ഭാഗം 8
   
''Nothing more can be said, and no more has ever been said: to become worthy of what happens to us, and thus to will and release the event, to become an offspring of one's own events...'(Gills Deleuze, The Logic of Sense trans. Mark Lester and Charles Stivale, 1990,Continuum, London 2005)p.170.
'Either ethics makes no sense at all', 'or this is what it means and has nothing else to say: not to be unworthy of what happens to us' ( The Logic of Sense)169.

നവ-കര്‍തൃനിര്‍മ്മിതി

സംഭവങ്ങള്‍ക്ക് അര്‍ഹതയുള്ളവരായിത്തീരുക (സംഭവങ്ങള്‍ക്ക് സമസ്‌ക്കന്ധരാവുക), സംഭവത്തെ ഇഛിക്കുക, പ്രമുക്തമാക്കുക, സ്വന്തം സംഭവങ്ങളുടെ സന്തതിയാവുക: ഇതാണ് നൈതികതയുടെ പരമമായ അര്‍ത്ഥം, അന്തസ്സാരം, എന്ന് തന്റെ സംഭവ വിചിന്തനത്തിനിടയില്‍ ദെല്യൂസ് പലവട്ടം നമ്മെ  ഉണര്‍ത്തുന്നു. സംഭവങ്ങള്‍ നമ്മോടാവശ്യപ്പെടുന്ന നൈതികവും രാഷ്ട്രീയവുമായ പ്രയോഗങ്ങളെ, കര്‍ത്തൃപരമായ രൂപാന്തരീകരണങ്ങളെയാണ് ഈ പ്രസ്താവം സൂചിപ്പിക്കുന്നത്. സംഭവങ്ങളോടുള്ള വിശ്വസ്തതയില്‍ നിന്നാണ്  (വിപ്ലവ) കര്‍തൃത്വം ഉല്പന്നമാകുന്നതെന്ന് ബാദ്യൂ. പ്രകൃതിയുടെയും സംസ്‌കൃതിയുടെയും മനുഷ്യ പ്രവര്‍ത്തനത്തിന്റെയും വരദാനമായി ലഭിക്കുന്ന വിപ്ലവകരമായ സംഭവങ്ങളോട് കണ്ണിചേര്‍ന്നു കൊണ്ട് അവയുടെ അനന്തരാവകാശികളായി മാറിക്കൊണ്ട് സംഭവത്തിന്റെ പ്രതിജ്ഞാപകരും പ്രയോക്താക്കളും സംവര്‍ദ്ധകരുമായിത്തീരുക എന്നാണ് സംഭവത്തിന്റെ തത്വചിന്തകര്‍ നമ്മെ പ്രബുദ്ധരാക്കുന്നത്. 

