25 May 2023, 11:09 AM IST

1 min read

Read later

മുഹമ്മദ് ഹുസൈൻ (ഇരിക്കുന്നവരിൽ നടുക്ക്)കുടുംബാംഗങ്ങൾക്കൊപ്പം

മുംബൈ : സിവില്‍ സര്‍വീസ് പരീക്ഷയില്‍ മികച്ചവിജയം നേടി തുറമുഖത്തൊഴിലാളിയുടെ മകന്‍. മുംബൈയില്‍ ഡോക്ക് യാര്‍ഡില്‍ ജോലിചെയ്യുന്ന റംസാന്‍ സയിദിന്റെ മകന്‍ മുഹമ്മദ് ഹുസൈനാണ് മിന്നും വിജയം നേടിയത്. അഖിലേന്ത്യാറാങ്ക് പട്ടികയില്‍ 570-ാം സ്ഥാനത്താണ് ഹുസൈന്‍. ഒട്ടേറെ ദുര്‍ഘടങ്ങളെ മറികടന്ന് നേടിയെടുത്ത വിജയത്തില്‍ ഹുസൈന്റെ കുടുംബമാകെ സന്തോഷത്തിലാണ്.

27 കാരനായ ഹുസൈന്‍ നേരത്തേ നാല് പ്രാവശ്യം സിവില്‍ സര്‍വീസ് പരീക്ഷ എഴുതിയിരുന്നു. അഞ്ചാം തവണ ലക്ഷ്യം നേടി. വാഡിബന്ദര്‍ ലെയ്നില്‍ തുറമുഖത്തൊഴിലാളികള്‍ താമസിക്കുന്ന ചേരിപ്രദേശത്തുള്ള ചെറിയ മുറികളില്‍ ഒന്നിലാണ് ഹുസൈന്റെ കുടുംബവും താമസിക്കുന്നത്.

വീട്ടില്‍ മാതാപിതാക്കളെ കൂടാതെ സഹോദരങ്ങളും അവരുടെ കുടുംബവും വല്യമ്മയുമുണ്ട്. വീട്ടില്‍ നിന്നുതിരിയാന്‍ ഇടമില്ലാതിരിക്കുമ്പോഴും ഹുസൈന്‍ പഠനം മുടക്കിയിരുന്നില്ല. അടുത്തുള്ള ഡോര്‍മിറ്ററിയില്‍ വരെ പോയി പഠനത്തിന് സ്ഥലം കണ്ടെത്തിയിരുന്നു. ഡോംഗ്രിയിലെ സെയിന്റ് ജോസഫ് സ്‌കൂളില്‍ പഠിച്ച ഹുസൈന്‍ എലിഫിന്‍സ്റ്റണ്‍ കോളേജില്‍നിന്ന് ബിരുദം നേടി. 2018-ല്‍ ഐ.എ.എസ്. കോച്ചിങ് പരിശീലനം ആരംഭിച്ചു. മുംബൈ ഹജ്ജ് ഹൗസ് നടത്തുന്ന പരിശീലന ക്ലാസിലും പുണെയിലെ യുണീക് അക്കാദമിയിലും കൂടാതെ ഡല്‍ഹിയിലും പരിശീലനം നടത്തിയിരുന്നു. പരാജയങ്ങള്‍ തളര്‍ത്തിയില്ലെന്നും ലക്ഷ്യം നേടണമെന്ന ചിന്തതന്നെ പിന്നോട്ട് വലിച്ചിട്ടില്ലെന്നും ഹുസൈന്‍ പറയുന്നു.