നാദാപുരം: എളയടത്ത് വോളിബോള്‍ കളി കഴിഞ്ഞ് മടങ്ങുകയായിരുന്ന സംഘത്തെ ആക്രമിച്ച് യുവാവിനെ തട്ടിക്കൊണ്ട് പോയ കേസില്‍ മുഖ്യസൂത്രധാരന്‍ ഉള്‍പ്പെടെ രണ്ടുപേര്‍ പിടിയില്‍. കാര്‍ത്തികപ്പള്ളി മുയിപ്ര കോട്ടോളി ഫൈസല്‍ (37), വില്യാപ്പള്ളി ചേരിപ്പൊയില്‍ നീലിയത്ത് സെയ്ത് അലിയാര്‍ സെയ്ത് (38) എന്നിവരെയാണ് നര്‍ക്കോട്ടിക് ഡിവൈ.എസ്.പി. സി. സുന്ദരന്റെ നേതൃത്വത്തിലുള്ള പ്രത്യേക അന്വേഷണ സംഘം അറസ്റ്റ് ചെയ്തത്.
ഒരു കിലോ സ്വര്‍ണം തട്ടിയെടുത്തത് തിരിച്ചുപിടിക്കാന്‍ ക്വട്ടേഷന്‍ സംഘത്തിന്റെ നേതൃത്വത്തില്‍ ആക്രമണം ആസൂത്രണം ചെയ്‌തെന്നാണ് പോലീസിന് ലഭിച്ച വിവരം. പന്തിരിക്കര സ്വദേശി ചെമ്പുനടക്കണ്ടിയില്‍ അജ്നാസ് (30) നെയാണ് വ്യാഴാഴ്ച അര്‍ധരാത്രിയോടെ തട്ടിക്കൊണ്ടുപോയത്. വോളിബോള്‍ മത്സരം കഴിഞ്ഞ് മടങ്ങുന്നതിനിടെ കാറിലെത്തിയ സംഘമാണ് തട്ടിക്കൊണ്ടുപോയത്.
അജ്നാസിനെ തട്ടിക്കൊണ്ടു പോകാന്‍ ആസൂത്രണം ചെയ്തത് ഫൈസലാണെന്ന് പോലീസ് പറഞ്ഞു. ഫൈസലിനുവേണ്ടി ദുബായില്‍നിന്ന് കൊടുത്തയച്ച ഒരു കിലോയിലധികം സ്വര്‍ണം അജ്നാസിന്റെ നേതൃത്വത്തില്‍ തട്ടിക്കൊണ്ടുപോയത് തിരിച്ചു പിടിക്കാനാണ് തട്ടിക്കൊണ്ടു പോകല്‍ ആസൂത്രണം ചെയ്തതെന്നാണ് പോലീസിന് കിട്ടിയ വിവരം. പ്രശ്‌നം പരിഹരിക്കാന്‍ സംഘങ്ങള്‍ തമ്മില്‍ നിരവധി പ്രാവശ്യം ചര്‍ച്ചയ്ക്കിരുന്നതായും പോലീസിന് വിവരം ലഭിച്ചിട്ടുണ്ട്. ഫൈസലിന്റെ പരാതിയില്‍ ഒരു കിലോ സ്വര്‍ണം കവര്‍ച്ച ചെയ്ത കേസില്‍ അജ്നാസടക്കമുള്ള ഏഴ് പേര്‍ക്കെതിരെ കഴിഞ്ഞ ദിവസം പോലീസ് കേസെടുത്തിരുന്നു.
ക്വട്ടേഷന്‍ സംഘം തട്ടിക്കൊണ്ടുപോയ അജ്നാസ് 24 മണിക്കൂറിനുള്ളില്‍ പോലീസില്‍ കീഴടങ്ങിയിരുന്നു. തന്നെ ആരും തട്ടിക്കൊണ്ടു പോയിട്ടില്ലെന്നും 10 ലക്ഷം രൂപയുടെ സാമ്പത്തിക ഇടപാടുണ്ടായിരുന്നെന്നുമാണ് അജ്നാസ് ആദ്യം പോലീസിനോട് പറഞ്ഞത്. എന്നാല്‍ ഇതിനുപിന്നില്‍ സ്വര്‍ണമിടപാടുള്ളതായി വിവരം ലഭിച്ചതോടെയാണ് റൂറല്‍ എസ്.പി. എ. ശ്രീനിവാസിന്റെ നിര്‍ദേശ പ്രകാരം പ്രത്യേക അന്വേഷണ സംഘത്തെ നിയോഗിച്ചത്. സംഭവത്തില്‍ അഞ്ച് പ്രതികളെക്കൂടി പിടികിട്ടാനുണ്ടെന്ന് പോലീസ് പറഞ്ഞു.