2020 നവംബര്‍ 26 ന് പഞ്ചാബിലെയും ഹരിയാനയിലെയും കര്‍ഷകര്‍ തുടക്കം കുറിച്ച മഹാ പ്രക്ഷോഭ സംഭവം ലോക ചരിത്രത്തില്‍ തന്നെ അപൂര്‍വ്വമായ ഒരു ജനാധിപത്യ വിപ്ലവത്തിന് തീ കൊളുത്തുകയാണ് ചെയ്തത് എന്ന് നാം കണ്ടു. മൂന്ന് കര്‍ഷക നിയമങ്ങള്‍ പിന്‍വലിക്കുവാനുള്ള സമരം എന്നതിലുപരി, ഇന്ത്യന്‍ ജനാധിപത്യത്തിന്റെ, റിപ്പബ്ലിക്കിന്റെ തന്നെ വീണ്ടെടുപ്പിനായുള്ള ഒരു ജനകീയ പ്രസ്ഥാനമായി കര്‍ഷക സമരം മാറി എന്നതാണ് സംഭവം. വെറും ഒരു ചെറുത്ത് നില്പ്, ഒരു പ്രതിഷേധ സമരം, എന്നതിനുപരി, ഒരു നവ ജനതയെ, നവ റിപ്പബ്ലിക്കിനെ, കണ്ടെത്തുന്ന  സംസ്ഥാപനപരമായ (constitutive) ഒരു ജനാധിപത്യ ആവിഷ്‌ക്കാരമായി കര്‍ഷക പ്രക്ഷോഭം എന്നതാണ് സംഭവം. ഈ സംഭവത്തില്‍ നിന്ന് ഒരു പുതിയ കര്‍തൃത്വം ഉല്പന്നമാകുന്നതും നാം കണ്ടു. സ്ഥാപിത (constituted)പൗരത്വത്തില്‍ നിന്ന് സ്ഥാപക (constituent) പൗരത്വത്തിലേക്ക് രൂപാന്തരീകരണം പ്രാപിച്ച, അടി മുടി ഇളയവല്‍ക്കരിക്കപ്പെട്ട (minorised), നവ ജനാധിപത്യ കര്‍തൃത്വം. ഈ കര്‍തൃ-രൂപാന്തരീകരണം, നവ പൗര നിര്‍മ്മിതി, കര്‍ഷകരില്‍ മാത്രമായി ഒതുങ്ങി നില്‍ക്കുന്നില്ല. കര്‍ഷക സമര സംഭവത്തോട് താദാത്മ്യം പ്രാപിക്കുന്ന, ഐക്യപ്പെടുന്ന, എല്ലാം ഇന്ത്യക്കാരും ഈ നവ കര്‍തൃവല്‍ക്കരണ പ്രക്രിയയിലൂടെ കടന്ന് പോകുന്നുണ്ട്.

ജനാധിപത്യത്തിന്റെ തീക്ഷ്ണാവിഷ്‌ക്കാരങ്ങള്‍

കര്‍ഷക സമര സംഭവം തിരി കൊളുത്തിയ ജനാധിപത്യവിപ്ലവത്തെ ഒരു സമ്പൂര്‍ണ്ണ ജനാധിപത്യത്തിന്റെ നിര്‍മ്മിതിയിലേക്ക് നയിക്കുക എന്നതാണ് പുതു കര്‍തൃത്വങ്ങളുടെ വെല്ലുവിളി. ജനാധിപത്യം എന്നത് ഒരു തിരഞ്ഞെടുക്കല്‍ പ്രക്രിയ മാത്രമല്ലെന്നും ഭരണകൂടത്തെ,  ഉല്പാദിപ്പിക്കല്‍ മാത്രമല്ലെന്നും,  വെറും ഒരു പ്രതിനിധാനപ്രക്രിയ മാത്രമല്ലെന്നും  ഒരു പുതിയ ജനതയെ, വരും റിപ്പബ്ലിക്കിനെ,  പുതിയ ഭൂമിയെ,  പുതിയ ലോകത്തെ, നിര്‍മ്മിക്കലാണെന്നും ഭൂരിപക്ഷ ഭരണത്തെ ഇളയവല്‍ക്കരിക്കലാണെന്നും ഉള്ള രാഷ്ട്രീയപരമായ തിരിച്ചറിവാണ് കര്‍ഷക സമര സംഭവം നമുക്ക് പകര്‍ന്ന് തരുന്നത്. 

സര്‍വ്വ മനുഷ്യരോടും, സര്‍വ്വചരാചരങ്ങളോടും, സര്‍വ്വ ഭൂതങ്ങളോടും ഐക്യപ്പെടുന്ന, ആയിത്തീരലിന്റെ (becoming), രൂപാന്തരീകരണത്തിന്റെ (metamorphosis), നിതാന്തമായ ചര്യയിലേക്കാണ്  സമ്പൂര്‍ണ്ണ ജനാധിപത്യം എന്ന ആശയം നമ്മെ വിളിക്കുന്നത്. അതായത് അമാനവികവും അതിമാനവവും അനന്തവുമായ ഒരു ജനാധിപത്യ സങ്കല്പത്തിലേക്ക്, പ്രയോഗത്തിലേക്ക്.കര്‍ഷക സമര സംഭവം തൊടുത്തു വിട്ട ജനാധിപത്യ വിപ്ലവം, പ്രധാനമായും ജനാധിപത്യത്തിന്റെ മൂന്ന് ആവിഷ്‌ക്കാരങ്ങളാണ് അടിയന്തിരമായും നിര്‍ദ്ദേശിക്കുന്നത്:
1.ജനഹിതത്തിനു വഴങ്ങാത്ത ഭരണകൂടത്തിനുമേല്‍ സമ്മര്‍ദ്ദം ചെലുത്തുക, ഭരണകൂടത്തെ  ഉപരോധിക്കുക, തിരിച്ചു വിളിക്കുക,  ദുര്‍ഭരണകൂടത്തിലര്‍പ്പിതമായ ജനസമ്മതി  ആത്യന്തികമായും പിന്‍വലിക്കുക.

