കെ.യു.ആര്‍.ടി.സി.യുടെ കീഴിലുള്ള ലോ ഫ്‌ളോര്‍ ബസുകള്‍ ദീര്‍ഘദൂര സര്‍വീസുകളാക്കുന്നു. മാസങ്ങളായി ഓടാതെകിടക്കുന്ന ബസുകള്‍ അറ്റകുറ്റപ്പണി നടത്തി സര്‍വീസിന് സജ്ജമാക്കിയിട്ടുണ്ട്. 190 എ.സി., 529 നോണ്‍ എ.സി. ലോ ഫ്‌ളോര്‍ ബസുകളാണ് കോര്‍പ്പറേഷന് കീഴിലുള്ളത്. ഇതില്‍ എ.സി.ബസുകളെ പുതുതായി തുടങ്ങുന്ന ബൈപ്പാസ് റൈഡറുകളാക്കാനും ആലോചനയുണ്ട്.
നഗരത്തിലെ ഗതാഗതക്കുരുക്കില്‍പ്പെട്ട് യാത്രക്കാര്‍ക്ക് സമയനഷ്ടമുണ്ടാകുന്നത് ഒഴിവാക്കാനാണ് തിരുവനന്തപുരം-എറണാകുളം റൂട്ടില്‍ ബൈപ്പാസ് റൈഡറുകള്‍ തുടങ്ങുന്നത്. തിരുവനന്തപുരത്തുനിന്ന് രാവിലെ അഞ്ചരയ്ക്ക് പുറപ്പെട്ട് ഒമ്പതരയോടെ എറണാകുളത്ത് എത്തുംവിധമാണ് സര്‍വീസുകള്‍ ക്രമീകരിച്ചിട്ടുള്ളത്. വൈകീട്ട് ആറുമണിയോടെയാകും മടക്കയാത്ര. കോഴിക്കോട്-തിരുവനന്തപുരം റൂട്ടിലും കൂടുതല്‍ എ.സി.ലോ ഫ്‌ളോര്‍ ബസുകള്‍ ഓടിക്കും.
വിമാനസര്‍വീസുകളുടെ എണ്ണം കൂട്ടുന്നതോടെ വിമാനത്താവളങ്ങളെയും പ്രധാന നഗരങ്ങളും ബന്ധിപ്പിച്ചും കൂടുതല്‍ സര്‍വീസുകള്‍ തുടങ്ങും. ഇപ്പോള്‍ തലശ്ശേരി-കണ്ണൂര്‍ റൂട്ടില്‍ ഇത്തരത്തില്‍ സര്‍വീസ് നടത്തുന്നുണ്ട്. യാത്രക്കാര്‍ക്ക് ലഗേജ് കൊണ്ടുപോകാന്‍ കൂടുതല്‍ സൗകര്യം ലഭിക്കുന്നതിനാല്‍ ലോ ഫ്‌ളോറിന് സ്വീകാര്യത കൂടുതലാണ്.
നെടുമ്പാശ്ശേരി-എറണാകുളം, നെടുമ്പാശ്ശേരി-തൃശ്ശൂര്‍ റൂട്ടുകളില്‍ സര്‍വീസുകള്‍ പരിഗണനയിലുണ്ടെന്ന് കെ.എസ്.ആര്‍.ടി.സി. മാനേജിങ് ഡയറക്ടര്‍ ബിജു പ്രഭാകര്‍ അറിയിച്ചു. ഡ്രൈവര്‍മാര്‍ കുറവുള്ള ഡിപ്പോകളിലേക്ക് കൂടുതല്‍പ്പേരെ സ്ഥലംമാറ്റംവഴി പുനര്‍വിന്യസിക്കും. ഇതുവഴി കൂടുതല്‍ ബസുകള്‍ ഓടിക്കാനാകും. തലസ്ഥാനത്തെ ഡിപ്പോകളിലേക്ക് 128 പേരെയാണ് മാറ്റി നിയമിക്കുന്നത്.
കോവിഡ് നിയന്ത്രണങ്ങള്‍ അവസാനിച്ചതോടെ കെ.എസ്.ആര്‍.ടി.സി.ബസുകള്‍ സര്‍വീസ് തുടങ്ങിയിട്ടും ലോ ഫ്‌ളോര്‍ ബസുകളില്‍ പലതും ഓടിയിരുന്നില്ല. ഡിപ്പോകളില്‍ മാസങ്ങളോളം ഓടാതെകിടന്നതിനാല്‍ മിക്ക ബസുകള്‍ക്കും അറ്റകുറ്റപ്പണിവേണ്ട സ്ഥിതിയായിരുന്നു.
ഡീസല്‍ച്ചെലവ് കൂടുതലായതും ബസുകള്‍ ഓടിക്കാതിരിക്കാന്‍ കാരണമായി. ദീര്‍ഘദൂര സര്‍വീസിലൂടെ ഇന്ധനച്ചെലവ് കുറയ്ക്കാനാകുമെന്നാണ് കോര്‍പ്പറേഷന്റെ പ്രതീക്ഷ. സ്റ്റോപ്പുകള്‍ കുറയുന്നതിലൂടെ ഇന്ധനച്ചെലവില്‍ ലാഭമുണ്ടാകുമെന്നാണ് കണക്കാക്കുന്നത്.
ലോ ഫ്‌ളോറിലെ നിരക്ക് കൂടുതലായതിനാല്‍ യാത്രക്കാര്‍ ബസുകളില്‍ കയറാതിരുന്നതും കോര്‍പ്പറേഷന് നഷ്ടമുണ്ടാക്കി. ഇതോടെ വല്ലപ്പോഴും മാത്രം ലോ ഫ്‌ളോര്‍ ബസുകള്‍ ഓടിക്കുന്ന സ്ഥിതിയായിരുന്നു. യാത്രക്കാരെ കൂടുതലായി ബസുകളിലേക്ക് ആകര്‍ഷിക്കാന്‍ ആഴ്ചയില്‍ മൂന്നുദിവസം നിരക്കില്‍ ഇളവ് നല്‍കുന്നുണ്ട്.
Content Highlights: KURTC Low Floor Bus Starts Long Route Services
