നയനയുടെ മരണം; മുറിയില്‍ ആദ്യം പ്രവേശിച്ചവരെയും പോലീസ് ഉദ്യോഗസ്ഥരെയും ക്രൈംബ്രാഞ്ച് ചോദ്യംചെയ്യും, Nayana Surya death

16 January 2023, 07:00 AM IST

നയന സൂര്യ

തിരുവനന്തപുരം: യുവസംവിധായിക നയനാ സൂര്യന്റെ ദുരൂഹമരണം പുനഃരന്വേഷിക്കുന്ന ക്രൈംബ്രാഞ്ച് സംഘം മൊഴിയെടുക്കലിലേക്ക് കടക്കുന്നു. ഉടൻതന്നെ പുതിയ ഫയൽ തുറന്ന് അന്വേഷണത്തിലേക്ക് കടക്കുമെന്ന് സംഘത്തലവനായ ക്രൈംബ്രാഞ്ച് തിരുവനന്തപുരം യൂണിറ്റ് എസ്.പി. എസ്. മധുസൂദനൻ അറിയിച്ചു.

ഫയലുകൾ പഠിച്ച 13 അംഗ ക്രൈംബ്രാഞ്ച് സംഘം പല സംഘങ്ങളായി തിരിഞ്ഞ് ചർച്ചനടത്തിയിരുന്നു. തിങ്കളാഴ്ച രാവിലെ എല്ലാവരും ഒരുമിച്ചുള്ള യോഗം ചേരും. തുടർന്നുള്ള ദിവസങ്ങളിൽ മൊഴിയെടുക്കലിലേക്ക് കടക്കും.

നയനയുടെ മരണശേഷം ആദ്യം മൊഴിനൽകിയ സഹോദരൻ മധു, നയന മരിച്ചുകിടന്ന മുറിയിൽ ആദ്യം പ്രവേശിച്ച മൂന്നു സുഹൃത്തുക്കൾ തുടങ്ങിയവരുടെ പുതിയ മൊഴിയാണ് ആദ്യം ശേഖരിക്കുക. ആദ്യഘട്ട അന്വേഷണം നടത്തി കേസ് അവസാനിപ്പിക്കാൻ ശ്രമിച്ച പോലീസ് ഉദ്യോഗസ്ഥരെ സംഘം വിശദമായി ചോദ്യംചെയ്യും. ഇവരുടെ മൊഴികൾ കേസിൽ നിർണായകമാണ്.

ജനവരി അഞ്ചിനാണ് കേസ് ക്രൈംബ്രാഞ്ചിന് കൈമാറിയത്. 2019 ഫെബ്രുവരി 24-നാണ് നയനാ സൂര്യനെ താമസസ്ഥലത്തെ മുറിയിൽ മരിച്ചനിലയിൽ കണ്ടെത്തിയത്. ഷുഗർനില താഴ്ന്ന് പരസഹായം കിട്ടാതെ മരിച്ചെന്നായിരുന്നു മ്യൂസിയം പോലീസിന്റെ റിപ്പോർട്ട്. നയനയുടെ മരണം കൊലപാതകമാണെന്ന് സംശയിക്കുന്ന തെളിവുകളുമായി ‘മാതൃഭൂമി’ വാർത്ത പ്രസിദ്ധീകരിച്ചതോടെയാണ് കേസ് വീണ്ടും ചർച്ചയായതും ക്രൈംബ്രാഞ്ചിലേക്ക് എത്തിയതും.