മരണപ്പെട്ടെന്ന് വരുത്തിത്തീർക്കാൻ മറ്റൊരാളെ കത്തിച്ചു കൊലപ്പെടുത്തി; നാലുപേർ അറസ്റ്റില്‍, murder

15 July 2022, 09:00 AM IST

പ്രതീകാത്മക ചിത്രം | Photo: Pixabay

ബെംഗളൂരു : വഞ്ചനാ കേസിൽ അറസ്റ്റ് ഒഴിവാക്കുന്നതിന് മരണപ്പെട്ടെന്ന് വരുത്തിത്തീർക്കാൻ മറ്റൊരാളെ കാറിൽ കത്തിച്ചുകൊലപ്പെടുത്തിയ കേസിൽ നാലുപേരെ പോലീസ് അറസ്റ്റു ചെയ്തു. ഭൂമി സർവേയർ കാർക്കള സ്വദേശി സദാനന്ദ ഷെരിഗർ (54), സഹായികളായ ശില്പ (34), സതീഷ് (40), നിത്യാനന്ദ് (40) എന്നിവരാണ് അറസ്റ്റിലായത്.

കാർക്കള സ്വദേശിയായ ആനന്ദ ദേവഡിഗ (55) ആണ് കൊല്ലപ്പെട്ടത്. ബുധനാഴ്ചയാണ് ബൈന്ദൂരിൽ കാറിനകത്ത് കത്തിക്കരിഞ്ഞ മൃതദേഹം കണ്ടെത്തിയത്. വ്യാജ ഭൂമി രേഖ ഇടപാടുമായി ബന്ധപ്പെട്ട് സദാനന്ദയ്ക്കെതിരേ കാർക്കള പോലീസ് കേസെടുത്തിരുന്നു. കുറ്റപത്രം സമർപ്പിച്ചതിനെത്തുടർന്ന് കോടതിയിൽനിന്ന് സമൻസും അടുത്തിടെ വാറന്റും ലഭിച്ചു.

ഇതോടെ അറസ്റ്റിലാകുമെന്ന് ഭയന്ന സദാനന്ദ കാറിൽ കൊലപാതകം നടത്തി താൻ മരിച്ചെന്ന് വരുത്തിത്തീർക്കാൻ തീരുമാനിച്ചു. ഇതിനായി സുഹൃത്തായ ശില്പയുടെ സഹായം തേടി.

ഇരുവരും ചേർന്ന് സദാനന്ദയുടെ പ്രായമുള്ള ആളെ കണ്ടെത്തി മറ്റു രണ്ടുപേരുടെ സഹായത്തോടെ കാറിൽ കയറ്റി ബൈന്ദൂരിലെത്തിച്ചു. ഇയാളെ നിർബന്ധപൂർവം മദ്യം കഴിപ്പിക്കുകയും ഉറക്കഗുളിക കഴിപ്പിക്കുകയും ചെയ്തു. തുടർന്ന് കാറിൽവെച്ച് തീകൊളുത്തി കൊന്നു.

സംഭവത്തിനുശേഷം ഒളിവിൽപ്പോയ സദാനന്ദയെയും സഹായികളെയും പോലീസ് കണ്ടെത്തി അറസ്റ്റു ചെയ്യുകയായിരുന്നു.

Content Highlights: Man murders another man to fake his death

ഇത് പരസ്യ ഫീച്ചറാണ്. മാതൃഭൂമി.കോം ഈ പരസ്യത്തിലെ അവകാശവാദങ്ങളെ ഏറ്റെടുക്കുന്നില്ല. പരസ്യത്തിൽ ഉന്നയിക്കുന്ന അവകാശവാദങ്ങൾക്ക് ഉപോദ്ബലകമായ വസ്തുതകൾ പരസ്യദാതാക്കളുമായി ബന്ധപ്പെട്ട് പരിശോധിച്ചു ബോധ്യപ്പെട്ട ശേഷം മാത്രം ഇടപാടുകൾ നടത്തുക. പരാതികൾ ഉണ്ടെങ്കിൽ ഇവിടെ രേഖപ്പെടുത്താവുന്നതാണ്. (feedback@mpp.co.in)