പരപ്പനങ്ങാടി:  അരിയല്ലൂര്‍ ബീച്ചില്‍ കഞ്ചാവ് വില്‍പനക്കിടെ പിടിയിലായ ആള്‍ രക്ഷപ്പെടാനായി കടലില്‍ ചാടിയെങ്കിലും എക്‌സൈസുകാര്‍ പിറകെ ചാടി പിടികൂടി. പരപ്പനങ്ങാടി റെയിഞ്ച് എക്സൈസിന്റെ പിടിയിലായ വൈശ്യക്കാരന്റെ പുരക്കല്‍ നൗഷാദ്(36) ആണ് കടലില്‍ ചാടിയത്.  രാത്രി 9 മണിക്ക് പ്രതിയുടെ വീടിന്റെ പരിസരത്ത് ഇരുട്ടില്‍ മറഞ്ഞിരുന്ന എക്‌സൈസുകാര്‍ പ്രതി കഞ്ചാവ് കൈമാറുന്നതിനിടെ പിടികൂടുകയായിരുന്നു. 

എക്‌സൈസുകാര്‍ കഞ്ചാവ് പരിശോധിക്കുന്നതിനിടെ കടല്‍ഭിത്തി ചാടിക്കടന്ന് കടലിലേക്ക് ചാടി ചെട്ടിപ്പടി ഭാഗത്തേക്ക് നീന്തി രക്ഷപ്പെടാന്‍ ശ്രമിക്കുകയായിരുന്നു. പിന്തുടര്‍ന്ന എക്‌സൈസുകാര്‍ പുതിയ പാലത്തിന് സമീപം വെച്ച് പ്രതിയെ നാട്ടുകാരുടെ സഹായത്തോടെ പിടികൂടി. തിരയില്‍ പെട്ട പ്രതി നൗഷാദിന് പരിക്കേറ്റിട്ടുണ്ട്. പ്രിവന്റീവ് ഓഫീസര്‍ ബിജു, സിവില്‍ എക്സൈസ് ഓഫീസര്‍ നിതിന്‍ ചോമാരി എന്നിവര്‍ക്കും കടല്‍ഭിത്തിക്കിടയില്‍ വീണും തിരയില്‍ പെട്ടും പരിക്കേറ്റു.

പരിക്കേറ്റവരെ രാത്രി തന്നെ തിരുരങ്ങാടി താലുക്ക് ആശുപത്രിയില്‍ ചികിത്സക്ക് വിധേയരാക്കി. ആരുടെയും പരിക്ക് ഗുരുതരമല്ല.  ഇന്റലിജന്‍സ് ബ്യൂറോ പ്രിവന്റീവ് ഓഫീസര്‍ വി.കെസൂരജും പ്രതിയെ പിടികൂടിയ സംഘത്തിലുണ്ടായിരുന്നു. 

Content Highlight: excise catches ganja dealer