മാന്നാര്‍: കുരട്ടിക്കാട് വിസ്മയവിലാസം വീട്ടില്‍ ബിന്ദു ബിനോയി(39)യെ സ്വര്‍ണക്കടത്തുസംഘം തട്ടിക്കൊണ്ടുപോയ കേസില്‍ മൂന്നു പേര്‍ കൂടി പിടിയില്‍. മലപ്പുറം പൊന്നാനി ഈഴുവതിരുത്തി സ്വദേശികളായ കളപ്പരത്തിക്കല്‍ ധനീഷ് (അപ്പു-31), ഇളയാട്ടിപ്പറമ്പില്‍ അജയകുമാര്‍ (28), തൃശ്ശൂര്‍ ചാവക്കാട് എടക്കഴിയൂര്‍ വലിയപുരയ്ക്കല്‍ മുഹമ്മദ് ഫയാസ് (42) എന്നിവരെയാണ് മാന്നാര്‍ പോലീസ് അറസ്റ്റുചെയ്തത്. ഇതോടെ ഈ കേസില്‍ അറസ്റ്റിലായവരുടെ എണ്ണം 17 ആയി.

കഴിഞ്ഞ ഫെബ്രുവരി 19-ന് ദുബായില്‍നിന്നു നാട്ടിലെത്തിയ ബിന്ദുവിനെ 22-നു പുലര്‍ച്ചേയാണ് മാരകായുധങ്ങളുമായി വീടാക്രമിച്ച് ഒരുസംഘം തട്ടിക്കൊണ്ടുപോയത്. ദുബായില്‍നിന്ന് മുഹമ്മദ് ഹനീഫ എന്നയാള്‍ കൊടുത്തുവിട്ട സ്വര്‍ണം കേരളത്തിലെ സ്വര്‍ണക്കടത്തുസംഘത്തെ ഏല്‍പ്പിക്കാതിരുന്നതിനാലാണ് യുവതിയെ ഇവര്‍ തട്ടിക്കൊണ്ടുപോയതെന്നാണു പറയുന്നത്. എന്നാല്‍, ഈ സ്വര്‍ണം മലി വിമാനത്താവളത്തില്‍ ഉപേക്ഷിച്ചതായാണ് യുവതി പറയുന്നത്.

തട്ടിക്കൊണ്ടുപോയ യുവതിയെ സംഘം അന്നുതന്നെ പാലക്കാട് വടക്കഞ്ചേരിയില്‍ ഉപേക്ഷിക്കുകയും യുവതി പോലീസ് സഹായത്തോടെ നാട്ടിലെത്തുകയും ചെയ്തിരുന്നു.

ഇന്‍സ്‌പെക്ടര്‍ നൂമാന്റെ നേതൃത്വത്തിലുള്ള പോലീസ് സംഘമാണ് പ്രതികളെ അറസ്റ്റുചെയ്തത്.