ടാറ്റ എച്ച്.ബി.എക്‌സ് | ഫോട്ടോ: മാതൃഭൂമി
ഇന്ത്യന്‍ നിരത്തുകള്‍ക്കായി ടാറ്റ മോട്ടോഴ്‌സ് ഉറപ്പുനല്‍കിയിട്ടുള്ള മിനി എസ്.യു.വിയുടെ വരവടുത്തെന്ന് സൂചന നല്‍കി ആദ്യ ടീസര്‍ വീഡിയോ നിര്‍മാതാക്കള്‍ പുറത്തുവിട്ടു. വാഹനത്തിന്റെ ഏതാനും ഡിസൈനുകളും പേരും വെളിപ്പെടുത്തുന്നതാണ് ഈ വാഹനത്തിന്റെ ആദ്യ ടീസര്‍. നിര്‍മാണത്തിന് ഉപയോഗിച്ച കോഡ്‌ നാമമായ എച്ച്.ബി.എക്‌സ്. എന്ന് തന്നെയാണ് ഈ വാഹനത്തിന് ടീസറില്‍ നല്‍കിയിട്ടുള്ള പേര്. അടുത്ത മാസം ഈ വാഹനമെത്തുമെന്നാണ് സൂചന.
2020-ലെ ഡല്‍ഹി ഓട്ടോ എക്‌സ്‌പോയിലാണ് എച്ച്.ബി.എക്‌സിന്റെ കണ്‍സെപ്റ്റ് മോഡല്‍ പ്രദര്‍ശനത്തിനെത്തിയത്. 2020-ല്‍ തന്നെ ഈ മിനി-എസ്.യു.വിയുടെ പ്രൊഡക്ഷന്‍ പതിപ്പ് വിപണിയില്‍ എത്തുമെന്നായിരുന്നു പ്രതീക്ഷിച്ചിരുന്നത്. എന്നാല്‍, കോവിഡ് മഹാമാരിയുടെ പശ്ചാത്തലത്തില്‍ ഇത് നീണ്ടുപോകുകയായിരുന്നു. ഏറ്റവും പുതിയ വിവരങ്ങള്‍ അനുസരിച്ച് ഉത്സവ സീസണിന്റെ ഭാഗമായി ടാറ്റ മോട്ടോഴ്‌സ് ഈ വാഹനം അവതരിപ്പിച്ചേക്കുമെന്നാണ് പ്രതീക്ഷിക്കുന്നത്.
'ഇത് പ്രദര്‍ശനത്തിന്റെ സമയം, കാത്തിരുന്ന എസ്.യു.വിക്ക് പേരിട്ടിരിക്കുന്നു, വീണ്ടും കാത്തിരിക്കുക', എന്ന തലക്കെട്ടോടെയാണ് ഈ വാഹനത്തിന്റെ ടീസര്‍ വീഡിയോ പുറത്തുവിട്ടിരിക്കുന്നത്. വാഹനത്തിന്റെ ഹെഡ്‌ലൈറ്റ്, ഡി.ആര്‍.എല്‍, ഫോഗ്‌ലാംപ് എന്നിവയുടെ ഡിസൈനുകള്‍ ഭാഗികമായി വെളിപ്പെടുത്തുന്നതാണ് ടീസര്‍ വീഡിയോ. ഈ വാഹനത്തിന്റെ പരീക്ഷണയോട്ട ദൃശ്യങ്ങള്‍ മുമ്പ് പലതവണ സമൂഹമാധ്യമങ്ങളില്‍ പ്രചരിച്ചിരുന്നു.
പുറത്തുവന്ന ചിത്രങ്ങളുടെ അടിസ്ഥാനത്തില്‍ ടാറ്റയുടെ മറ്റ് എസ്.യു.വി. മോഡലുകളായ ഹാരിയര്‍, നെക്‌സോണ്‍ വാഹനങ്ങളുമായി ഡിസൈന്‍ ശൈലി പങ്കിട്ടാണ് ഈ കുഞ്ഞന്‍ എസ്.യു.വിയും എത്തിയിരിക്കുന്നത്. ഹാരിയറില്‍ നല്‍കിയിട്ടുള്ളതിന് സമാനമായ ഡി.ആര്‍.എല്‍, ബമ്പറില്‍ നല്‍കിയിട്ടുള്ള ഹെഡ്‌ലാംപ് എന്നിവ HBX-ലും നല്‍കുന്നുണ്ട്. ബംപര്‍ നെക്‌സോണിലേതിന് സമാനമായാണ് ഒരുക്കിയിട്ടുള്ളതെന്നാണ് ചിത്രങ്ങള്‍ സൂചിപ്പിക്കുന്നത്.
മെക്കാനിക്കല്‍ ഫീച്ചര്‍ സംബന്ധിച്ച സൂചനകള്‍ ടാറ്റ മോട്ടോഴ്‌സ് നല്‍കിയിട്ടില്ല. എന്നിരുന്നാലും പെട്രോള്‍ എന്‍ജിനായിരിക്കും ഈ വാഹനത്തിന്റെ ഹൃദയമെന്ന് ആദ്യം മുതല്‍ ഉയര്‍ന്നുകേള്‍ക്കുന്നതാണ്. ടാറ്റയുടെ മറ്റ് മോഡലുകളില്‍ നല്‍കിയിട്ടുള്ള 1.2 ലിറ്റര്‍ റെവോട്രോള്‍ പെട്രോള്‍ എന്‍ജിനായിരിക്കും HBX-ല്‍ നല്‍കുക. ഇത് 85 ബി.എച്ച്.പി. പവറും 113 എന്‍.എം. ടോര്‍ക്കുമേകും. അഞ്ച് സ്പീഡ് മാനുവല്‍ ഗിയര്‍ബോക്‌സിനൊപ്പം ഓപ്ഷണലായി എ.എം.ടിയും എത്തിയേക്കുമെന്നും സൂചനയുണ്ട്.
Content Highlights: Tata Motors Named Small SUV As HBX; First Teaser Released
Also Watch
RELATED STORIES
IN CASE YOU MISSED IT
.jpg?$p=9a8d994&f=1x1&w=100&q=0.8)
.jpg?$p=451b40a&q=0.8&f=16x11&w=104)
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..