ദേബശിഷ്‌ ചാറ്റർജി | vijayamanthrammbi@gmail.com

10 February 2020, 11:35 AM IST

2 min read

Read later

സമ്പത്തിനുപിന്നാലെയല്ല, ലക്ഷ്യത്തിനുപിന്നാലെ പോവുക

സഹനം എന്നർഥംവരുന്ന പാഷ്യോ എന്ന ലാറ്റിൻ പദത്തിൽനിന്നാണ് പാഷൻ ആവിർഭവിക്കുന്നത്. ലക്ഷ്യപ്രാപ്തിക്കായി എന്തുംസഹിക്കാൻ തയ്യാറാവുന്ന അഭിനിവേശമാണത്. ജീസസിന്റെ ജറുസലേമിലേക്കുള്ള പ്രവേശനവും കുരിശുമരണവും വിശേഷിപ്പിക്കപ്പെട്ടത് പാഷൻ ഓഫ് ക്രൈസ്റ്റ് എന്നാണ്. ലക്ഷ്യത്തിലേക്കുള്ള ആ പാഷൻ, അഭിനിവേശം ഉള്ളവർ അവരുടെ മേഖലകളുടെ അതിരുകൾ മാറ്റിവരയ്ക്കും.

ആയൊരു സ്വയംകണ്ടെത്തൽ നടത്താതെ കിട്ടിയ മേഖലയിൽ വ്യാപരിക്കുന്നവർ സ്വയം വളരുകയോ അവരുടെ മേഖലകളെ വളർത്തുകയോ ഇല്ല. ശ്രദ്ധിച്ചുനോക്കിയാൽ അവർ ഉള്ളതുകൊണ്ടു തൃപ്തിപ്പെടുന്നവരായിരിക്കും. സ്വന്തം പരിമിതികൾക്കുള്ളിൽ സ്വയം തളച്ചിടുന്നവർ. ദാരിദ്ര്യത്തിന്റെ മറ്റൊരു രൂപമാണതും. സദാപരിമിതികൾക്കുള്ളിൽ ഒതുങ്ങിക്കഴിയുക ഭാവനാശൂന്യർ മാത്രമാണെന്നാണ് ഓസ്കാർ വൈൽഡ് നിരീക്ഷിച്ചത്. നമ്മേ ആവേശഭരിതമാക്കുന്ന ഒന്നിലേക്കുള്ള ഏകാഗ്രത പാഷന്റെ സൃഷ്ടിയാണ്. പാഷൻ തന്നെ ഊർജമെന്നു ഓഫ്ര വിൻഫി.

ദാരിദ്ര്യത്തിനും സമ്പത്തിനും വിശാലമായ ഒരു തലമുണ്ട്. മികവുറ്റ പ്രൊഫഷണൽ എന്നതുകൊണ്ട് ധാരാളം കാശുണ്ടാക്കുന്നവർ എന്നർഥമില്ല. കാശ് അവരെ തേടിചെല്ലുന്നതാണ്. എപ്പോൾ എന്നതാണു ചോദ്യം. ഉത്തരം കാശുകൊണ്ടു വാങ്ങാൻ പറ്റാത്ത എന്തെങ്കിലും നമ്മൾ സ്വയം കണ്ടെത്തുമ്പോഴാണ്. ഫോർബ്സ് മാഗസിൻ ലോകത്തെ അതിശക്തരായ വ്യക്തികളിൽ ഇരുപത്തൊന്നാമനായി അടയാളപ്പെടുത്തിയത് ചൈനയിലെ ഏറ്റവും സമ്പന്നനായ വ്യക്തിയും ബിസിനസ് സാമ്രാജ്യങ്ങളുടെ തലവനും നിക്ഷേപകനും രാഷ്ട്രീയക്കാരനും തത്ത്വചിന്തകനുമൊക്കെയായ ജാക്ക് മായെയാണ്.

അദ്ദേഹം ഒരു അഭിമുഖത്തിൽ തന്റെ ഭൂതകാലം അടയാളപ്പെടുത്തുന്നതിങ്ങനെ. ആദ്യനാളുകളിൽ മൊത്തം മുപ്പതുജോലികൾക്കായി അദ്ദേഹം അപേക്ഷിച്ചു. അതിൽ ഒന്ന് ഒരു പോലീസുകാരന്റെ ജോലിയായിരുന്നു. ഒന്നും കിട്ടിയില്ല. ഏറ്റവും രസകരമായ സംഭവം അദ്ദേഹത്തിന്റെ നഗരത്തിലേക്കു കെ.എഫ്.സി. വന്നപ്പോൾ അവിടെ ജോലിതേടി പോയത് ഇരുപത്തിനാലുപേരായിരുന്നു. ഒരാളെ ഒഴിച്ച് ബാക്കിയെല്ലാവരെയും കമ്പനി നിയമിച്ചു. ഒഴിവാക്കപ്പെട്ട ഒരാൾ ജാക് മാ ആയിരുന്നു. അവിടെനിന്നാണ് അദ്ദേഹം ആലിബാബ എന്ന ലോകപ്രശസ്ത ഇ-കോമേഴ്സ് ഗ്രൂപ്പിന്റെ അധിപനിലേക്കുള്ള ജൈത്രയാത്ര തുടങ്ങിയത്.

ഭൌതികമായ സമ്പത്തിനുവേണ്ടിയുള്ള അന്വേഷണം തെറ്റുംശരിയും തിരിച്ചറിയുന്ന നമ്മുടെ ബോധത്തെയാണു വഴിതെറ്റിക്കുക. നഷ്ടപ്പെടാൻ ഏറെ സാധ്യതയുള്ളതുമാണ് ഭൌതികമായ സമ്പത്തുകൾ. ഒരിക്കലും നഷ്ടപ്പെടാത്ത സമ്പത്തു കുടിയിരിക്കുന്നത് നമുക്കുള്ളിലാണ്, നമ്മുടേതുമാത്രമായ സിദ്ധികളിൽ. അതു കണ്ടെത്തുന്നതുവരെ ജാക് മായെ പോലെ സമ്പത്തു നമ്മേ തിരഞ്ഞുനോക്കുകയില്ല. കണ്ടെത്തുന്നതോടെ സമ്പത്തുപിന്നാലെ വരികയും ചെയ്യും. ആ സമ്പത്തിനെക്കൊണ്ട് മാറുക ലോകവുമാണ്. സമ്പദ്സൃഷ്ടിക്ക് ശരിയായ ഒരർഥം കൈവരുന്നതും അപ്പോഴാണ്.

(കോഴിക്കോട് ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് മാനേജ്‌മെന്റ് ഡയറക്ടറാണ് ലേഖകന്‍)

Content Highlights: Success often comes when you follow your passion

കരിയര്‍ സംബന്ധമായ വാര്‍ത്തകള്‍ക്കും വിവരങ്ങള്‍ക്കും JOIN Whatsapp Group https://mbi.page.link/mb-career