നെയ്യാറ്റിന്‍കര: പന്ത ചീലാന്തിക്കുഴി, അരുവിപ്പുറം കൊടിതൂക്കിമല എന്നിവിടങ്ങളിലെ ചാരായം വാറ്റുകേന്ദ്രങ്ങളില്‍ എക്സൈസ് സംഘം റെയ്ഡ് നടത്തി. രണ്ടിടത്തുനിന്നുമായി ഒന്‍പത് ലിറ്റര്‍ ചാരായവും കോടയും ഉപകരണങ്ങളും പിടിച്ചെടുത്തു. ചീലാന്തിക്കുഴില്‍നിന്നു സ്ത്രീയെ അറസ്റ്റ് ചെയ്തു. മറ്റൊരു പ്രതി ഓടി രക്ഷപ്പെട്ടു.
പന്ത ചീലാന്തിക്കുഴിയിലെ ചാരായം വാറ്റുകേന്ദ്രത്തില്‍നിന്ന് മൂന്നുലിറ്റര്‍ ചാരായവും വാറ്റുപകരണങ്ങളും കോടയും പിടിച്ചെടുത്തു. ചാരായം വാറ്റുകയായിരുന്ന മേരി ബേബി(60)യെ അറസ്റ്റുചെയ്തു. ഇവരുടെ മകന്‍ അനില്‍കുമാര്‍(40) ഓടി രക്ഷപ്പെട്ടു.
വീടിന്റെ അടുക്കളയില്‍ ചാരായം വാറ്റുമ്പോഴാണ് എക്സൈസ് സംഘം റെയ്ഡിനെത്തിയത്. വാറ്റിയെടുത്ത മൂന്നുലിറ്റര്‍ ചാരായം ഇവിടെനിന്നു എക്സൈസ് ഇന്‍സ്‌പെക്ടര്‍ പി.എല്‍.ഷിബുവിന്റെ നേതൃത്വത്തിലുള്ള സംഘം കണ്ടെടുത്തു.
45 ലിറ്റര്‍ കോടയും വാറ്റുപകരണങ്ങളും കണ്ടെടുത്തു. കോടതിയില്‍ ഹാജരാക്കിയ മേരി ബേബിയെ റിമാന്‍ഡ് ചെയ്തു. മേരി ബേബിയുടെ മകന്‍ അനില്‍കുമാറിനായി തിരച്ചില്‍ ശക്തമാക്കിയതായി എക്സൈസ് നെയ്യാറ്റിന്‍കര സര്‍ക്കിള്‍ ഇന്‍സ്‌പെക്ടര്‍ പി.എല്‍.ഷിബു അറിയിച്ചു. റെയ്ഡില്‍ പ്രിവന്റീവ് ഓഫീസര്‍ രാധാകൃഷ്ണന്‍, സി.ഇ.ഒ.മാരായ വി.ശശി, അഖില്‍, ഹരിപ്രസാദ് എന്നിവരും പങ്കെടുത്തു.
അരുവിപ്പുറം കൊടിതൂക്കിമലയില്‍ എക്സൈസ് നെയ്യാറ്റിന്‍കര റെയ്ഞ്ച് നടത്തിയ തിരച്ചിലില്‍ ആറ് ലിറ്റര്‍ വാറ്റുചാരായം പിടിച്ചെടുത്തു. കോട സൂക്ഷിച്ച 15 കുടങ്ങളും വാറ്റുപകരണങ്ങളും ഇവിടെനിന്നു പിടിച്ചെടുത്തു. പ്രതികള്‍ ഓടിരക്ഷപ്പെട്ടു.
Content Highlights: mother and son made arrack in home, excise seized
