പ്രകൃതിക്കും പരിസ്ഥിതിക്കും വേണ്ടി ഒറ്റയാള്‍ പോരാട്ടം നടത്തുന്ന സ്‌കൂള്‍ വിദ്യാര്‍ഥിനി ഗ്രേറ്റ ട്യൂന്‍ബെര്‍ഗ് 2019 സെപ്റ്റംബര്‍ 23ന് ന്യൂയോര്‍ക്കിലെ ഐക്യരാഷ്ട്രസഭാ ആസ്ഥാനത്ത് നടന്ന കാലാവസ്ഥാ ഉച്ചകോടിയില്‍ നടത്തിയ പ്രസംഗത്തില്‍ നിന്ന്:

'തെല്ലാം തെറ്റാണ്. ഇന്നിവിടെ ഇരിക്കേണ്ട ആളല്ല ഞാന്‍. കടലിനപ്പുറത്ത് സ്‌കൂളിലിരുന്ന് പഠിക്കേണ്ട കുട്ടിയാണ്. എന്നിട്ടും ഞങ്ങളുള്‍പ്പെടെയുള്ള യുവജനതയില്‍ പ്രതീക്ഷയര്‍പ്പിച്ച് നിങ്ങളിവിടെ വരുന്നു. നിങ്ങള്‍ക്കിതിന് എങ്ങനെ ധൈര്യമുണ്ടായി! പൊള്ളയായ വാഗ്ദാനങ്ങളിലൂടെ നിങ്ങളെന്റെ കുട്ടിക്കാലവും സ്വപ്‌നങ്ങളും കവര്‍ന്നു. ഇപ്പോള്‍ ഞാന്‍ ഭാഗ്യമുള്ളവരില്‍ ഒരാളാണ്. ജനങ്ങള്‍ ബുദ്ധിമുട്ടുകയാണ്. അവര്‍ മരിച്ചുകൊണ്ടിരിക്കുകയാണ്. ആവാസവ്യവസ്ഥ മുഴുവന്‍ തകര്‍ന്നടിയുന്നു. സര്‍വനാശത്തിന്റെ തുടക്കത്തിലാണ് നമ്മള്‍. എന്നിട്ടും ഇപ്പോഴും നിങ്ങള്‍ പണത്തെക്കുറിച്ചും ശാശ്വതമായ സാമ്പത്തികവളര്‍ച്ചയുടെ മായാജാലക്കഥകളെക്കുറിച്ചും മാത്രമാണ് സംസാരിക്കുന്നത്. എങ്ങനെയാണ് നിങ്ങള്‍ക്കതിന് ധൈര്യം വരുന്നത്!

മുപ്പതുവര്‍ഷംകൊണ്ട്, ശാസ്ത്രം അത്രമേല്‍ വളര്‍ന്നുകഴിഞ്ഞു. ഇതിനുള്ള രാഷ്ട്രീയപരിഹാരം കാണാമറയത്തായിട്ടും ഞങ്ങള്‍ വേണ്ടതെല്ലാം ചെയ്യുന്നുണ്ടെന്ന് ദൂരെ മാറിനിന്ന് പറയാന്‍ നിങ്ങള്‍ക്കെങ്ങനെ ധൈര്യംവരുന്നു!

ഞങ്ങളെ കേള്‍ക്കുന്നുണ്ടെന്നും ഞങ്ങള്‍ പറയുന്നതിന്റെ അടിയന്തരപ്രാധാന്യം മനസ്സിലാക്കുന്നുണ്ടെന്നും നിങ്ങള്‍ പറയുന്നു. ഞാനത് വിശ്വസിക്കാനാഗ്രഹിക്കുന്നില്ല. കാരണം, ഈ സാഹചര്യം ശരിക്കും മനസ്സിലായിട്ടുതന്നെയാണ് നിങ്ങളതിനെതിരേ വേണ്ട നടപടികളെടുക്കാതിരിക്കുന്നതെങ്കില്‍, നിങ്ങള്‍ ദുരാത്മാക്കളായിരിക്കണം. അങ്ങനെ വിശ്വസിക്കാന്‍ ഞാനാഗ്രഹിക്കുന്നില്ല.

Greta Thunberg

പത്തുവര്‍ഷംകൊണ്ട് കാര്‍ബണ്‍ ബഹിര്‍ഗമനം കുറയ്ക്കണമെന്ന വിഖ്യാതമായ ആശയം ഞങ്ങള്‍ക്കു നല്കുന്നത് 1.5 ഡിഗ്രി സെല്‍ഷ്യസെന്ന ആഗോളതാപന വര്‍ധനയ്ക്ക് താഴെ ജീവിക്കാനുള്ള 50 ശതമാനം സാധ്യത മാത്രമാണ്. ആഗോളതാപനമുണ്ടാക്കുന്ന പ്രത്യാഘാതങ്ങള്‍ മനുഷ്യന്റെ നിയന്ത്രണത്തിനപ്പുറത്തേക്ക് പോകുകയാണ്.

