പത്താം ക്ലാസുകാര്‍ക്ക് ഇന്റലിജന്‍സ് ബ്യൂറോയില്‍ അവസരം; 1675 ഒഴിവുകള്‍ 

തിരുവനന്തപുരം ഉള്‍പ്പെടെ 37 സബ്‌സിഡിയറി ബ്യൂറോകളിലായാണ് ഒഴിവുകള്‍. തിരുവനന്തപുരത്ത് സെക്യൂരിറ്റി അസിസ്റ്റന്റിന്റെ 126 ഒഴിവും (ജനറല്‍ 81, ഒ.ബി.സി.-എന്‍.സി.എല്‍.-9, എസ്.സി.-20, എസ്.ടി.-3, ഇ.ഡബ്ല്യു.എസ്.-13) മള്‍ട്ടി ടാസ്‌കിങ് സ്റ്റാഫിന്റെ 6 (ജനറല്‍ 3, ഒ.ബി.സി.-എന്‍.സി.എല്‍.-2, ഇ.ഡബ്ല്യു.എസ്.-1) ഒഴിവുമാണുള്ളത്.

ഇതേ തസ്തികകളിലേക്ക് 2022 നവംബറില്‍ പുറത്തിറക്കിയ വിജ്ഞാപനം സാങ്കേതിക കാരണങ്ങളാല്‍ പിന്‍വലിച്ചിരുന്നു. ഇപ്പോള്‍ ഏതാനും മാറ്റങ്ങളോടെ വീണ്ടും പ്രസിദ്ധീകരിച്ചിരിക്കുകയാണ്. അപേക്ഷ ഓണ്‍ലൈനായി സമര്‍പ്പിക്കണം.

സബ്‌സിഡിയറി ബ്യൂറോകള്‍: അഗര്‍ത്തല, അഹമ്മദാബാദ്, എയ്‌സ്വാള്‍, അമൃത്സര്‍, ബെംഗളൂരു, ഭോപ്പാല്‍, ഭുവനേശ്വര്‍, ചണ്ഡീഗഢ്, ചെന്നൈ, ദെഹ്‌റാദൂണ്‍, ഡല്‍ഹി/ ഐ.ബി. ഹെഡ് ക്വാര്‍ട്ടേഴ്‌സ്, ദിബ്രൂഗഢ്. ഗാങ്‌ടോക്, ഗുവാഹാട്ടി, ഹൈദരാബാദ്, ഇംഫാല്‍, ഇറ്റാനഗര്‍, ജയ്പുര്‍, ജമ്മു, കൊഹിമ, കാലിംപോങ്, കൊല്‍ക്കത്ത, ലേ, ലഖ്‌നൗ, മീററ്റ്, മുംബൈ, നാഗ്പുര്‍, പട്‌ന, റായ്പുര്‍, റാഞ്ചി, ഷില്ലോങ്, ഷിംല, സിലിഗുരി, ശ്രീനഗര്‍, തിരുവനന്തപുരം, വാരാണസി, വിജയവാഡ.
ശമ്പളം: സെക്യൂരിറ്റി അസിസ്റ്റന്റ്/ എക്സിക്യുട്ടീവ് തസ്തികയില്‍ 21,700-69,100 രൂപയും എം.ടി.എസ്. (ജനറല്‍) തസ്തികയില്‍ 18,000-56,900 രൂപയുമാണ് ശമ്പളം. കേന്ദ്രഗവണ്‍മെന്റിന്റെ മറ്റ് അലവന്‍സുകളും 20 ശതമാനം സ്‌പെഷ്യല്‍ സെക്യൂരിറ്റി അലവന്‍സും ലഭിക്കും.

യോഗ്യത: പത്താംക്ലാസ് വിജയം/ തത്തുല്യമാണ് വിദ്യാഭ്യാസയോഗ്യത. ഏത് സംസ്ഥാനത്തേക്കാണോ അപേക്ഷിക്കുന്നത് ആ സംസ്ഥാനത്തെ താമസക്കാരനായിരിക്കണം. ആ സംസ്ഥാനത്തെ പ്രാദേശികഭാഷ അറിയുകയുംവേണം.

