ഡോ. എസ്. രാജൂകൃഷ്ണൻ

02 June 2023, 05:21 PM IST

1 min read

Read later

പ്രതീകാത്മക ചിത്രം | ഫോട്ടോ: Canva

റിസർവ് ബാങ്ക് സ്ഥാപിച്ച ഹൈദരാബാദിലെ ഇൻസ്റ്റിറ്റ്യൂട്ട് ഫോർ െഡവലപ്മെന്റ് ആൻഡ് റിസർച്ച് ഇൻ ബാങ്കിങ് ടെക്‌നോളജി (ഐ.ഡി.ആർ.ബി.ടി.), ഒരുവർഷം ദൈർഘ്യമുള്ള ഫുൾടൈം, റെഗുലർ, പോസ്റ്റ് ഗ്രാജ്വേറ്റ് ഡിപ്ലോമ ഇൻ ബാങ്കിങ് ടെക്നോളജി (പി.ജി.ഡി.ബി.ടി.) പ്രോഗ്രാം പ്രവേശനത്തിന് അപേക്ഷ ക്ഷണിച്ചു. ബാങ്കിങ്, ഫിനാൻഷ്യൽമേഖലകളിലെ മാറ്റങ്ങളും പുതിയകാര്യങ്ങളും മനസ്സിലാക്കാൻ പ്രോഗ്രാം സഹായിക്കും.

സാങ്കേതികവിദ്യ നടപ്പാക്കൽ, സംയോജനം, മാനേജ്മെൻറ് എന്നിവ അടിസ്ഥാനമാക്കിയുള്ള പഠനങ്ങൾക്കു പ്രോഗ്രാം ഊന്നൽ നൽകുന്നു. ആധുനിക സാങ്കേതികവിദ്യകൾ ഉപയോഗിച്ച് ബാങ്കിങ് ആൻഡ് ഫിനാൻഷ്യൽമേഖല ടെക്നോ-എഫിഷ്യൻറ്‌ ആക്കാനും പ്രോഗ്രാം ലക്ഷ്യമിടുന്നു.

പ്രോഗ്രാമിലേക്ക് ഡയറക്ട്‌, സ്പോൺസേഡ് വിഭാഗ പ്രവേശനങ്ങൾ ഉണ്ട്. സ്പോൺസേഡ് വിഭാഗത്തിൽ ബാങ്കുകളിലെയും സാമ്പത്തികസ്ഥാപനങ്ങളിലെയും ഉദ്യോഗസ്ഥർക്ക് അപേക്ഷിക്കാം. ഇരുവിഭാഗങ്ങളിലെയും അപേക്ഷകർക്ക് ഫസ്റ്റ് ക്ലാസ് (60 ശതമാനം മാർക്കോടെ) എൻജിനിയറിങ് ബിരുദമോ ഏതെങ്കിലും വിഷയത്തിലെ, ഫസ്റ്റ് ക്ലാസോടെയുള്ള മാസ്റ്റേഴ്സ് ബിരുദമോ വേണം. യോഗ്യതാകോഴ്സ് 2023 ജൂൺ 30-നകം പൂർത്തിയാക്കുന്നവർക്കും ഡയറക്ട് വിഭാഗത്തിൽ അപേക്ഷിക്കാം. ഡയറക്ട്‌ പ്രവേശനം തേടുന്നവർക്ക്, അപേക്ഷ നൽകുമ്പോൾ, സാധുവായ ഗേറ്റ്/കാറ്റ്/ജിമാറ്റ്/ജി.ആർ.ഇ./സിമാറ്റ്/സാറ്റ്/മാറ്റ്/ആത്മ സ്കോർവേണം (മറ്റുള്ളവർക്ക് ഈ സ്കോർ വേണ്ട). ഈ സ്കോർ പരിഗണിച്ചാണ്, അപേക്ഷകരെ ഗ്രൂപ്പ് ഡിസ്കഷൻ, പേഴ്സണൽ ഇന്റർവ്യൂ (ജി.ഡി.പി.ഐ.) എന്നിവയ്ക്കായി ഷോർട്ട് ലിസ്റ്റ് ചെയ്യപ്പെടുന്നത്.

സ്പോൺസേഡ് വിഭാഗക്കാർക്കും ജി.ഡി.പി.ഐ. ഉണ്ടാകും. ജി.ഡി.പി.ഐ. സ്കോർ പരിഗണിച്ചാണ് അന്തിമ തിരഞ്ഞെടുപ്പ്. അപേക്ഷ www.idrbt.ac.in/pgdbt/ വഴി ജൂൺ ആറ് വരെ നൽകാം. പ്രോഗ്രാം ഫീസ് അഞ്ച് ലക്ഷംരൂപ നാലുഗഡുക്കളായി നൽകണം.