2.ജനങ്ങളുടെ ജീവിതാവസ്ഥയേയും, ആവാസവ്യവസ്ഥയേയും പ്രകൃതിയേയും കൊള്ള ചെയ്തു മുടിക്കുന്ന കോര്‍പ്പറേറ്റുകള്‍ക്കെതിരേ, ആഗോള സാമ്രാജ്യത്വ വാഴ്ചയ്‌ക്കെതിരേ, സന്ധിയില്ലാ സമരത്തിനു തുടക്കം കുറിയ്ക്കുക.

3.ഭരണകൂടത്തിനുള്ളില്‍, വെളിയില്‍ പുതിയ കൂട്ടായ്മകളെ/പൊതുമകളെ ഉല്പാദിപ്പിക്കുക. പൊതുമയുടെ (common) തത്വത്തിന്റെ, സ്വപ്നത്തിന്റെ, ചര്യയുടെ നൈതിക/രാഷ്ട്രീയ പരീക്ഷണ രൂപങ്ങളെയാണ് ലംഗര്‍ എന്ന പദം, സങ്കല്പം, പ്രയോഗം പ്രതിനിധാനം ചെയ്യുന്നത്. (അത് സമൂഹ ഭോജനത്തില്‍ ഒതുങ്ങുന്നില്ല). 
തിരഞ്ഞെടുപ്പ് മേളകള്‍ ശേഷം, കുംഭമേളകള്‍ക്ക് ശേഷം, അധികാരത്തിന്റെ മമാമകങ്ങള്‍ക്കു ശേഷം, കൊറോണാ മഹാമാരിയുടെ രണ്ടാമൂഴമായി. പ്രാണവായുവിനായി പിടയുകയാണ് ഇന്ത്യയിലെ ജനങ്ങള്‍ ഇന്ന്.  കിതപ്പ്, ശ്വാസം മുട്ടല്‍, പിടയല്‍, ഹൈപ്പോക്ക്‌സിയ, അസ്ഫോക്‌സിയ: കൊറോണയുടെ രണ്ടാം തരംഗത്തില്‍ ഇന്ത്യന്‍ ജീവിതം നിര്‍വ്വചിക്കപ്പെടുന്നതിങ്ങനെയാണ്. ദെല്‍ഹിയില്‍ ശ്മശാനങ്ങളില്‍ ചിതയണയാതെ കത്തിക്കൊണ്ടിരിക്കുമ്പോഴും, ഐ.പി.എല്‍. മേള,  കോടികള്‍ ചിലവഴിച്ച് കൊണ്ടുള്ള സെന്‍ട്രല്‍ വിസ്റ്റ പ്രോജെക്റ്റിന്റെ നിര്‍മ്മാണ പരിപാടികള്‍, എല്ലാം പൊടിപൊടിക്കുകയായിരുന്നു.

ദുരന്ത ഭരണകൂടം (catastrophic State)

