ചാലക്കുടി: കഞ്ചാവ് വില്‍പ്പന ചോദ്യംചെയ്തതിന് ഫ്‌ളാറ്റില്‍ താമിസിക്കുന്നയാളെ ആക്രമിച്ച കേസില്‍ മുന്നുപേര്‍കൂടി അറസ്റ്റിലായി. പടിഞ്ഞാറേ ചാലക്കുടി എട്ടുവീട് കോളനിയില്‍ എടക്കളത്തൂര്‍ വീട്ടില്‍ സിജോ വില്‍സണ്‍ (23), കിരിങ്ങാഴികത്ത് വിപിന്‍ വേലായുധന്‍ (22), തിരുത്തിപ്പറമ്പ് മടവന്‍പാട്ടില്‍ വീട്ടില്‍ അജിത് അയ്യപ്പന്‍(28) എന്നിവരാണ് അറസ്റ്റിലായത്.

ഈ കേസില്‍ അഞ്ചു പ്രതികളാണുള്ളത്. ഒരാള്‍ കഴിഞ്ഞ ദിവസം അറസ്റ്റിലായിരുന്നു. ഒരാള്‍ മുന്‍കൂര്‍ ജാമ്യം നേടി. കഴിഞ്ഞ സെപ്റ്റംബര്‍ 20-നാണ് സംഭവം നടന്നത്. കഞ്ചാവ് മാഫിയക്കെതിരേ പ്രതികരിച്ചെന്ന കാരണം പറഞ്ഞായിരുന്നു ആക്രമണം.

സംഭവത്തിനുശേഷം പ്രതികള്‍ ഒളിവിലായിരുന്നു. ചാലക്കുടി ഡിവൈ.എസ.്പി. സി.ആര്‍. സന്തോഷിന്റെ നേതൃത്വത്തിലുള്ള സംഘമാണ് പ്രതികളെ പിടികൂടിയത്. ആക്രമണത്തിനുശേഷം കര്‍ണാടകത്തിലേക്ക് കടന്ന സംഘം മുന്‍കൂര്‍ ജാമ്യത്തിനായി ശ്രമിക്കവേയാണ് പിടിയിലായത്.

ചാലക്കുടി എസ്.എച്ച്.ഒ. കെ.എസ്. സന്ദീപ്, എസ്.ഐ.എം.എസ്. ഷാജന്‍, എ.എസ്.ഐ.ഇ.എന്‍. സതീശന്‍ ക്രൈംസ്‌ക്വാഡ് അംഗങ്ങളായ ജിനുമോന്‍ തച്ചേത്ത്, സതീശന്‍ മടപ്പാട്ടില്‍, സി.എ. ജോബ്, റോയ് പൗലോസ്, പി.എം. മൂസ, വി.യു. സില്‍ജോ, എ.യു. റെജി, എം.ജെ. ബിനു, ഷിജോ തോമസ് എന്നിവരാണ് അന്വേഷണ സംഘത്തിലുണ്ടായിരുന്നത്.