കോഴിക്കോട്: പെണ്‍കുട്ടിയുമായി മുങ്ങിയ പ്രതി ബെംഗളൂരുവില്‍ പിടിയില്‍. കൊയിലാണ്ടി കൊല്ലം കിഴക്കേ വാര്യംവീട്ടില്‍ സിദ്ദിഖിന്റെ മകന്‍ ഷാനിത് (26) ആണ് പിടിയിലായത്. പെണ്‍കുട്ടിയെ കാണാതായ കേസില്‍ കുന്ദമംഗലം പോലീസിന്റെ അന്വേഷണത്തിനിടെ ബെംഗളൂരുവില്‍ നിന്നാണ് പെണ്‍കുട്ടിയോടൊപ്പം പ്രതിയെ കണ്ടെത്തിയത്. പെണ്‍കുട്ടിയുടെ ഫോണ്‍ നമ്പര്‍ കേന്ദ്രീകരിച്ച് പോലീസ് നടത്തിയ അന്വേഷണത്തിലാണ് ഇയാള്‍ വലയിലായത്. തുടര്‍ന്ന് കുന്ദമംഗലത്തെത്തിച്ച് അറസ്റ്റുചെയ്ത പ്രതിയെ കുന്ദമംഗലം കോടതിയില്‍ ഹാജരാക്കി.
മെഡിക്കല്‍കോളേജ് പോലീസ്സ്റ്റേഷന്‍ പരിധിയില്‍ നിന്ന് മോഷണംപോയ ബൈക്കുമായി നഗരത്തിലും റൂറല്‍ ജില്ലയിലും സഞ്ചരിക്കുന്നുവെന്ന വിവരത്തിന്റെ അടിസ്ഥാനത്തില്‍ അന്വേഷണം വ്യാപിപ്പിച്ചിരുന്നു. ഇതേത്തുടര്‍ന്ന് പ്രതിയെന്ന് സംശയിക്കുന്നയാളുടെ ചിത്രം സാമൂഹിക മാധ്യമങ്ങളില്‍ പോലീസ് പ്രചരിപ്പിച്ചിരുന്നു. ഇതേസമയം കുന്ദമംഗലം പോലീസ് സ്റ്റേഷന്‍ പരിധിയില്‍നിന്ന് പെണ്‍കുട്ടിയുമൊത്ത് ഒരു യുവാവിനെ കാണാതായെന്ന കേസിന്റെ അന്വേഷണത്തില്‍ യുവാവിന് പ്രതിയുമായി സാമ്യമുണ്ടെന്ന് കണ്ടെത്തി. തുടര്‍ന്ന് കുന്ദമംഗലം പോലീസ് സ്റ്റേഷന്‍ പ്രിന്‍സിപ്പല്‍ എസ്.ഐ. ശ്രീജിത്തും മെഡിക്കല്‍കോളേജ് സ്റ്റേഷന്‍ പ്രിന്‍സിപ്പല്‍ എസ്.ഐ. ടി.വി. ധനഞ്ജയദാസും നോര്‍ത്ത് എ.സി. അഷ്റഫിന്റെ നിര്‍ദേശപ്രകാരം നടത്തിയ അന്വേഷണത്തില്‍ പെണ്‍കുട്ടിയെയും പ്രതിയെയും ബെംഗളൂരുവില്‍ കണ്ടെത്തുകയായിരുന്നു.
കൊയിലാണ്ടിയില്‍ മറ്റൊരു ബൈക്ക് മോഷ്ടിച്ചതായും പ്രതി സമ്മതിച്ചു. ബാലുശ്ശേരിയിലും മേത്തോട്ട്താഴത്തും വെച്ച് മോഷ്ടിച്ച രണ്ട് ബൈക്കുകളും പോലീസ് കസ്റ്റഡിയിലെടുത്തു. മുമ്പ് എലത്തൂര്‍ പോലീസ് സ്റ്റേഷനില്‍ രജിസ്റ്റര്‍ ചെയ്ത കേസിലും പ്രതിയായ ഷാനിത് ആറുമാസം ജയില്‍ശിക്ഷ അനുഭവിച്ചിട്ടുണ്ടെന്നും പോലീസ് പറഞ്ഞു. പെണ്‍കുട്ടികളെ പ്രേമിച്ച് സ്വര്‍ണാഭരണങ്ങള്‍ തട്ടിയെടുക്കുന്ന രീതിയും പ്രതിക്കുള്ളതായി കുന്ദമംഗലം പോലീസ് അറിയിച്ചു. മെഡിക്കല്‍ കോളേജ് സ്റ്റേഷനിലെ സീനിയര്‍ സി.പി.ഒ. മാരായ മധു, ഷിജീഷ്, പ്രമോദ്, സി.പി.ഒ. മാരായ രജീഷ്, സുധീഷ് എന്നിവരും അന്വേഷണ സംഘത്തിലുണ്ടായിരുന്നു.