പുതിയ കൊറോണാ വൈറസ്സിനെ പോലെ ജനിതകവ്യതിയാനം വന്ന ഭരണകൂടത്തെയാണ് നമുക്കിന്ന് നേരിടുവാനുള്ളത്. കോവിഡ് മഹാവ്യാധിയുമായി സംരചനയില്‍, കൂട്ടുകച്ചവടത്തില്‍, ഏര്‍പ്പെട്ട ഭരണകൂടം ''ദുരന്ത മുതലാളിത്ത''ത്തെ (Disaster Capitalism-Naomi Klein)പ്പോലെ 'ദുരന്ത' ഭരണകൂടമായി (Disaster State) സ്വയം രൂപാന്തരീകരിക്കപ്പെട്ടിരിക്കുന്നു. മനുഷ്യ ദുരന്തത്തെ, പ്രതിസന്ധിയെ, ബയോ-ഭീകരതയെ, രക്തവും ലാഭവും അധികാരവും വലിച്ചെടുത്ത് കൊഴുക്കുവാനുള്ള, വിപണിയില്‍ വിലപേശുവാനുള്ള സുവര്‍ണ്ണാവസരമാക്കുന്ന ദുരന്ത മുതലാളിത്തത്തെ പോലെ, മോദിയുടെ ''ദുരന്ത'' ഭരണകൂടം  മരണത്തെ, ദുരന്തത്തെ, ഉല്പാദിപ്പിക്കുന്ന, വിപണനം ചെയ്യുന്ന മറ്റൊരു മഹാവ്യാധിയായി, മരണകൂടമായി, ദുരന്തകൂടമായി മാറിയിരിക്കുന്നു. ഓക്‌സിജനും, വാക്‌സിനും, ഐ.സി.യു.വും, വെന്റിലേറ്ററും, ജീവരക്ഷാ മരുന്നും ഒക്കെ വിലപേശി വില്‍ക്കുന്ന മരണവ്യവസായി, മരണ വ്യാപാരി. ജനാധിപത്യമാണ്  ആത്യന്തികമായും, അടിയന്തിരമായും ജനങ്ങളുടെ പ്രാണ രക്തം, ഓക്‌സിജന്‍, വാക്‌സിന്‍, എന്ന് ചരിത്രം നിലവിളിക്കുന്നു. അത് കൊണ്ട് കര്‍ഷക സമര സംഭവം നിര്‍ദ്ദേശിക്കുന്ന പോലെ മോദി ഭരണകൂടത്തെ മടക്കി വിളിയ്ക്കുന്ന ഒരു പ്ലിബസൈറ്റ്, റിഫറണ്ടം, പ്രക്ഷോഭം, പ്രാണവായു പോലെ അടിയന്തിരമായിരിക്കുന്നു.

രണ്ടാമതായി, ദേശീയവും സൂക്ഷ്മദേശീയവുമായ ആവാസവ്യവസ്ഥയെ, നദികളെ, സമുദ്രങ്ങളെ, കുന്നുകളെ, പര്‍വ്വതങ്ങളെ, ആകാശത്തെയും ഭൂമിയേയും, മണ്ണിനെയും വെള്ളത്തെയും വായുമണ്ഡലത്തെയും ലോഹശിലാധാതു സഞ്ചയങ്ങളെയും താരാപഥങ്ങളെയും അണ്ഢരാശികളെയും ആഗോള കോര്‍പ്പറേറ്റ് സാമ്രാജ്യത്വത്തിന്റെ അധിനിവേശത്തില്‍ നിന്ന് മോചിപ്പിക്കുവാനായുന്ന പാരിസ്ഥിതികരാഷ്ട്രീയ സമരത്തെ കര്‍ഷക സമരവുമായി ബന്ധിപ്പിക്കുക.

