കോവിഡ് രോഗവ്യാപനമിട്ട ബ്രേക്ക്, മറികടന്ന് കുതിക്കുകയാണ് വാഹനവിപണി. ആവശ്യക്കാരും ഉപഭോക്താക്കളും കൂടിയിട്ടേയുള്ളൂ. കുറച്ചുകാലം വേഗം ഇത്തിരി കുറവായിരുന്നെങ്കില്‍ ഇപ്പോള്‍ നോര്‍മല്‍ സ്പീഡിലാണ് വാഹനവിപണി.
ഷോറൂമുകളുടെ പ്രവര്‍ത്തനം അടിമുടി മാറി. ഷോറൂമിലേക്കു പോകാതെ, സെയില്‍സ്‌ റെപ്രസന്ററ്റീവിനെപോലും കാണാതെ വാഹനം വാങ്ങാം. ഒരു കടലാസില്‍പ്പോലും ഒപ്പിടേണ്ട. എല്ലാം ഡിജിറ്റല്‍.
ഇഷ്ടവാഹനം തിരഞ്ഞെടുക്കുന്നതു മുതല്‍ പണമിടപാടുവരെ വീട്ടിലിരുന്ന്. ഡെലിവറിയും വീട്ടില്‍ത്തന്നെ. ഇനി വാഹനമെടുക്കാന്‍ വായ്പ വേണോ, പുറത്തിറങ്ങാതെ അതും റെഡിയാകും. 'അദൃശ്യനായ' ഇടപാടുകാരന് വായ്പ നല്‍കാന്‍ പുതുതലമുറ ബാങ്കുകള്‍ സജ്ജം.
മുമ്പ് സാമ്പത്തികമാന്ദ്യത്തിന്റെ പിടിമുറുക്കത്തില്‍ വാഹനവില്‍പ്പന ഇടിഞ്ഞിരുന്നു. കൊറോണയുടെ തുടക്കത്തില്‍ വാഹനങ്ങളുടെ വില്‍പ്പന ഇനി ഉണ്ടാവില്ലെന്നു കരുതിയിരുന്നിടത്താണ് ഇപ്പോള്‍ ശുഭകരമായ മാറ്റം. പൊതുഗതാഗതം വഴി കൊറോണ പകരുമോയെന്ന് ഭയന്നാണ് പലരും ചെറുതെങ്കിലും വാഹനം സ്വന്തമാക്കാന്‍ ആഗ്രഹിക്കുന്നത്.
ഉയര്‍ന്ന വിലയില്ലാത്ത കാറുകളും ഇരുചക്രവാഹനങ്ങളുമാണ് ആളുകള്‍ സ്വന്തമാക്കുന്നത്. കാര്‍ വാങ്ങിയാല്‍ കുടുംബാംഗങ്ങള്‍ക്കു സുരക്ഷിതമായി സഞ്ചരിക്കാമെന്ന ചിന്താഗതിയാണ് പൊതുവേയുള്ളതെന്ന് വില്‍പ്പനക്കാര്‍ പറയുന്നു.
വാഹനപ്രിയരേ ഇതിലേ..
• എടുക്കാനാഗ്രഹിക്കുന്ന വാഹനം ഏതെന്ന് ആദ്യമേ മുന്‍കൂട്ടി ഉറപ്പിക്കുക
• ടെസ്റ്റ് ഡ്രൈവ് പരമാവധി ഒഴിവാക്കുക. പകരം വാഹനവിദഗ്ധരുടെ ഉപദേശം തേടുകയോ റിവ്യൂ കണക്കിലെടുക്കുകയോ ചെയ്യാം
• ഷോറൂമില്‍ പോകാെത പണമിടപാട് നടത്താന്‍ ശ്രമിക്കുക. ഷോറൂമുകളുടെ സൈറ്റുകളിലൂടെയോ നെറ്റ് ബാങ്കിങ് മുഖേനയോ പണമയയ്ക്കാം
• ഡെലിവറിയും വീട്ടില്‍വച്ചാക്കാം
വേഗം വണ്ടിവിടാം
• ഷോറൂമിലെത്തുന്ന ഉപഭോക്താക്കളെ അധികനേരം ഇരുത്തരുത്. നടപടികള്‍ വേഗം പൂര്‍ത്തിയാക്കി മടക്കി അയയ്ക്കണം
• ഉപഭോക്താക്കള്‍ക്ക് ചായയും മറ്റും നല്‍കുന്നത് ഒഴിവാക്കാം
• ടെസ്റ്റ് ഡ്രൈവ് പ്രോത്സാഹിപ്പിക്കാതിരിക്കുക
• വാഹന ഡെലിവറി രണ്ടോ മൂേന്നാപേര്‍ മാത്രം പങ്കെടുക്കുന്ന ചെറിയ പരിപാടിയാക്കണം
Content Highlights: Kerala's Vehicle Market Back To Normal During Corona Pandemic
