അമ്മയും കുഞ്ഞും മരിച്ച സംഭവം; നവജാതശിശുവിന്റെ മൃതദേഹം പുറത്തെടുത്ത് പരിശോധിച്ചു, Woman,Newborn Baby,Baby,Death,Kannur,Thalassery,Hospital

26 July 2020, 12:35 PM IST

തലശ്ശേരി: പ്രസവത്തെ തുടർന്ന് അമ്മയും കുഞ്ഞും മരിച്ച സംഭവത്തിൽ നവജാതശിശുവിന്റെ സംസ്കരിച്ച മൃതദേഹം പുറത്തെടുത്ത് പരിശോധന നടത്തി. തലശ്ശേരി സ്റ്റേഡിയം പഴയ ജുമാമസ്ജിദിൽ ശനിയാഴ്ച രാവിലെ നടന്ന പരിശോധനയ്ക്ക് ഫൊറൻസിക് സർജൻ ഡോ. ഗോപാലകൃഷ്ണപിള്ള നേതൃത്വം നൽകി. മുഴപ്പിലങ്ങാട് എ.കെ.ജി. റോഡിൽ ഹിദായ മസ്ജിദിന് സമീപം അപ്സരാസിൽ ഷഫ്നയും (32) കുഞ്ഞുമാണ് മരിച്ചത്.

തലശ്ശേരി സ്വകാര്യ ആശുപത്രിയിൽ 11-നാണ് സംഭവം. ചികിത്സാപ്പിഴവാണ് മരണകാരണമെന്ന് കാണിച്ച് ബന്ധുക്കൾ എടക്കാട് പോലീസിന് പരാതി നൽകിയിരുന്നു. സംഭവത്തിൽ മനുഷ്യാവകാശ കമ്മിഷനും അന്വേഷണത്തിന് ഉത്തരവിട്ടിരുന്നു. മരണശേഷം കുഞ്ഞിന്റെ മൃതദേഹ പരിശോധന നടത്തിയിരുന്നില്ല.

തലശ്ശേരി ഡിവൈ.എസ്.പി. മൂസ വള്ളിക്കാടൻ, ഇൻസ്പെക്ടർ കെ. സനൽകുമാർ, എസ്.ഐ. എ. രാജേഷ്, തലശ്ശേരി തഹസിൽദാർ വി.കെ. ഷാജി എന്നിവർ സ്ഥലത്തെത്തി. സാമൂഹികപ്രവർത്തകനായ മൊയ്തുവാണ് മൃതദേഹം പുറത്തെടുക്കാൻ സഹായിച്ചത്. കുഞ്ഞിന്റെ ബന്ധുക്കളും എത്തിയിരുന്നു. പ്രസവശേഷം രക്തസ്രാവത്തെ തുടർന്ന് തലശ്ശേരിയിൽനിന്ന് കണ്ണൂരിലെ സ്വകാര്യ ആശുപത്രിയിലേക്ക് മാറ്റിയ അമ്മയും കുഞ്ഞും വൈകീട്ടാണ് മരിച്ചത്.

Content Highlights:kannur shafna and new born baby death police exhumed babys body