്റർ നൽകിയേക്കാവുന്ന നിർദേശങ്ങൾ ശ്രദ്ധിക്കുക. ചോദ്യ ലഘു പുസ്തകത്തിലും ഉത്തരക്കടലാസിലുമുള്ള നിർദേശങ്ങൾ വായിച്ചുമനസ്സിലാക്കുക. നിർദേശങ്ങൾ പാലിക്കുക.
  •  ലഭിക്കുന്ന ചോദ്യ ലഘുപുസ്തകവും ഉത്തരക്കടലാസും ഒരേ വെർഷൻ ആണെന്ന് തുടക്കത്തിൽത്തന്നെ ഉറപ്പിക്കുക. അപാകം ഉണ്ടെങ്കിൽ ഉടൻ മാറ്റിവാങ്ങുക. 
  •  ഉത്തരങ്ങൾ അന്തിമമായി തീരുമാനിച്ചശേഷമേ മാർക്കുചെയ്യാവൂ. സമയം പൂർണമായും ഫലപ്രദമായും പ്രയോജനപ്പെടുത്തുക. ലളിതമെന്നു തോന്നുന്ന ചോദ്യങ്ങൾക്ക് ആദ്യറൗണ്ടിൽ ഉത്തരംനൽകുക. രണ്ടാംവട്ടത്തിൽ അല്പം കഠിനമായവയിലേക്കും തുടർന്ന് കൂടുതൽ ബുദ്ധിമുട്ടുള്ളവയിലേക്കും തിരിയുക. ഒരു ചോദ്യത്തിലും ഒരുപാടുസമയം ചെലവഴിക്കരുത്. ഉത്തരംകണ്ടെത്താൻ ബുദ്ധിമുട്ടു തോന്നുന്നപക്ഷം, തത്‌കാലം ആ ചോദ്യം വിട്ട് അടുത്തതിലേക്കു കടക്കുക. സമയം കിട്ടുന്നപക്ഷം, പിന്നീട് അതിലേക്കു തിരികെവരാം. 
  • ചോദ്യങ്ങൾ ഇപ്രകാരം ഒഴിവാക്കി മുന്നോട്ടു പോകുമ്പോൾ, ഉത്തരങ്ങൾ രേഖപ്പെടുത്തുന്നത് ശരിയായ ചോദ്യനമ്പറിനു നേരെയാണെന്ന് ഉറപ്പുവരുത്തണം. തിരക്കിനിടയിൽ ചോദ്യ നമ്പർ മാറിപ്പോകാൻ സാധ്യത കൂടുതലാണ്. 
  •  കേരള എൻജിനീയറിങ് പരീക്ഷയുടെ ആദ്യ പേപ്പർ കഴിഞ്ഞാൽ അതേപ്പറ്റി മറന്നേക്കുക. ഉത്തരങ്ങൾ ചർച്ചചെയ്യാതിരിക്കുക. രക്ഷിതാക്കൾ കുട്ടികളോട് അതേപ്പറ്റി ചോദിക്കാതിരിക്കുക. അടുത്തദിവസത്തെ പേപ്പറിനെക്കുറിച്ചുമാത്രം അപ്പോൾ ചിന്തിക്കുക. അതു കണക്കാണ്. മനസ്സുവെച്ചാൽ നല്ല മാർക്കു കിട്ടാം. രണ്ടു പേപ്പറും കഴിഞ്ഞിട്ട്, രണ്ടിന്റെയും ഉത്തരസൂചികകളെപ്പറ്റി എത്ര വേണമെങ്കിലും ചർച്ചയാകാം.

സിലബസ് പൂർണമായും പഠിക്കുന്നതിനൊപ്പം, ആത്മവിശ്വാസത്തോടെ, ശാന്തമായ മനസ്സോടെ പരീക്ഷ എഴുതേണ്ടതും മികച്ച സ്‌കോറിന്  ആവശ്യമാണെന്ന് ഓർക്കുക.

Content Highlights: preparation guidelines for NEET and KEAM Entrance Exams