50 ശതമാനമെന്നത് നിങ്ങള്‍ക്ക് സ്വീകാര്യമായിരിക്കും. എന്നാല്‍ ആ സംഖ്യയില്‍ ചെറുതെങ്കില്‍പ്പോലും വലിയ മാറ്റങ്ങള്‍ക്ക് ഹേതുവാകുന്ന സുപ്രധാനമായ പല കാര്യങ്ങളും ഉള്‍പ്പെടുന്നില്ല. അതുകൊണ്ടുതന്നെ 50 ശതമാനമെന്ന അപായഭീഷണി ഞങ്ങള്‍ക്ക്, അതായത് ഈ പ്രത്യാഘാതങ്ങള്‍ക്കൊപ്പം ജീവിക്കേണ്ടവര്‍ക്ക്, സ്വീകാര്യമല്ലതന്നെ.

1.5 ഡിഗ്രി സെല്‍ഷ്യസെന്ന ആഗോളതാപന വര്‍ധനനിരക്കില്‍ ജീവിക്കാന്‍ 67 ശതമാനമെങ്കിലും സാധ്യതയുണ്ടാകണമെങ്കില്‍, അന്തരീക്ഷത്തിലേക്ക് പുറന്തള്ളുന്ന കാര്‍ബണിന്റ അളവില്‍ 2018 ജനുവരി ഒന്നോടെ 420 ഗിഗാടണ്ണിന്റെ കുറവുവരുത്തണമെന്നാണ് ഇന്റര്‍ ഗവണ്‍മെന്റല്‍ പാനല്‍ ഓണ്‍ ക്ലൈമറ്റ് ചെയ്ഞ്ച് നിര്‍ദേശിച്ചിരുന്നത്. ഇന്നത് 350 ഗിഗാടണ്ണില്‍ താഴെയാണ്.

greta thunberg's stare

ചില സാങ്കേതികപരിഹാരങ്ങളിലൂടെ ഈ പ്രശ്‌നം പരിഹരിക്കപ്പെടുമെന്ന് നടിക്കാന്‍ നിങ്ങള്‍ക്കെങ്ങനെയാണ് ധൈര്യംവരുന്നത്? കാര്‍ബണ്‍ ബഹിര്‍ഗമനനിരക്ക് ഇന്നത്തെ തോതില്‍ തുടരുകയാണെങ്കില്‍, നമ്മുടെ കാര്‍ബണ്‍ ഡയോക്‌സൈഡ് ബഹിര്‍ഗമന നിയന്ത്രണബജറ്റിലെ ശേഷിക്കുന്ന തുക എട്ടരവര്‍ഷത്തിനുള്ളില്‍ പൂര്‍ണമായി ചെലവഴിച്ചുതീരും. ഈ കണക്കിനൊപ്പം പോകുന്ന ഒരു പരിഹാരമോ പദ്ധതിയോ ഇതുവരെയുണ്ടായിട്ടില്ല. കാരണം, അത്രമേല്‍ ഭീകരമാണ് ഈ കണക്കുകള്‍. അത് സമ്മതിച്ചുതരാന്‍ മാത്രം പക്വത നിങ്ങള്‍ക്ക് വന്നിട്ടുമില്ല. നിങ്ങള്‍ ഞങ്ങളെ തോല്പിക്കുകയാണ്. പക്ഷേ ഇന്നത്തെ യുവതലമുറ നിങ്ങളുടെ വഞ്ചന മനസ്സിലാക്കാന്‍ തുടങ്ങിയിരിക്കുന്നു. ഭാവിതലമുറയുടെ കണ്ണുകള്‍ മുഴുവന്‍ നിങ്ങളിലാണ്. ഞങ്ങളെ തോല്പിക്കുവാനാണ് നിങ്ങള്‍ തീരുമാനിക്കുന്നതെങ്കില്‍, ഞാന്‍ പറയുന്നു, ഞങ്ങള്‍ നിങ്ങളോട് ഒരിക്കലും പൊറുക്കില്ല.

greta
പുസ്തകം വാങ്ങാം

ഇതില്‍നിന്ന് മാറിനടക്കാന്‍ ഞങ്ങള്‍ നിങ്ങളെ അനുവദിക്കില്ല. ഇപ്പോള്‍, ഇവിടെവെച്ച്, ഈ നിമിഷം ഞങ്ങളൊരു നിയന്ത്രണരേഖ വരയ്ക്കുന്നു. ലോകം ഉണരുകയാണ്. മാറ്റം ഇവിടെ തുടങ്ങുന്നു. നിങ്ങള്‍ക്കിഷ്ടപ്പെട്ടാലും ഇല്ലെങ്കിലും. നന്ദി.

മാതൃഭൂമി ബുക്‌സ് പ്രസിദ്ധീകരിച്ച  പി.എസ്. രാകേഷിന്റെ ഗ്രേറ്റ ട്യൂന്‍ബെര്‍ഗ്: ഭൂമിക്കുവേണ്ടി ഒരു സ്‌കൂള്‍കുട്ടിയുടെ പോരാട്ടം എന്ന പുസ്തകത്തില്‍ നിന്നും.

ഗ്രേറ്റ ട്യൂന്‍ബെര്‍ഗ്, ഭൂമിക്കുവേണ്ടി ഒരു സ്‌കൂള്‍ കുട്ടിയുടെ പോരാട്ടം ഓണ്‍ലൈനില്‍ വാങ്ങാം

Contnet Highlights: Greta Thunberg's speech to world leaders at UN Climate Action Summit