പ്രായം: സെക്യൂരിറ്റി അസിസ്റ്റന്റ്/ എക്സിക്യുട്ടീവ് തസ്തികയിലേക്ക് 27 വയസ്സും എം.ടി.എസ്. (ജനറല്‍) തസ്തികയിലേക്ക് 18-25 വയസ്സുമാണ് ഉയര്‍ന്ന പ്രായം. അപേക്ഷ സ്വീകരിക്കുന്ന അവസാന തീയതി അടിസ്ഥാനമാക്കിയാണ് പ്രായം കണക്കാക്കുക. എസ്.സി., എസ്.ടി., വിഭാഗക്കാര്‍ക്ക് അഞ്ചുവര്‍ഷത്തെയും ഒ.ബി.സി. വിഭാഗക്കാര്‍ക്ക് മൂന്നുവര്‍ഷത്തെയും ഇളവ് ലഭിക്കും. ഭിന്നശേഷിക്കാര്‍ക്കും വിമുക്തഭടന്മാര്‍ക്കും നിയമാനുസൃത വയസ്സിളവുണ്ട്. വിധവകള്‍ക്കും പുനര്‍വിവാഹിതരാവാത്ത വിവാഹമോചിതകള്‍ക്കും വയസ്സിളവിന് (ജനറല്‍-35 വയസ്സുവരെ, എസ്.സി., എസ്.ടി.-40 വയസ്സുവരെ) അര്‍ഹതയുണ്ട്.

പരീക്ഷ: രണ്ടുഘട്ട പരീക്ഷയും തുടര്‍ന്ന് അഭിമുഖവും നടത്തിയായിരിക്കും തിരഞ്ഞെടുപ്പ്. രണ്ട് തസ്തികകളിലേക്കും പൊതുവായി നടത്തുന്ന ഒന്നാംഘട്ട പരീക്ഷ ഒബ്ജെക്ടീവ് മാതൃകയിലായിരിക്കും. ഒരുമണിക്കൂറാണ് സമയം. 100 മാര്‍ക്കിനുള്ള പരീക്ഷയില്‍ അഞ്ച് ചോദ്യമേഖലകളാണ് (ഓരോന്നിനും 20 മാര്‍ക്ക് വീതം). ജനറല്‍ അവേര്‍നെസ്, ക്വാണ്ടിറ്റേറ്റീവ് ആപ്റ്റിറ്റിയൂഡ്, ന്യൂമറിക്കല്‍/ അനലിറ്റിക്കല്‍/ ലോജിക്കല്‍ എബിലിറ്റി ആന്‍ഡ് റീസണിങ്, ഇംഗ്ലീഷ് ലാംഗ്വേജ്, ജനറല്‍ സ്റ്റഡീസ് എന്നിവയാണ് ചോദ്യമേഖലകള്‍. ഓരോ ശരിയുത്തരത്തിനും ഓരോ മാര്‍ക്ക്. തെറ്റുത്തരത്തിന് നാലിലൊന്ന് മാര്‍ക്ക് നഷ്ടമാവും. രണ്ടാംഘട്ടപരീക്ഷയുടെ 40 മാര്‍ക്കിനുള്ള ആദ്യഭാഗം രണ്ട് തസ്തികകളിലേക്കും ബാധകമാണ്. വിവരണാത്മകരീതിയിലുള്ള ഓഫ്ലൈന്‍ പരീക്ഷയായിരിക്കും ഇത്. ഒരുമണിക്കൂറായിരിക്കും സമയം. പ്രാദേശികഭാഷയില്‍നിന്ന് ഇംഗ്ലീഷിലേക്കും തിരിച്ചുമുള്ള തര്‍ജമയാണിത്.

സെക്യൂരിറ്റി അസിസ്റ്റന്റ്/ എക്സിക്യുട്ടീവ് തസ്തികയിലേക്ക് അപേക്ഷിക്കുന്നവര്‍ക്ക് ഇതിനുപുറമേ 10 മാര്‍ക്കിാേന് ഭാഷാപരിജ്ഞാനം പരിശോധിക്കാനുള്ള പരീക്ഷകൂടിയുണ്ടാവും. പരീക്ഷകള്‍ സംബന്ധിച്ച വിശദവിവരങ്ങള്‍ വെബ്‌സൈറ്റില്‍ ലഭിക്കും.

ഫീസ്: എല്ലാ അപേക്ഷകരും പ്രോസസിങ് ചാര്‍ജായ 450 രൂപ നല്‍കണം. ഇത് കൂടാതെ ജനറല്‍, ഇ.ഡബ്ല്യു.എസ്., ഒ.ബി.സി. വിഭാഗങ്ങളില്‍ പെടുന്ന പുരുഷ ഉദ്യോഗാര്‍ഥികള്‍ പരീക്ഷാഫീസായ 50 രൂപകൂടി അടയ്ക്കണം). ഫീസ് ഓണ്‍ലൈനായും എസ്.ബി.ഐ. ചലാന്‍ മുഖേനയും അടയ്ക്കാം. വിശദവിവരങ്ങള്‍ www.mha.gov.in, www.ncs.gov.in എന്നീ വെബ്‌സൈറ്റുകളില്‍ ലഭിക്കും. അപേക്ഷ ഓണ്‍ലൈനായി സമര്‍പ്പിക്കണം. അപേക്ഷ സ്വീകരിക്കുന്ന അവസാന തീയതി: ഫെബ്രുവരി 10.