തിരുവനന്തപുരം: പ്രൈമറി സ്‌കൂള്‍ അധ്യാപക നിയമനത്തിന് നവംബറില്‍ നടത്തുന്ന പരീക്ഷയ്ക്ക് ചോദ്യങ്ങള്‍ മലയാളം മാധ്യമത്തിലാണെന്ന് പി.എസ്.സി. പൊതുവിജ്ഞാനം, സമകാലികം, സാമൂഹികശാസ്ത്രം, നവോത്ഥാനം, അടിസ്ഥാനശാസ്ത്രം, ഗണിതം, കുട്ടികളുടെ മനഃശാസ്ത്രം തുടങ്ങി എല്ലാ ചോദ്യങ്ങളും മലയാളത്തിലാണ്. ഈ പരീക്ഷകളുടെ പാഠ്യപദ്ധതിയില്‍ പി.എസ്.സി. പുതുതായി മാറ്റങ്ങളൊന്നും വരുത്തിയിട്ടില്ല. 2009, 2016, 2017 വര്‍ഷങ്ങളില്‍ നടന്ന പരീക്ഷകളുടെ പാഠ്യപദ്ധതിയാണ് ഇപ്പോഴും സ്വീകരിച്ചിട്ടുള്ളത്.
ടി.ടി.സി. യോഗ്യതയുടെ അടിസ്ഥാനത്തില്‍ നിയമനംനേടുന്ന അധ്യാപകര്‍ ഒന്നുമുതല്‍ നാലുവരെയുള്ള ക്ലാസുകളിലെ ഇംഗ്ലീഷ് ഉള്‍പ്പെടെ എല്ലാ വിഷയങ്ങളും കൈകാര്യം ചെയ്യുന്നവരാണ്. അഞ്ചുമുതല്‍ ഏഴുവരെ ക്ലാസുകളില്‍ ഇംഗ്ലീഷ് ഉള്‍പ്പെടെ എല്ലാ വിഷയങ്ങളും പഠിപ്പിക്കുന്നവരാണ് യു.പി. അധ്യാപകര്‍. ഇതിന്റെ പാഠ്യക്രമത്തില്‍ ഇംഗ്ലീഷ് കൂടുതലായി ഉള്‍ക്കൊള്ളിച്ചിട്ടുണ്ട്. മാത്രമല്ല, ടി.ടി.സി.ക്കൊപ്പം ബി.എഡ്.കൂടി യോഗ്യതയുള്ളവരാണ് ഇതിലെ അപേക്ഷകര്‍. അതുകൊണ്ടാണ് 90 മാര്‍ക്കിന്റെ മലയാളം ചോദ്യങ്ങള്‍ക്കൊപ്പം 10 മാര്‍ക്കിന് ഇംഗ്ലീഷ് കൂടി ഉള്‍പ്പെടുത്തിയത്. ബിരുദം യോഗ്യതയുള്ളവര്‍ക്കുകൂടി അപേക്ഷിക്കാന്‍ കഴിയുന്ന തസ്തികയാണിതെന്നും പി.എസ്.സി. വിശദീകരിക്കുന്നു.
2014-ല്‍ ഡയറ്റ് അധ്യാപകര്‍ അടങ്ങിയ വിദഗ്ധര്‍ തയ്യാറാക്കിയ പാഠ്യപദ്ധതിയാണ് ഈ തസ്തികകള്‍ക്ക് ഇപ്പോഴുള്ളത്. ഇതനുസരിച്ചാണ് പരീക്ഷകള്‍ നടത്തുന്നത്. 2013 മുതല്‍ 2019 വരെ ടി.ടി.സി., ഡി.എഡ്., ബി.എഡ് തുടങ്ങിയ യോഗ്യതകള്‍ നേടിയ പതിനായിരക്കണക്കിന് ഉദ്യോഗാര്‍ഥികള്‍ പരീക്ഷയ്ക്കു തയ്യാറെടുക്കുമ്പോള്‍ അവരുടെ പരിശ്രമത്തെ നിയമപരമായി അംഗീകരിച്ച് മുന്നോട്ടുപോകാനേ കഴിയൂ.
പ്രൈമറി അധ്യാപകവൃത്തിയിലൂടെ എല്ലാ വിഷയങ്ങളിലും ഭാഷാനൈപുണ്യം പരിശോധിക്കുന്നതിന് ഇപ്പോഴത്തെ പാഠ്യപദ്ധതി പര്യാപ്തമാണെന്ന് വിദഗ്ധര്‍ സാക്ഷ്യപ്പെടുത്തിയിട്ടുള്ളതായും പി.എസ്.സി. അവകാശപ്പെടുന്നു. ഭാവിയില്‍ ബി.എഡ്., ഡി.എഡ്. പാഠ്യപദ്ധതിയനുസരിച്ച് ആവശ്യമായ മാറ്റംവരുത്താന്‍ വേണ്ടതു ചെയ്യുമെന്നും പി.എസ്.സി. അറിയിച്ചു.
പ്രൈമറി അധ്യാപകപരീക്ഷയ്ക്ക് ഭാഷയെന്ന നിലയില്‍ മലയാളത്തെ പാഠ്യപദ്ധതിയില്‍ ഉള്‍പ്പെടുത്താത്തത് വ്യാപകമായ പ്രതിഷേധമുയര്‍ത്തുകയാണ്. 'മാതൃഭാഷയെ പി.എസ്.സി. പേടിക്കുന്നതെന്തിന്?' എന്ന തലക്കെട്ടില്‍ ചൊവ്വാഴ്ച 'മാതൃഭൂമി' എഡിറ്റോറിയല്‍ പ്രസിദ്ധീകരിച്ചിരുന്നു.
Content Highlights: PSC Clarifies that it does not change LPSA syllabus, Exam will be conducted in Malayalam