മഹാവ്യാധിയുടെ നിമിഷങ്ങളില്‍ അടിയന്തിര പ്രാധാന്യം ആര്‍ജ്ജിക്കുന്ന മറ്റൊരു നിര്‍ദ്ദേശം ഇതാണ്: ഭരണകൂടത്തിനുള്ളിലും വെളിയിലും പൊതുമയുടെ നിര്‍മ്മിതി. കര്‍ഷക സമര സംഭവം മുന്നോട്ട് വയ്ക്കുന്ന ലംഗര്‍ എന്ന ആശയത്തിന്റെ, പ്രയോഗത്തിന്റെ, വിപുലീകരണം.  യു.പിയിലും ദില്ലിയിലും മറ്റും ഹോസ്പിറ്റലുകള്‍ പുറന്തള്ളിയ നിസ്സഹായരായ രോഗികള്‍ക്കായി ഗുരുദ്വാരകള്‍ തുറന്നിട്ട ഓക്‌സിജന്‍ ലംഗര്‍ പോലെ. ജനകീയ അടിസ്ഥാനത്തില്‍, അനൗദ്യോഗിക തലത്തില്‍, പ്രവര്‍ത്തിക്കുന്ന ആക്റ്റിവിസ്റ്റുകളും മനുഷ്യസ്‌നേഹികളുമായ എല്ലാ ഇന്ത്യക്കാരും പങ്കാളികളാകുന്ന വാക്‌സിന്‍ ലംഗര്‍, വെന്റിലേറ്റര്‍ ലംഗര്‍, ഹോസ്പിറ്റല്‍ ലംഗര്‍ ജീവന്‍ രക്ഷാ ലംഗര്‍... കര്‍ഷക സമരത്തിന്റെ സംസ്ഥാപനപരവും സൃഷ്ട്യാത്മകവുമായ ജനാധിപത്യ രാഷ്ട്രീയം മഹാമാരിയുടെ  രുഗ്ണ സന്ദര്‍ഭത്തില്‍ നവകര്‍തൃത്വങ്ങളോടാവശ്യപ്പെടുന്നതിതാണ്: മരണത്തെയും, യുദ്ധത്തെയും, ഭീകരതയേയും ഉല്പാദിക്കുന്ന ''ദുരന്ത ഭ/മരണകൂടത്തിന്, ദുരന്തമുതലാളിത്തത്തിന് ('ദുരന്ത'കമ്യൂണിസത്തിനും)  ബദലായി ജനകീയമായ, പൊതുമയിലധിഷ്ഠിതമായ സേവന കേന്ദ്രങ്ങള്‍, സേവാവിഹാരങ്ങള്‍, ജീവ ശക്തിയുടെ, സ്‌നേഹത്തിന്റെ, കരുണയുടെ, ലംഗറുകള്‍ നാട്ടിലെങ്ങും ഉയര്‍ത്തിക്കൊണ്ടു വരിക. ഭരണകൂടസ്വരൂപത്തെ പൊതുമയുടെ ആവിഷ്‌ക്കാരമായ ലംഗര്‍ സങ്കല്പത്തിലേക്ക് പരിഭാഷചെയ്യുക. 

നവ ജനാധിപത്യകര്‍തൃത്വത്തിന്റെ ആത്യന്തികമായ പരിഗണന കര്‍ഷക സമരം, സംഭവം, തുടക്കം കുറിച്ച ജനാധിപത്യവിപ്ലവത്തെ അമാനവികവും അതിമാനവികവും ആയ ദിശകളിലേക്ക്, പരമവും അനന്തവുമായ ജനാധിപത്യ സങ്കല്പത്തിലേക്ക് ചര്യയിലേക്ക് പെരുപ്പിക്കുക എന്നതാവും. അതിനര്‍ത്ഥം സര്‍വ്വ ജീവരാശികളുടെയും, ചരാചരങ്ങളുടെയും, സര്‍വ്വ ഭൂതങ്ങളുടെയും ഹിതത്തിനു്, നിലനില്പിന് പ്രാധാന്യം കൊടുക്കുന്ന,  സര്‍വ്വ ആത്മങ്ങളെയും അപരങ്ങളെയും പുല്‍കുന്ന, സര്‍വ്വജന്തുക്കളിലേക്കും, പ്രാണികളിലേക്കും, സസ്യവൃക്ഷ തൃണ പര്‍വ്വതജലരാശികളിലേക്കും, പഞ്ചഭൂതങ്ങളിലാകെയും പടരുന്ന നൈതികവും പാരിസ്ഥിതികവും ആയ, മാനവവും അമാനവവും അതിമാനവവുമായ ഒരു കൂട്ടായ്മയുടെ സര്‍വ്വജീവരാഷ്ട്രീയത്തിലേക്ക് ജനാധിപത്യരാഷ്ട്രീയ സങ്കല്പത്തെ, പ്രയോഗത്തെ, വിസ്തൃതമാക്കുക എന്നത്രേ.

Content Highlights: Column Strike and Events by K Vinod Chandran part eight