policeman, headmaster എന്നതിന് police officer, meteorologist, headteacher ലിംഗബോധത്തെക്കുറിച്ചാണ് ഇത്തവണ ഈസി ഇംഗ്ലീഷില്‍

രു സമൂഹം ആശയവിനിമയത്തിനായി ഉപയോഗിക്കുന്ന വ്യവസ്ഥാപിതമായ ചില സംവിധാനങ്ങളുടെയും ഉപാധികളുടെയും ആകെത്തുകയാണ് ഭാഷ. സമൂഹം കാലാകാലങ്ങളായി പുലര്‍ത്തിപ്പോരുന്ന ചില പൊതുബോധങ്ങളും ധാരണകളും ഭാഷയില്‍ അന്തര്‍ലീനമായിരിക്കും.

'എല്ലാവരും അവനവന്റെ കര്‍ത്തവ്യം ശരിയായി നിര്‍വഹിക്കേണ്ടതുണ്ട്; എന്ന വാക്യത്തില്‍ സ്ത്രീസമൂഹത്തെ പാടേ അവഗണിച്ചതായി കാണാം. അവളവളുടെ എന്ന പദം ഉണ്ടെങ്കിലും ദൈനംദിന ആശയവിനിമയത്തില്‍ അതത്ര വ്യാപകമായി പ്രയോഗിക്കാറില്ല. ഇരുവിഭാഗത്തെയും ഇതരവിഭാഗത്തെയും ചേര്‍ത്ത് അവരവരുടെ എന്ന പദം ഉപയോഗിക്കുക വഴി ഭാഷയില്‍ എല്ലാവര്‍ക്കും പ്രാതിനിധ്യം ലഭിക്കുന്നു. ലിംഗപരമായ മുന്‍വിധിയോടെ ഉപയോഗിക്കുന്ന ഒട്ടേറെ വാക്കുകള്‍ ഇംഗ്ലീഷ് ഭാഷയിലുണ്ട്. Salesman, businessman, chairman, clergyman, fireman, policeman, weatherman, headmaster, watchman തുടങ്ങിയ പദങ്ങള്‍ ഇത്തരം ജോലികള്‍ ചെയ്യാന്‍ കൂടുതല്‍ അനുയോജ്യര്‍ പുരുഷന്മാര്‍ ആണെന്ന ധ്വനി നല്‍കുന്നു. ഇവയ്ക്ക് പകരം salesperson/sales assistant/sales executive, businessperson, chairperson, minister, fire fighter, police officer, meteorologist, headteacher, security guard തുടങ്ങിയ ലിംഗപരമായ മുന്‍വിധി സൂചിപ്പിക്കാത്ത പദങ്ങള്‍ ഉപയോഗിക്കുന്നത് ഉചിതമാവും.

ഉദ്യോഗത്തെ സൂചിപ്പിക്കുന്ന ചില വാക്കുകള്‍ ഏത് ലിംഗത്തില്‍പ്പെട്ടവര്‍ക്കുംപൊതുവേ ഉപയോഗിക്കാവുന്നവയാണ്. Editor, auditor, proofreader, receptionist, teacher, professor, accountant എന്നിവ അവയില്‍ ചിലതാണ്. 'Actress' എന്ന വാക്ക് എന്തിനാണ്? The Guardian and Observer Style Guide അനുസരിച്ച് actor എന്ന പദം ലിംഗഭേദമില്ലാതെ എല്ലാ കൂട്ടര്‍ക്കും ഉപയോഗിക്കാന്‍ സാധിക്കുന്നതാണ്. 

Herself/himselfതുടങ്ങിയ പദങ്ങള്‍ക്ക് പകരം ലിംഗ നിഷ്പക്ഷത പുലര്‍ത്തുന്ന ഏകവചന പദമാണ് themself.

ഇതിന്റെ ബഹുവചനരൂപം themselves. ആരെങ്കിലും she/he എന്നിങ്ങനെ പരാമര്‍ശിക്കപ്പെടാന്‍ താത്പര്യപ്പെടുന്നില്ല എങ്കില്‍ they എന്ന ലിംഗ നിഷ്പക്ഷ ഏകവചന സര്‍വനാമം (gender neutral singular pronoun) ഉപയോഗിക്കുന്നു. 'They' (അവര്‍) എന്ന ബഹുവചന സര്‍വനാമ രൂപത്തോടൊപ്പം they എന്ന ഏകവചന സര്‍വനാമവും Merriam Webster, Oxford തുടങ്ങിയ നിഘണ്ടുക്കളില്‍ ഉള്‍ക്കൊള്ളിച്ചിട്ടുണ്ട്.

Eg: If anyone arrives late, they'll have to wait outside.

ഭാഷയിലെ ലിംഗപരമായ വിവേചനം ഒഴിവാക്കാന്‍ ഒരു വ്യക്തിയെ സൂചിപ്പിക്കേണ്ടി വരുന്ന സാഹചര്യത്തില്‍ man എന്നതിന് പകരം person ഉപയോഗിക്കുക. Eg: chairperson, sportsperson etc.

ലിംഗരഹിത ശീര്‍ഷകങ്ങള്‍ (genderless titles) ഉപയോഗിക്കുക. Eg: homemaker instead of housewife, flight attendant (air hostess) etc.

ലിംഗസൂചകങ്ങള്‍ (gender markers) ഒഴിവാക്കുക. E.g: nurse instead of male nurse, pilot (female pilot) etc.

content highlights: It's better to use the gender neutral word actor instead of actress