സൗമ്യ, വിനോദ് | Photo: Special Arrangement
കട്ടപ്പന: വിദേശമലയാളിയായ കാമുകനൊപ്പം താമസിക്കാന് ഭര്ത്താവിന്റെ വാഹനത്തില് മാരക ലഹരിമരുന്നായ എം.ഡി.എം.എ.വെച്ച് കുടുക്കാന് ശ്രമിച്ച കേസില് പഞ്ചായത്തംഗത്തിന്റെ കൂട്ടാളികളുടെ ശബ്ദസാമ്പിളുകള് പോലീസ് പരിശോധിക്കും.തിരുവന്തപുരത്തെ സ്റ്റുഡിയോയിലെത്തിച്ചാണ് ശബ്ദസാമ്പിളുകള് ശേഖരിച്ച് പരിശോധന നടത്തുക.
മയക്കുമരുന്ന് പിടിച്ചെടുക്കാന് എക്സൈസ് ഉദ്യോഗസ്ഥര്ക്കും ലഹരിവിരുദ്ധ സംഘങ്ങള്ക്കും വിവരംനല്കിയത് പ്രതികളില് ആരാണെന്ന് തിരിച്ചറിയുകയാണ് ലക്ഷ്യം.കൂടുതല് പ്രതികള് കേസില് ഉള്പ്പെട്ടിട്ടുണ്ടോയെന്നും ഇതിലൂടെ അറിയാനാകും.
ഫെബ്രുവരി 22-നാണ് കേസിനാസ്പദമായ സംഭവം നടക്കുന്നത്. രഹസ്യ വിവരത്തിന്റെ അടിസ്ഥാനത്തില് ജില്ലാ പോലീസ് മേധാവിയുടെ ലഹരിവിരുദ്ധ സംഘമായ ഡാന്സാഫും വണ്ടന്മേട് പോലീസുംചേര്ന്ന് പുറ്റടി അമ്പലമേട് തൊട്ടാപുരയ്ക്കല് സുനില് വര്ഗീസിന്റെ ബൈക്കില്നിന്ന് അഞ്ചുഗ്രാം എം.ഡി.എം.എ. പിടികൂടിയിരുന്നു.
തുടര്ന്ന് പോലീസ് നടത്തിയ അന്വേഷണത്തിലാണ് ഭര്ത്താവ് സുനിലിനെ ഒഴിവാക്കുന്നതിനായി ഭാര്യയും വിദേശത്തുള്ള കാമുകന്റെ കുട്ടാളികളുംചേര്ന്ന് സുനിലിന്റെ വാഹനത്തില് എം.ഡി.എം.എ.വെച്ച് കുടുക്കാന് ശ്രമിച്ചതാണെന്ന് കണ്ടെത്തിയത്.
Also Read
കേസില് വണ്ടന്മേട് പഞ്ചായത്തംഗം സൗമ്യാ അബ്രഹാം(33) മയക്കുമരുന്നെത്തിച്ചുനല്കിയ കാമുകന്റെ കൂട്ടാളികളായ ശാസ്താംകോട്ട സഹിയ മന്സിലില് ഷാനവാസ് (39), കൊല്ലം മുണ്ടയ്ക്കല് കപ്പലണ്ടിമുക്ക് അനുമോന് മന്സിലില് ഷെഫിന്(24) എന്നിവരെ വണ്ടന്മേട് പോലീസ് അറസ്റ്റുചെയ്ത് റിമാന്ഡ് ചെയ്തിരുന്നു.
കേസിലെ പ്രതിയും പഞ്ചായത്തംഗവുമായ സൗമ്യയുടെ കാമുകന് വിനോദ് രാജേന്ദ്രനെ സൗദിയില്നിന്ന് നാട്ടിലെത്തിക്കാനുള്ള നീക്കം അന്വേഷണസംഘം ആരംഭിച്ചു.
Content Highlights: vandanmedu mdma case police will inspect voice samples of soumya and others
Also Watch
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..