തിരൂര്‍: അക്കൗണ്ട് ഉടമകളറിയാതെ അക്കൗണ്ടില്‍ നിന്ന് ഉടമയുടെ ചെക്ക്ലീഫില്‍ വ്യാജ ഒപ്പിട്ട് 64 ലക്ഷം രൂപ തട്ടിയെടുത്ത ബാങ്ക് അസി.മാനേജര്‍ അറസ്റ്റിലായി. നിറമരുതൂര്‍ കുമാരന്‍പടി സ്വദേശിയും ഐ.സി.ഐ.സി.ഐ. ബാങ്ക് അസി. മാനേജരുമായ കൂരിയില്‍ രഞ്ജിത്തി (31) നെയാണ് തിരൂര്‍ സി.ഐ.പി. അബ്ദുള്‍ബഷീര്‍ അറസ്റ്റുചെയ്തത്.
തിരൂര്‍ പാന്‍ബസാര്‍ ബ്രാഞ്ചിന്റെ അസി. മാനേജരായിരിക്കെയാണ് വാണിയന്നൂര്‍ സ്വദേശിയും ഗള്‍ഫുകാരനുമായ മുഹമ്മദിന്റെ ഫിക്‌സഡ്, എസ്.ബി അക്കൗണ്ടുകളില്‍നിന്നായി ചെക്കില്‍ മുഹമ്മദിന്റെ വ്യാജ ഒപ്പിട്ട് 55 ലക്ഷംരൂപ തട്ടിയെടുത്തതെന്ന് പോലീസ് പറഞ്ഞു.
പുതിയ ചെക്ക് ബുക്കിനായി അക്കൗണ്ട് ഉടമ അപേക്ഷ നല്‍കിയെങ്കിലും രഞ്ജിത്ത് ബുക്ക് നല്‍കിയില്ല. തുടര്‍ന്ന് മാനേജര്‍ക്ക് പരാതി നല്‍കുകയും അക്കൗണ്ട് പരിശോധിക്കുകയും ചെയ്തപ്പോഴാണ് തട്ടിപ്പ് വെളിവായത്. തുടര്‍ന്ന് ബാങ്ക് മാനേജര്‍ തിരൂര്‍ പോലീസില്‍ പരാതി നല്‍കുകയായിരുന്നു.
ഇതിനിടയില്‍ ഇയാള്‍ ബാങ്കിന്റെ പരപ്പനങ്ങാടി ശാഖയിലേക്ക് സ്ഥലംമാറിപ്പോയിരുന്നു. അവിടെ രണ്ടുപേരുടെ അക്കൗണ്ടില്‍നിന്നായി ഒമ്പതുലക്ഷം രൂപ പിന്‍വലിച്ച് വെട്ടിപ്പുനടത്തിയതായും കണ്ടെത്തി. ഇയാള്‍ തിരൂര്‍ അന്നാര സ്വദേശിയായ ഇജാസില്‍ നിന്ന് മൂന്നുലക്ഷംരൂപ കടംവാങ്ങിയിട്ട് തിരിച്ചുനല്‍കിയിട്ടില്ലെന്നും പോലീസിന് പരാതി നല്‍കിയിട്ടുണ്ട്.
ഒളിവില്‍ പോയ പ്രതി മുന്‍കൂര്‍ ജാമ്യത്തിനായി ശ്രമിച്ചുവെങ്കിലും വിഫലമായി. തുടര്‍ന്നാന്ന് അറസ്റ്റുണ്ടായത്. പ്രതിയെ തിരൂര്‍ മജിസ്‌ട്രേറ്റ് കോടതിയില്‍ ഹാജരാക്കി.
Content highlights: Police, Crime news, Arrest
