.jpg?$p=a8eff18&f=16x10&w=852&q=0.8)
കൊല്ലം ചിന്നക്കടയിൽ ജില്ലാതല നിക്ഷേപകസംഗമം ഉദ്ഘാടനം ചെയ്യാനെത്തിയ വ്യവസായ മന്ത്രി പി.രാജീവിനെ കരിങ്കൊടി കാണിക്കാനെത്തിയ യൂത്ത് കോൺഗ്രസ് പ്രവർത്തകരെ റോഡരികിലെ കടകളിൽ വിൽക്കാൻവെച്ചിരുന്ന ബക്കറ്റും തവിയും ഉപയോഗിച്ച്‌ വളഞ്ഞിട്ട്‌ ആക്രമിക്കുന്ന ഡി.വൈ.എഫ്.ഐ. പ്രവർത്തകർ | ഫോട്ടോ: സുധീർമോഹൻ
കൊല്ലം:മന്ത്രി പി.രാജീവിനെ കരിങ്കൊടികാട്ടാനെത്തിയ യൂത്ത് കോൺഗ്രസുകാരെ ഡി.വൈ.എഫ്.ഐ. പ്രവർത്തകർ വളഞ്ഞിട്ടു മർദിച്ചു. ചൊവ്വാഴ്ച വൈകീട്ട് അഞ്ചരയോടെ കൊല്ലം ചിന്നക്കട ക്ലോക്ക് ടവറിനു മുന്നിലായിരുന്നു സംഭവം.
യുവജന കമ്മിഷൻ അധ്യക്ഷ ചിന്താ ജെറോമിനെതിരേ പരാതിനൽകിയ സംസ്ഥാന സെക്രട്ടറി വിഷ്ണുസുനിൽ പന്തളം അടക്കമുള്ള യൂത്ത് കോൺഗ്രസ് പ്രവർത്തകർക്കാണ് മർദനമേറ്റത്. തടയാനെത്തിയ പോലീസ് ഉദ്യോഗസ്ഥർക്കുനേരേയും കൈയേറ്റമുണ്ടായി. മന്ത്രിയുടെ സുരക്ഷയ്ക്കായി വൻ പോലീസ് സംഘം സമീപത്തുണ്ടായിരുന്നെങ്കിലും കാഴ്ചക്കാരായി നിൽക്കുകയായിരുന്നെന്ന് പരാതിയുണ്ട്.
യൂത്ത് കോൺഗ്രസ് പ്രവർത്തകൻ അജുവിന്‍റെ, ചിന്നക്കടയിലെ ജ്യൂസ് കടയ്ക്കു സമീപംനിന്നവരെ പ്രകോപനമൊന്നുമില്ലാതെ ആക്രമിക്കുകയായിരുന്നു. കൊല്ലം പ്രസ് ക്ലബ്ബിൽ പത്രസമ്മേളനം നടത്തിയശേഷം സമീപത്തുള്ള ഹോട്ടലിൽ ജില്ലാതല നിക്ഷേപകസംഗമം ഉദ്ഘാടനം ചെയ്യാൻ മന്ത്രി പി.രാജീവ് പോകുന്നതിനു തൊട്ടുമുമ്പാണ് ആക്രമണമുണ്ടായത്. ജില്ലാ സെക്രട്ടറി ശ്യാംമോഹന്റെ നേതൃത്വത്തിൽ എത്തിയ നാല്പതോളം ഡി.വൈ.എഫ്.ഐ. പ്രവർത്തകരാണ് ആക്രമണം നടത്തിയത്.
യൂത്ത് കോൺഗ്രസ് സംസ്ഥാന ജനറൽ സെക്രട്ടറി ഫൈസൽ കുളപ്പാടം, അഞ്ചാലുംമൂട് ബ്ലോക്ക് പ്രസിഡന്റ് ശരത് മോഹൻ, കെ.എസ്‌.യു. ഇരവിപുരം ബ്ലോക്ക് വൈസ് പ്രസിഡന്റ് അജ്മൽ, ജില്ലാസെക്രട്ടറി ആഷിഖ് ബൈജു തുടങ്ങിയവർക്കും മർദനമേറ്റു. ചിലരെ മൂക്കിനിടിക്കുകയും നിലത്തിട്ട് ചവിട്ടുകയും ചെയ്തു. ഇവരെ ജില്ലാ ആശുപത്രിയിൽ പ്രവേശിപ്പിച്ചു.
ചിന്താ ജെറോമിനെതിരേ പരാതിനൽകുമോയെന്നു ചോദിച്ച് മർദിച്ചെന്നാണ് വിഷ്ണുസുനിൽ പന്തളം പോലീസിനുനൽകിയ മൊഴിയിൽ പറയുന്നത്. ഡി.വൈ.എഫ്.ഐ. ജില്ലാ സെക്രട്ടറി ശ്യാംമോഹൻ, ബ്ലോക്ക് പ്രസിഡന്റ് ബിലാൽ, വൈസ് പ്രസിഡന്റ് സനോഫർ എന്നിവർക്കെതിരേയാണ് പരാതി. തങ്ങൾക്കുനേരേ നടന്ന ആക്രമണം ചിന്താ ജെറോം നൽകിയ ക്വട്ടേഷൻ ആണെന്ന് മർദനമേറ്റ വിഷ്ണുസുനിൽ പന്തളം ആരോപിച്ചു.
കേസെടുത്തു
:ഡി.വൈ.എഫ്.ഐ. ജില്ലാ സെക്രട്ടറി ശ്യാം മോഹൻ, കോർപ്പറേഷൻ സ്ഥിരംസമിതി അധ്യക്ഷ യു.പവിത്ര, സനോഫർ, വൈശാഖ്, ബിലാൽ, ഷൈജു എന്നിവരുടെ പേരിലും കണ്ടാലറിയാവുന്ന 20-ഓളം ഡി.വൈ.എഫ്.ഐ. പ്രവർത്തകരുടെ പേരിലും ഈസ്റ്റ് പോലീസ് കേസെടുത്തു.
Content Highlights: dyfi workers attacked congress workers in kollam
Also Watch
RELATED STORIES
.jpg?$p=9396e2d&f=1x1&w=100&q=0.8)
IN CASE YOU MISSED IT
.jpg?$p=a80322e&f=1x1&w=100&q=0.8)
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..