പ്രതീകാത്മക ചിത്രം | Photo: AFP
പത്തനംതിട്ട: വര്‍ധിച്ചുവരുന്ന അക്രമങ്ങളും ഗുണ്ടാ തേര്‍വാഴ്ചയും അവസാനിപ്പിക്കാന്‍ ലക്ഷ്യംവെച്ചുള്ള 'ഓപ്പറേഷന്‍ ട്രോജനി'ല്‍ ഒരാഴ്ചയ്ക്കുള്ളില്‍ പിടിയിലായത് 107 ഗുണ്ടകള്‍. ജില്ലയിലെ ഗുണ്ടാപട്ടികയില്‍പ്പെട്ട 141 പേരില്‍ പ്രശ്‌നക്കാരായവരെയാണ് പോലീസ് അറസ്റ്റുചെയ്തത്. സ്റ്റേഷനുകളില്‍ നേരിട്ട് വിളിച്ചുവരുത്തിയാണ് അറസ്റ്റ്. അവര്‍ നിലവിലെങ്ങനെ കഴിഞ്ഞുവരുന്നുവെന്നതും ആരൊക്കെയുമായി ബന്ധപ്പെടുന്നുണ്ട് എന്നതും മറ്റുവിവരങ്ങളും പോലീസ് ശേഖരിച്ചു. അതേസമയം, ഇത്രയും പേരെ പിടികൂടിയിട്ടും ഒരുമാരാകായുധംപോലും പോലീസ് പിടികൂടിയിട്ടില്ല.
ആകെ പിടിച്ചത് 52 പേരില്‍നിന്നും കുറച്ച് മൊബൈല്‍ ഫോണും ഇലക്ട്രോണിക് ഉപകരണങ്ങളുമാണ്. പിടിയിലായവരില്‍ കുറച്ചുപേരെ ജാമ്യത്തില്‍വിട്ടു. ചിലരെ റിമാന്‍ഡ് ചെയ്തു. 30 പേര്‍ക്കെതിരേ ബോണ്ട് വെപ്പിയ്ക്കല്‍ നടപടി തുടങ്ങി. ഒരാള്‍ക്കെതിരേ കാപ്പ നിയമപ്രകാരമുള്ള നടപടി തുടങ്ങി. ഡിസംബര്‍ 18 മുതല്‍ 25 വരെ സമൂഹവിരുദ്ധര്‍, ഗുണ്ടകള്‍ തുടങ്ങി 599 പേരെ പരിശോധന നടത്തി. 280 പേരുടെ വീടുകള്‍ റെയ്ഡ് ചെയ്തു.
സമൂഹവിരുദ്ധ പ്രവര്‍ത്തനങ്ങളിലും കുറ്റകൃത്യങ്ങളിലും ഏര്‍പ്പെടുന്നവര്‍ക്കെതിരേ പോലീസ് സ്റ്റേഷന്‍ തലത്തില്‍ പുതുതായി 69 റൗഡി ഹിസ്റ്ററി ഷീറ്റുകളും തയ്യാറാക്കിത്തുടങ്ങി. പഴയ ക്രിമിനല്‍ കേസുകളില്‍ പ്രതികളായ 17 പേരെ ഈ കാലയളവില്‍ അറസ്റ്റുചെയ്തു. സാമൂഹിക മാധ്യമങ്ങളിലൂടെ സ്പര്‍ദ്ധ ഉളവാക്കുംവിധം സന്ദേശം പ്രചരിപ്പിച്ചതിന് ഒരുകേസ് രജിസ്റ്റര്‍ ചെയ്തിട്ടുണ്ട്. ജില്ലയിലെ സൈബര്‍ പോലീസിന്റെ നേതൃത്വത്തില്‍ ഇത്തരക്കാരെ നിരന്തരം നിരീക്ഷിക്കുന്നുണ്ട്.
പ്രത്യേക ആക്ഷന്‍ ഗ്രൂപ്പ്; നേതൃത്വം ഡിവൈ.എസ്.പി.ക്ക്
സംഘടിത കുറ്റകൃത്യങ്ങളിലും ഗുണ്ടാ പ്രവര്‍ത്തനങ്ങളിലും ഏര്‍പ്പെടുന്നവര്‍ക്കെതിരേ നടപടി സ്വീകരിക്കുന്നതിനായി പ്രത്യേക പോലീസ് ആക്ഷന്‍ ഗ്രൂപ്പ് ജില്ലയില്‍ രൂപവത്കരിച്ചു. നര്‍കോട്ടിക് സെല്‍ ഡിവൈ.എസ്.പി ആര്‍. പ്രദീപ് കുമാറിന്റെ നേതൃത്വത്തില്‍ പത്ത് പോലീസ് ഉദ്യോഗസ്ഥരുടെ സംഘവും പോലീസ് സ്റ്റേഷന്‍ തലത്തില്‍ ഒരു എസ്.ഐ., രണ്ട് സിവില്‍ പോലീസ് ഉദ്യോഗസ്ഥര്‍ എന്നിവര്‍ അടങ്ങിയ സംഘവുമാണ് ഇതിലുള്ളത്.
അക്രമം, ലഹരിമരുന്ന്, സ്വര്‍ണം, ഹവാല തുടങ്ങിയവ പ്രവര്‍ത്തനങ്ങളില്‍ ഏര്‍പ്പെടുന്ന ഗുണ്ടകളെയും സമൂഹവിരുദ്ധരെയും കണ്ടെത്തുകയാണ് ഇവരുെട ജോലി. ജാമ്യത്തിലിറങ്ങുന്ന പ്രതികളെയും നിരീക്ഷിക്കും. വ്യവസ്ഥകള്‍ ലംഘിക്കുന്നുണ്ടെന്നുകണ്ടാല്‍ ജാമ്യം റദ്ദാക്കുന്നതടക്കമുള്ള നടപടികളെടുക്കും. ജില്ലയില്‍ സമാധാനഭംഗം ഉണ്ടാവാതെ നോക്കാനുള്ള നിര്‍ദേശം ആക്ഷന്‍ ഗ്രൂപ്പിനും പോലീസ് സ്റ്റേഷന്‍ തലത്തിലുള്ള ആന്റി ഓര്‍ഗനൈസ്ഡ് ക്രൈം സെല്ലുകള്‍ക്കും നല്‍കിയിട്ടുണ്ട്.
Content Highlights: 107 criminals arrested in Operation Trojan
Also Watch
RELATED STORIES
IN CASE YOU MISSED IT
.jpg?$p=cf32acb&f=1x1&w=100&q=0.8)
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..